Lagomatai e Tama Fuata Hau ke Tupu Malolo

1, 2. Ko e heigoa e tau paleko mo e ko e heigoa e tau olioli ka ta mai he tau atutau fuata?

KA FAI tama fuata e fale kua kehe lahi mai he fai tama lima tau po ke tama hogofulu tau. Ko e atutau fuata ha lautolu kua moua mai ni e lautolu ha lautolu a tau paleko mo e tau mena vihi, ka e maeke foki ni ia lautolu ke moua mai e tau olioli mo e tau palepale. Ko e tau fakafifitakiaga tuga a Iosefa, Tavita, Iosia, mo Timoteo kua fakakite mai na maeke he tau tagata fuata ke gahua fakamitaki mo e moua e fakafetuiaga mitaki mo Iehova. (Kenese 37:2-11; 1 Samuela 16:11-13; 2 Tau Patuiki 22:3-7; Gahua 16:1, 2) Kua tokologa e tau fanau fuata he vaha nei ne fakamoli ke he mena taha ia ni. Ti liga, iloa e koe falu ha lautolu ia.

² Pete ia, ke he falu ko e tau atutau fuata ko e atu fakalavelave lahi. Ne logona he tau fuata mui e tau manamanatuaga o hake mo e o hifo. Ko e tau fanau fuata tane mo e fifine ne manako a lautolu ke tutokotaha, ti liga totoko e lautolu e tau fakakaupaaga ne tuku he tau matua ha lautolu ki a lautolu. Pete ia, ko e tau fuata pihia kua goagoa agaia ni mo e kua lata ke moua e lagomatai fakaalofa mo e fakauka mai he tau matua ha lautolu. E, ko e tau atutau fuata kua maeke ke fiafia moli, ka e maeke agaia ni ia lautolu ke fakahakuhaku​—ke he tau matua mo e tau fanau fuata. Ka e lagomatai fefe e tau fuata he tau tau nei?

3. Ko e tau puhala fe ne maeke he tau matua ke age ke he tau atutau fuata mui ha lautolu e tau magaaho mitaki he moui?

³ Ko e tau matua ne mumui ke he fakatonuaga he Tohi Tapu kua fakaako ke he tau atuhau fuata mui ha lautolu e tau magaaho kua mua atu he mitaki ke fakakautu aki ha lautolu a tau puhala mai he tau kamatamata ia, ke hoko atu mo tau tagata lalahi aoga. Kua ha ha he tau motu oti mo e tau magahala oti, ti ko e tau matua mo e tau fanau fuata ne fakaaoga auloa e tau matapatu fakaakoaga he Tohi Tapu kua fakamonuina mo e kautu.​—Salamo 119:1.

FAKAMOLI MO E HAFAGI E MATUTAKIAGA

4. Ko e ha e fai pulega pauaki ne aoga lahi ai he magaaho he tau atutau fuata?

⁴ Kua pehe mai e Tohi Tapu: “Kua ulu e tau mena ne manamanatu ki ai kaeke kua nakai fai pulega.” (Tau Fakatai 15:22) Kaeke kua lata ke fai pulega he vaha ne ikiiki agaia e fanau, kua mua atu e aoga ke taute he atutau fuata​—ko e vaha ne kua tote e magaaho he tama ne nofo he kaina mo e lahi e magaaho mo e tau kapitiga aoga po ke falu he tau atu. Kaeke ke nakai fai pulega​—nakai fakamoli mo e hafagi e matutakiaga he vahaloto he fanau mo e tau matua​—​to eke e tau fanau fuata mo tau tagata kehe he fale. Ti maeke fefe e tau laini he matutakiaga ke hafagi tumau?

5. Fakamalolo fefe e tau fanau fuata ke manamanatu ke he tau mena he matutakiaga mo e tau matua ha lautolu?

⁵ Ko e tau fanau fuata fakalataha mo e tau matua kua lata ke taute ha lautolu a vala he mena nei. Moli, to uka lahi ke he tau fuata mui ke tutala mo e ha lautolu a tau matua ke tuga he vaha ne ikiiki ai a lautolu. Pete ni he pihia, ka e manatu “kua malaia e motu kaeke kua nakai fai pule; ka ko e tau pule tokologa ke hao mitaki ai.” (Tau Fakatai 11:14) Kua lata e tau kupu nei mo e tau tagata oti, tau fanau ikiiki mo e tau fuakau. Ko e tau fanau fuata ne mailoga e mena nei to maama ia lautolu kua lata agaia ni a lautolu ke fai takitakiaga mitaki, ha kua hagaao atu a lautolu ke he tau mena kehekehe loga ne nakai mahani a lautolu ki ai fakamua. Kua lata ia lautolu ke mailoga ko e tau matua talitonu ha lautolu ko e tau fakatonutonuaga kua katoatoa ha kua loga e tau mena ne iloa he moui mo e fakamoli a lautolu he tupetupe ke he fakaalofa ke he loga he tau tau. Ti ke he magahala nei he ha lautolu a tau momoui, ko e tau atutau fuata pulotu to nakai liliu kehe mai a lautolu mai he tau mamatua.

