Maeke a Tautolu ke Foaki Atu ki a Iehova
1 Iloa nakai e koe na maeke e tau tagata ke foaki atu taha mena ke he Atua? Ne poa e Apelu falu manu uho haana ki a Iehova ti taute pihia foki e Noa mo Iopu e tau poa pihia. (Kene. 4:4; 8:20; Iopu 1:5) Mooli, ko e tau poa pihia ne nakai fakamuhu mena aki e Tufuga ke he ha puhala, ha kua ha ha ia ia e tau mena oti. Ka kua fakatātā he tau poa e fakaalofa hokulo he tau tagata tua fakamooli ia ma e Atua. He vahā nei, kua maeke ia tautolu ke foaki e magaaho, malolō, mo e tau koloa ki a Iehova ko e “poa fakaheke.”—Hepe. 13:15.
2 Magaaho: Ko e nava ha ia ke fakaaoga e tau magaaho mai he tau mena nakai aoga lahi ke foaki katoatoa ke he fekafekauaga! (Efeso 5:15, 16) Liga hiki e tautolu e setulu ke maeke ke paionia fakakū lagataha po ke falu mahina he tau. Liga ke fakaloa e magaaho ha tautolu kua fa fakaaoga he fekafekauaga. He 30 e minuti lafi ki luga ka gahua he fonua he tau faahi tapu takitaha ka fakamalikiti e fekafekauaga ha tautolu ke he kavi ua e tulā he mahina!
3 Malolō: He fai malolō ke fakaaoga he fekafekauaga, kua lata ke kalo mai he fakafiafiaaga mo e gahua tupe ka taute a tautolu ke lolelole lahi ke nakai foaki katoatoa a tautolu ki a Iehova. Kua lata foki a tautolu ke tuku kehe e tau fakaatukehe ka taute e tau loto ha tautolu ke “tukutukuhifo,” he fōfō e malolō ha tautolu nukua lata ke fakaaoga he fekafekau ki a Iehova. (Fakatai 12:25) Pete ne fai tupetupe mooli a tautolu, ko e mitaki ha ia ke ‘tuku atu kia Iehova e tau mena ne fakaatukehe ai a tautolu’!—Sala. 55:22; Filipi 4:6, 7.
4 Tau Koloa: Kua manako foki a tautolu ke foaki e tau koloa fakatino ke lalago aki e gahua fakamatala. Ne fakamalolō e Paulo e tau matakainaga Kerisiano ke tumau ke “tuku age ai hana mena” ke maeke ke foaki taha mena ki a lautolu ne manako lagomatai. (1 Kori. 16:1, 2) He puhala pihia, kua liga maeke ia tautolu ke tuku kehe e tau tupe ke foaki ma e tau matagahua he fakapotopotoaga he matakavi ti pihia mo e gahua he lalolagi katoa. Kua loto fakaaue a Iehova ke he mena ne foaki e tautolu mai he tau loto, pete ni he tote.—Luka 21:1-4.
5 Kua lahi mahaki e mena ne foaki e Iehova ma tautolu. (Iako. 1:17) Kua fakakite e tautolu e loto fakaaue he foaki fakamokoi e magaaho, malolō, mo e falu koloa ha tautolu ke fekafekau ki a ia. He taute e tautolu e tau mena ne fakafiafia a Iehova, “ha kua fakaalofa e Atua kia ia kua foaki mo e fakamakai.”—2 Kori. 9:7.