Onoono Nakai a Mutolu ke he Falu Tuga ne Taute e Iehova?
“Kia nakai ha i ai ke he tino e feveheaki, ka kia feleoleoaki e tau fahi tino oti kana.”—1 KORI. 12:25.
1. Fēfē e logonaaga haau he magaaho ne hū fakamua atu a koe ke he parataiso fakaagaaga?
HE MAGAAHO fakamua ne vevehe mai a tautolu he lalolagi mahani kelea ti kamata ke lafi mo e tau tagata ha Iehova, ne liga fiafia lahi a tautolu ke iloa e fakaalofa mafanatia mo e fiafia fakatagata ne ha ha ia lautolu. Ko e kehe ha a ia mai he tau tagata fakalialia, vihiatia, mo e taufetoko i lalo he pule a Satani! Ne omai a tautolu ki loto he parataiso fakaagaaga, ne pukeina he mafola mo e kaufakalataha.—Isaia 48:17, 18; 60:18; 65:25.
2. (a) Ko e heigoa ka liga lauia ai e onoonoaga ha tautolu ke he falu? (e) Ko e heigoa kua liga lata ke taute e tautolu?
2 Ka e fai magaaho he mole, liga kamata a tautolu ke kitia e tau matakainaga ke he matahio pulefu he nakai mitaki katoatoa. Ko e nakai mitaki katoatoa ha tautolu ka liga hulu fakalahi e tau hehē he tau matakainaga, ka e nakai onoono ke he tau mahani fakaagaaga kua loga lahi ia lautolu. Ke talahau fakakū, kua nimo e tautolu ke onoono ki a lautolu tuga ne onoono a Iehova ki a lautolu. Kaeke ke tupu e mena nei, ko e magaaho a ia ke filifilia e onoonoaga ha tautolu ti hiki mai ai ke fakatatau mo e onoonoaga maaliali a Iehova.—Esoto 33:13.
Puhala ne Kitia e Iehova e Tau Matakainaga ha Tautolu
3. Ko e heigoa ne fakatatai he Tohi Tapu e fakapotopotoaga Kerisiano ki ai?
3 Tuga ne fakamau he 1 Korinito 12:2-26, ne fakatai he aposetolo ko Paulo e fakapotopotoaga he tau Kerisiano fakauku ke he tino ne ‘loga e tau faahi.’ Ke tuga e kehekehe he tau alaga he tino, nukua kehekehe lahi foki e tau tagata he fakapotopotoaga ke he tau mahani mo e tau lotomatala ha lautolu. Pete ia, ne talia e Iehova e tau tagata kehekehe. Kua fakaalofa mo e loto fakaaue a ia ke he tau tagata takitokotaha. Ti kua fakatonu pihia foki e Paulo a tautolu ko e tau tagata he fakapotopotoaga ke “feleoleoaki e tau fahi tino oti kana.” Liga kua uka e mena nei ha kua kehekehe e tau aga fakatagata he falu mai he ha tautolu.
4. Ko e ha kua liga lata ke hiki e onoonoaga ha tautolu ke he tau matakainaga ha tautolu?
4 Kua liga hihiga foki a tautolu ke ono fakatonutonu ke he tau lolelole he tau matakainaga ha tautolu. He taute pihia, kua tuga ke fakaaoga e tautolu e pokiata mo e matahio ne poki fakatonutonu ni ke he mena tote. Ka kua onoono a Iehova puhala he tau matahio lalahi, ne poki e tagata fakalataha mo e tau takaiaga. Kua liga hihiga a tautolu ke hulu fakatonutonu ni ke he tau mena ne nakai loto ki ai, ka ko Iehova ne kitia e ia e tagata katoa, putoia e tau mahani mitaki oti he tagata. He lali fakalahi a tautolu ke tuga a Iehova, to lahi e mena ka lafi e tautolu ke he agaaga he fakaalofa mo e kaufakalataha i loto he fakapotopotoaga.—Efeso 4:1-3; 5:1, 2.