6. Ko e heigoa e aga ka ha ha he tau matua pulotu mo e loto fakaalofa ke he matutakiaga mo e tau fanau fuata ha lautolu?

⁶ Ko e kakano he hafagi e matutakiaga ke lali fakamalolo e matua ke fai magaaho ata kaeke ka logona he tama fuata e fia manako ke tutala. Kaeke ko koe ko e matua, kia manatu ke hafagi e matutakiaga mai he fahi hau. Kua nakai liga mukamuka e mena nei. Kua pehe mai e Tohi Tapu kua ha ha i ai e “vaha ke fakanono ai, mo e vaha ke vagahau ai.” (Fakamatalaaga 3:7) Ka hoko e magaaho ke logona he tama fuata kua lata ke tutala, liga ko e magaaho hau a ia ke fakanono. Liga ko e magaaho kua fakatoka kehe e koe a ia ma e aoga fakatagata, okioki, po ke taute e tau gahua he fale. Pete ni a ia, kaeke ke manako e fuata hau ke tutala ki a koe, lali ke hiki e fakaholoaga hau mo e fanogonogo. Neke teki, kua nakai liu a ia ke lali foki. Kia manatu e fakafifitakiaga a Iesu. He taha magaaho, ne fakatoka e ia e magaaho ke okioki ai. Ka ko e magaaho ne agaagai mai e tau tagata ke fanogonogo ki a ia, ne tuku kehe e ia e okioki mo e kamata a ia ke fakaako a lautolu. (Mareko 6:30-34) Ne mailoga he laulahi he tau fanau fuata e tau momoui lavelave he tau matua ha lautolu, ka kua lata ke fakamanatu ki a lautolu ko e tau matua ha lautolu haia kaeke ke manako a lautolu ki ai. Ko e mena ia, kia fai magaaho ata mo e kia maama.

7. Ko e heigoa he tau matua kua lata ke tiaki?

⁷ Kia lali ke manatu ko e fefe la a koe he magaaho ne tama fuata ai, mo e ua nimo hau a agaga fakahulahula! Kua lata e tau matua ke olioli ka nonofo fakalataha mo e fanau ha lautolu. Kaeke ke fai magaaho ata, fakaaoga fefe he tau matua e magaaho ia? Kaeke ke manako tumau a lautolu ke fakaaoga e tau magaaho tokanoa ia ke taute e tau mena ne nakai lauia ai ha lautolu a magafaoa, to mafiti ha lautolu a tau fanau fuata ke mailoga ai. Kaeke ke hoko e tau fuata mui ke he fakahikuaga kua manamanatu lahi ha lautolu a tau kapitiga aoga ki a lautolu ka e nakai pihia e tau matua, kua fakalago tuai a lautolu ke moua e tau mena vihi.

KO E HEIGOA KA FAKAMATUTAKI

8. Maeke fefe e fakaaue ke he mahani fakamoli, malolo he gahua, mo e mahani mitaki ke tala age ke he fanau?

⁸ Kaeke ke nakai la fakaako he tau matua ke he fanau ha lautolu e fakaaue ma e mahani fakamoli mo e gahua fakamalolo, kua lata ia lautolu ke taute pihia he magaaho he tau atutau fuata. (1 Tesalonia 4:11; 2 Tesalonia 3:10) Kua aoga foki ma lautolu ke iloa mitaki kua talitonu mo e tau loto katoa e fanau ha lautolu ke he aoga he nonofo mo e mahani mitaki mo e moui mea. (Tau Fakatai 20:11) Kua matutaki lahi e matua he tau vala nei ke he puhala he fakafifitakiaga. Tuga ni e tau tane nakai talitonu kua maeke ke “moua a lautolu he mahani mitaki he tau hoana ha lautolu, ka e nakai vagahau,” ti maeke he tau fanau fuata ke fakaako e tau matapatu fakaakoaga hako puhala mai he tau mahani he tau matua ha lautolu. (1 Peteru 3:1) Pete ia, ko e fakafifitakiaga hokoia ni kua nakai la lahi, kakano ha kua fakatokanoa foki e fanau ke he tau fakafifitakiaga kelea loga mo e puke he tau fakailoaaga fakataki i fafo he kaina. Ko e mena ia, ko e tau matua mitaki kua lata ke iloa e tau manatu he tau fuata ha lautolu ke he tau mena ne kitia mo e logona e lautolu, mo e kua ui e mena nei ma e fakatutalaaga fai kakano.​—Tau Fakatai 20:5.

