Fakaalofa—Ko e Kei ke he Fekafekauaga Fua Mitaki
1 “Kia o mai a mutolu kia au, . . . ko au foki ke okioki ai a mutolu.” (Mata. 11:28) Ko e tau kupu fakaalofa pihia ne fakaata e fakaalofa hokulo ha Iesu ke he tau tagata. Ko e tau fekafekau Kerisiano, kua manako a tautolu ke fifitaki a Iesu he fakakite e fakaalofa ha tautolu ke he tau tagata ne pehia he lalolagi nakai fakaalofa. Maeke fēfē a tautolu ke taute pihia he fa e folafola e tala mitaki?
2 He Kupu: Ko e fakaalofa ke he tau tagata kua fakalagalaga a Iesu ke fakaaoga e tau magaaho oti ke folafola e tala mitaki. (Ioane 4:7-14) To lagomatai he fakaalofa a tautolu ke fahia mai he fakauaua ke fakamatala nakai mautali. Ne fakamatala fakamitaki e tama fifine ono tau ke he fifine ne nofo he faahi haana he poko fakatali ke he ekekafo. Ko e heigoa ne omoomoi a ia ke fakamatala? Ne fakamaama e ia, “Kua matamata e fifine tuga kua lata ia ia ke iloa a Iehova.”
3 Maeke ia tautolu ke fakakite e fiafia ha tautolu ke he tau tagata he mamali mafanatia mooli mo e leo totonu. He fanogonogo fakamitaki ke he tau talahauaga he falu, mailoga e tau kapaletū ha lautolu, mo e fakaata e fiafia fakatagata mooli kua tuga e fakakite he fakaalofa. (Fakatai 15:23) He fifitaki a Iesu, kua lata ia tautolu ke peehi e fekau mafanatia he Kautu mo e fakaalofa hofihofi noa a Iehova ke he tau tagata.—Mata. 24:14; Luka 4:18.
4 He Gahua: Ne matakite a Iesu ke he tau manako he falu ke he tau puhala leveki tino. (Mata. 15:32) Kua liga fai magaaho foki a tautolu ke taute e tau gahua fakaalofa-totonu ke he fekafekauaga. Taha e matakainaga fifine ne mailoga e fifine ne taufetului ke maama e fekau aoga he telefoni. Ne foaki he matakainaga fifine ke lagomatai he fakaliliu e tau kupu he tagata ne tutala he telefoni. Kua hafagi he gahua fakaalofa nei e puhala ma e fakatutalaaga Tohi Tapu ne lagomatai e fifine ke talia e fakaako Tohi Tapu. He taha mena foki, ne liu aahi atu e matakainaga taane ti moua ai e tagata he kaina ne hogohogomanava he apitia e nofoa mamafa he pu gutuhala. He lagomatai a ia ke hiki e nofoa, fakahiku ti fakauna ai e matakainaga taane he nofoa ne lagomatai e ia ke lagaki ti kamata e fakaako Tohi Tapu mo e tagata ne loto fakaaue.
5 He gahua a tautolu he fekafekauaga, kua fakakite e tautolu e fakaalofa ma e Atua mo e fakaalofa ma e katofia ha tautolu. (Mata. 22:36-40) Ko e fakakite ke he tau kupu mo e gahua kua lagomatai a lautolu ne loto fakamooli ke mailoga kua moua e tautolu e kupu mooli.