5. Ko e ha ne nakai lata ke fakafili falu?
5 Ne mailoga mooli e Iesu kua fa hihiga e tau tagata nakai mitaki katoatoa ke fefakafiliaki. Ne fakatonu e ia: “Aua neke fakafili atu e mutolu, neke fakafili a mutolu.” (Mata. 7:1) Mailoga ne nakai pehē a Iesu: “Kia nakai fakafili atu”; ne pehē a ia: “Aua neke fakafili atu.” Ne iloa e ia ko e tokologa he tau tagata fanogonogo haana kua fitā he mahani tuhituhi ke he falu. Liga kia kua feaki e tautolu e mahani pihia? Kaeke ke hihiga pihia a tautolu, kua lata mogoia ke gahua fakalahi ke hiki, ke nakai fakafili fakakelea mai ki a tautolu. Mooli, ko hai a tautolu ke fakafili taha tagata ne fakaaoga e Iehova he tuaga kotofa po ke talahau kua nakai lata a ia ke eke mo taha i loto he fakapotopotoaga? Kua liga fai mena ne kūkū he matakainaga, ka e kaeke kua matutaki a Iehova ke talia a ia, kua hako kia a tautolu ke fakaheu e tagata ia? (Ioane 6:44) Kua talitonu mooli nakai a tautolu ko Iehova hane takitaki e tau tagata he fakatokatokaaga haana mo e kaeke ke fai hikiaga ne lata ke taute, to taute ni he magaaho tonu haana?—Totou Roma 14:1-4.
6. Fēfē e onoonoaga a Iehova ke he tau fekafekau haana?
6 Taha e mena mitaki ue atu hagaao ki a Iehova kua maeke a ia ke kitia e tau Kerisiano takitokotaha ke he amaamanakiaga ha lautolu ka hokotia atu a lautolu ke he mitaki katoatoa he lalolagi foou. Iloa foki e ia e holo ki mua fakaagaaga ne kua fitā he taute e lautolu. Ti, kua nakai fai kakano a ia ke ono fakatonutonu ke he lolelole fakatino he tau tagata takitaha. Ne totou e tautolu he Salamo 103:12: “Tuga ne vaha mamao e fahi uta mo lalo, kua fakamamao pihia e ia ia tautolu ha tautolu a tau holifono.” Ko e fakaaue ha ia ha tautolu takitokotaha ma e mena ia!—Sala. 130:3.
7. Ko e heigoa ne ako e tautolu mai he onoonoaga a Iehova ki a Tavita?
7 Kua kitia mooli e tautolu i loto he tau Tohiaga Tapu kua ha ha ia Iehova e lotomatala lahi ke ono fakatonu atu ke he mahani mitaki he tagata. Ne fakamaama he Atua a Tavita ko e “haku a fekafekau ko Tavita, ne omaoma ai ke he haku a tau poaki, mo e mui mai a ia kia au, mo e hana loto katoa, ke eke e tau mena tonu hokoia ki mua haku.” (1 Patu. 14:8) Mooli, kua iloa e tautolu ne hehē falu mena ne taute e Tavita. Pete ia, ne fifili ni a Iehova ke ono fakatonutonu ke he mahani mitaki ha kua iloa e ia kua tonu e loto a Tavita.—1 Nofo. 29:17.
Kitia e Tau Matakainaga ha Tautolu Tuga he Kitia e Iehova
8, 9. (a) Puhala fe ka taute a tautolu ke tuga a Iehova? (e) Puhala fe ka liga fakatai e mena nei, mo e ko e heigoa e fakaakoaga ma tautolu?
8 Maeke a Iehova ke kitia e tau loto, ka e nakai maeke a tautolu. Ko e kakano mitaki anei ma tautolu ke nakai fefakafiliaki. Kua nakai iloa oti e tautolu e manako he taha tagata. Lata a tautolu ke lali ke fifitaki a Iehova he nakai ono fakatonutonu ke he nakai mitaki katoatoa he tagata, ko e mena fakahiku to galo. Nakai kia ko e foliaga mitaki ke tuga a ia hagaao ke he mena nei? He taute pihia e tautolu ka lafi ke he tau fakafetuiaga mafola mo e tau matakainaga ha tautolu.—Efeso 4:23, 24.
9 Ke fakatai, manamanatu la ke he fale kua malona—ne mokulu e tau halavai, malipilipi e tau pū fakamaama, ti malona e tau lapa he alofale he pala. Ti liga onoono e laulahi he tau tagata ke he fale ia mo e pehē kua lata ni ke uulu hifo; ko e mena teteki. Ka e liga hau taha tagata ne kehe lahi e onoonoaga. Ne liga nakai ono a ia ke he maona ka e mailoga kua maō e talagaaga ti kua maeke e fale ke liu fakafoou. Ne fakatau e ia e fale mo e fakafoou e falu mena ne popo ti fakamanaia ai. Fakamui, ne pehē e tau tagata ne o hui ko e kaina fulufuluola mooli. Maeke nakai a tautolu ke tuga e tagata nei ne gahua lahi ke taute po ke fakafoou e fale? Ti, he nakai ono fakatonu ke he tau kūkū ne kitia maali ke he tau matakainaga, maeke nakai a tautolu ke kitia e tau mahani mitaki ha lautolu mo e mailoga kua maeke ia lautolu ke tupu hake fakaagaaga? Kaeke ke pihia, to maeke a tautolu ke fakaalofa ke he tau matakainaga ha ko e fulufuluola fakaagaaga ha lautolu, ke tuga ne taute e Iehova.—Totou Heperu 6:10.
10. Maeke fēfē he tomatomaaga ne moua ia Filipi 2:3, 4 ke lagomatai a tautolu?
10 Ne foaki mai he aposetolo ko Paulo falu tomatomaaga ka lagomatai a tautolu ke he ha tautolu a tau fakafetuiaga mo e tau matakainaga oti he fakapotopotoaga. Ne fakatonu e ia e tau Kerisiano: “Aua neke manatu ha mena mo e fetoko mo e hula noa, ka kia igatia a mutolu mo e manatu he loto fakatokolalo kua mua e faoa oti kia ia; aua neke takitokotaha mo e manamanatu ke he tau mena hana, ka e takitokotaha mo e manamanatu ke he tau mena he falu.” (Filipi 2:3, 4) To lagomatai he mahani fakatokolalo a tautolu ke moua e onoonoaga mitaki ke he falu. He fakakite e fiafia fakatagata mo e kumi e mitaki ha lautolu ka lagomatai mai foki ke onoono ki a lautolu tuga ne taute e Iehova.
11. Ko e heigoa e tau mena tutupu ne lauia falu fakapotopotoaga?
11 He tau magaaho foou nei, ko e tau mena tutupu he lalolagi katoa ati hikihiki ai e tau tagata tokologa ke he falu motu. Ko e falu taone mogonei kua nonofo ai he tau tagata mai he tau motu kehekehe. Ko e falu tagata foou he matakavi ha tautolu kua fiafia foki ke he kupu mooli he Tohi Tapu, ti kua fakalataha mai ki a tautolu ke tapuaki a Iehova. Ko lautolu nei kua “mai he tau motu oti, mo e tau faoa, mo e tau tagata kehekehe, mo e tau vagahau kehekehe.” (Fakakite. 7:9) Ko e fua, kua loga e fakapotopotoaga ha tautolu nukua puke he tau tagata mai he tau motu kehekehe.
12. Ko e heigoa e onoonoaga ke he falu ne kua lata ia tautolu ke taofi mau, ti ko e ha kua liga paleko he falu magaaho?
12 He fakapotopotoaga ha tautolu, liga lata ia tautolu ke mataala ke taofi mau e onoonoaga mitaki ke he taha mo e taha. Kua lata ke manatu e fakatonuaga he aposetolo ko Peteru ke fakakite e “fakaalofa fakamoli ke he tau matakainaga” mo e ke ‘feofanaki fakalahi ai mai he loto mea.’ (1 Pete. 1:22) Ke feaki e fakaalofa mooli kua liga paleko ke he tau fakapotopotoaga ne tokologa e tau tagata mai he tau motu kehekehe. Ko e tau aga fakamotu he tau matakainaga tapuaki ha tautolu kua liga kehe mai he ha tautolu, ke tuga e puhala fakaakoaga, fakatupe, mo e feakiaga fa mahani ha lautolu. Kua uka nakai a koe ke maama e puhala manamanatu po ke tau gahua he falu? Kua liga manatu pihia foki a lautolu hagaao ki a koe. Mohā ia, kua fakaako oti a tautolu: ‘Kia fakaalofa ke he tau matakainaga oti kana.’—1 Pete. 2:17.
13. Ko e heigoa e tau hikiaga he manamanatuaga ha tautolu kua liga lata ia tautolu ke taute?
13 Kua liga latatonu ke taute falu hikiaga ke he tau manamanatuaga ha tautolu ke fakalaulahi e fakaalofa ma e tau matakainaga oti kana ha tautolu. (Totou 2 Korinito 6:12, 13.) Kua logona nakai e tautolu a tautolu ne fa talahau pehē “Nakai fili tagata au, ka e . . . ” ti talahau mogoia falu mahani nakai mitaki ne kitia e tautolu kua holofa ke he falu tagata he taha matakau fakamotu? Ko e tau manatu pihia ne liga fakakite kua lata tuai a tautolu ke tiaki e fili tagata ne ha ha agaia he fatuakiloto ha tautolu. Liga hūhū hifo a tautolu, ‘Kua lali tumau nakai au ke iloa e tau tagata ne kehe e aga fakamotu mai he haaku?’ Ko e kumikumi fakatagata pihia ka liga lagomatai a tautolu ke taute e holo ki mua ke talia mo e ofania e tau matakainaga ha tautolu ne omai he tau motu kehe.
14, 15. (a) Talahau e tau fakafifitakiaga ha lautolu ne hikihiki e onoonoaga hagaao ke he falu tagata. (e) Maeke fēfē ia tautolu ke fifitaki ki a laua?
14 Ne talamai he Tohi Tapu ki a tautolu e tau fakafifitakiaga mitaki he tau tagata ne taute e tau hikiaga, ko e aposetolo ko Peteru e taha. Ha ko e Iutaia, ne liga kalo a Peteru neke hū atu ke he kaina he tagata Motu Kehe. Ka e manamanatu la ke he mena ne logona hifo e ia he magaaho ne ole age ke ahiahi e kaina he tagata Motu Kehe ko Konelio! Ne taute e Peteru e tau hikiaga, he mailoga ko e finagalo he Atua ma e tau tagata he tau motu oti kana ke eke mo vala he fakapotopotoaga Kerisiano. (Gahua 10:9-35) Ko Saulo, ne eke ko e aposetolo ko Paulo he magaaho fakamui, ne taute foki e tau hikiaga mo e tiaki e aga fili tagata haana. Ne talahau kua vihiatia lahi e ia e tau Kerisiano ti “favale ue atu [a ia] ke he ekalesia he Atua, mo e moumou ai.” Pete ia, he magaaho ne fakahako he Iki ko Iesu a Paulo, ne taute e ia e tau hikiaga lalahi ti kamata foki ke talia e takitakiaga mai ia lautolu ne favale fakamua a ia ki ai.—Kala. 1:13-20.
15 Nakai fakauaua kua maeke a tautolu ke hikihiki e aga ha tautolu ha ko e lagomatai he agaaga a Iehova. Kaeke ke mailoga e tautolu kua fai vala he fili tagata ne ha ha agaia ia tautolu, kia eketaha ke huo kehe e tau mena ia ti “toto mau e loto fakalataha ha he [a]gaga ke he pipiaga he mafola.” (Efeso 4:3-6) Ne fakamalolō he Tohi Tapu a tautolu ke ‘pipi fakamaopoopo a tautolu ke he fakaalofa.’—Kolo. 3:14.
Fifitaki a Iehova he Fekafekauaga ha Tautolu
16. Ko e heigoa e finagalo he Atua hagaao ke he tau tagata?
16 “Kua nakai fakamailoga tagata e Atua,” he tohia he aposetolo ko Paulo. (Roma 2:11) Na ko e finagalo ha Iehova ke putoia e tau tagata he tau motu oti ke he fakaholoaga haana ma e tapuakiaga. (Totou 1 Timoteo 2:3, 4.) Ke fakakatoatoa ai, ne taute e ia e fakaholoaga ma e “vagahau mitaki tukulagi ke fakamatala atu” ke he “tau motu kehe oti, mo e tau magafaoa, mo e tau vagahau kehekehe, mo e tau motu.” (Fakakite. 14:6) Ne pehē a Iesu: “Ko e kaina, ko e lalolagi haia.” (Mata. 13:38) Ko e heigoa mogoia e kakano ki a koe mo e magafaoa tata haau?
17. Maeke fēfē ia tautolu ke lagomatai e tau vahega tagata oti kana?
17 Kua nakai maeke oti ke oatu ke he tau faahi mamao he lalolagi ke uta e ogo he Kautu ke he falu. Mohā ia, kua liga maeke ia tautolu ke uta e ogo nei ke he tau tagata mai he tau faahi oti he lalolagi ne nonofo he matakavi ha tautolu. Kua mautali nakai a tautolu he tau magaaho oti ke fakamatala ke he tau vahega tagata oti kana, nakai ni ki a lautolu ne fa fakamatala a tautolu ki ai ke he tau tau loga? Ko e ha mogoia he eke mo fifiliaga mauokafua haau ke hokotia atu ke he falu ne nakaila fakamatala katoatoa ki ai?—Roma 15:20, 21.
18. Fakakite fēfē e Iesu e manamanatuaga ke he tau tagata?
18 Ne logona e Iesu kua lata lahi ke lagomatai e tau tagata oti kana. Ne nakai fakamatala a ia ke he taha ni e matakavi. Ne talamai he taha tala he Tohi Tapu ki a tautolu ne “haele fano a Iesu ke he tau māga oti, mo e tau magamotu.” Ti, he “fioia e ia e lanu tagata, ati fakaalofa hofihofi ai a ia kia lautolu” mo e fakakite e manako ke lagomatai a lautolu.—Mata. 9:35-37.
19, 20. Ko e heigoa falu puhala ka fakaata e tautolu e manamanatu a Iehova mo Iesu ma e tau vahega tagata oti kana?
19 Ko e heigoa falu puhala ka fakatātā e koe e aga pihia? Ko e falu kua lali a lautolu ke fakamatala he falu faahi he matakavi ha lautolu ne nakai gahua tumau. Liga kua putoia e tau faahi pisinisi, tau paaka, tau tutūaga peleōafi, po ke i mua he tau fale nonofo ne nakai mukamuka ke ō ki loto. Ko e falu kua lali ke ako e vagahau foou ke fakamatala ke he falu matakau motu kehe ne nonofo mogonei he matakavi ha lautolu po ke ke he tau matakau ne nakai fa fakamatala tumau ki ai he vahā fakamua. He ako ke fakafeleveia e tau tagata nei ke he vagahau ni ha lautolu ka fakakite kua lahi e manamanatu haau ki a lautolu. Ka nakai maeke a tautolu ke ako taha vagahau kehe, fēfē ke fakamalolō ki a lautolu ne taute pihia? Mooli kua nakai lata a tautolu ke fakalolelole po ke hūhū toko ke he kakano ne lali falu ke fakamatala ke he tau tagata ne omai he tau motu kehe. Ko e tau momoui oti kua uho ke he fofoga he Atua, ti manako a tautolu ke pihia foki e onoonoaga.—Kolo. 3:10, 11.
20 He moua e onoonoaga he Atua ke he tau tagata kua kakano foki ke fakamatala ke he tau tagata oti, pete ko e tau tutūaga ha lautolu. Ko e falu kua liga hekepēfano, fulufagu, po ke kitia maali ke moui feuaki. Kaeke ke nakai totonu mai e falu tagata ki a tautolu, kua nakai lata ia tautolu ke feaki e manatu fakavihia hagaao ke he tau tagata motu kehe po ke aga fakamotu ha lautolu ia. Ne ekefakakelea he falu a Paulo, ka e nakai fakaatā e ia e mena nei ke tiaki nakai fakamatala atu ke he tau tagata he matakau ia. (Gahua 14:5-7, 19-22) Ne talitonu a ia to liga talia he falu tagata mo e loto fakaaue.
21. Lagomatai fēfē a koe he moua e onoonoaga a Iehova ke he falu?
21 Kua maaliali lahi mogonei ke moua e onoonoaga hako—ko e onoonoaga a Iehova—kua latatonu ke he fakafehagai ha tautolu mo e tau matakainaga ha tautolu he fakapotopotoaga, tau matakainaga ne omai he tau motu kehekehe, mo e tau tagata he fonua. Ka fakaata fakalahi e tautolu e onoonoaga a Iehova, to fakaohooho lahi e tautolu e mafola mo e kaufakalataha. Ti to maeke lahi a tautolu mogoia ke lagomatai falu ke omai ke fakaalofa ki a Iehova, ko e Atua ne “kua nakai fakamailoga [tagata]” ka e fakatātā e fiafia fakaalofa ke he tau tagata oti kana, ‘ha ko lautolu oti ko e gahua he hana tau lima.’—Iopu 34:19.
Maeke Nakai a Koe ke Tali?
• Ko e heigoa e ononoaga ke he tau matakainaga kua lata ia tautolu ke kalo mai ai?
• Maeke fēfē a tautolu ke fifitaki a Iehova ke he onoonoaga ha tautolu ke he tau matakainaga?
• Ko e heigoa ne ako e koe hagaao ke he onoonoaga ha tautolu ke he tau matakainaga mai he tau motu kehekehe?
• Maeke fēfē a tautolu ke fifitaki e onoonoaga a Iehova ke he tau tagata he magaaho ka haia he fekafekauaga?
[Fakatino he lau 26]
Maeke fēfē a koe ke iloa e tau tagata he tau motu kehe?
[Tau Fakatino he lau 28]
Tau puhala fe ka tokologa e tagata haau ka hokotia ki ai mo e vagahau mitaki?