9, 10. Ko e ha e tau matua kua lata ke manatu ke fakaako e fanau ha lautolu hagaao ke he tau vala he mahani fakatane mo e fifine, mo e taute fefe e lautolu e mena nei?

⁹ Kua moli pauaki e mena nei ka hoko ke he tau vala he mahani fakatane mo e fifine. Tau matua, kua fuafuakelea kia a mutolu ke tutala e mahani fakatane mo e fifine mo e fanau ha mutolu? Pete ni he pihia a mutolu, kia fakamalolo ke taute pihia, ha kua moli ni ko e tau fanau ikiiki ha mutolu to iloa mai ni e lautolu e fakaakoaga ia mai he falu. Kaeke ke nakai iloa e lautolu mai ia mutolu, po ko hai ne iloa ko e heigoa e tau tala teteki ia ka moua e lautolu? I loto he Tohi Tapu, kua nakai ma a Iehova mai he tau vala ia he mahani fakatane mo e fifine, mo e kua lata ke pihia foki e tau matua.​​—Tau Fakatai 4:1-4; 5:1-21.

¹⁰ Ko e fakaaue ha ia, ha kua ha ha he Tohi Tapu e takitakiaga maama he vala he mahani fakatane mo e fifine, mo e kua fakailoa he Sosaiete he Kolo Toko, loga e tau tala lagomatai ne fakakite aki e takitakiaga nei kua aoga agaia ke he lalolagi mogonei. Ko e ha ne nakai fakaaoga ai e lagomataiaga nei? Ma e fakataiaga, ko e ha ne nakai liu ai fakamanatu mo e tama tane po ke tama fifine hau e vala he “Sex and Morals” he tohi Questions Young People Ask​—Answers That Work? To liga ofo mo e fakaaue a koe ke he tau fua.

11. Ko e heigoa e puhala mua atu he mitaki ma e tau matua ke fakaako ke he ha lautolu a fanau e puhala ke fekafekau ki a Iehova?

¹¹ Ko e heigoa e fakaakoaga aoga lahi kua lata he tau matua mo e tau fanau ke fakatutala? Ne hagaao ke he mena ia e tohi he aposetolo ko Paulo: “Ka kia leveki [hau a fanau] ke he tau kupu akonaki mo e tau kupu fakamafana he Iki.” (Efeso 6:4) Kua lata e tau fanau ke fakaako tumau hagaao ki a Iehova. Ko e taha mena pauaki, kua lata ke fakaako a lautolu ke fakaalofa ki a ia, mo e manako ke fekafekau ki a ia. He mena nei, foki, lahi atu e mena ne fakaako mai he fakafifitakiaga. Kaeke ke kitia he tau fuata mui kua fakaalofa e tau matua ha lautolu ke he Atua, ‘mo e ha lautolu a tau loto katoa, mo e ha lautolu a agaga katoa, mo e ha lautolu a tau manatu katoa’ kua moua mai he mena nei e tau fua mitaki he tau momoui he tau matua ha lautolu, ti kua fakaohooho fakalahi a lautolu ke taute pihia. (Mataio 22:37) Kua tatai ni, kaeke ke kitia he tau tagata fuata e tau matua ha lautolu kua manamanatu fakamitaki ke he tau koloa he tino, mo e tuku fakamua e Kautu he Atua, to lagomatai he mena nei a lautolu ke manamanatu mitaki pihia foki.​—Fakamatalaaga 7:12; Mataio 6:31-33.

12, 13. Ko e heigoa e tau mena kua lata ke tokaloto kaeke ke manako ke kautu e fakaakoaga magafaoa?

¹² Ko e fakaakoaga Tohi Tapu fakafahi tapu he magafaoa ko e lagomataiaga mitaki lahi ke fakamatutaki aki e tau mena uho fakaagaga ke he tau tagata fuata. (Salamo 119:33, 34; Tau Fakatai 4:20-23) Kua aoga lahi ke fai aoga pihia tumau. (Salamo 1:1-3) Kua lata he tau matua mo e tau fanau ha lautolu ke mailoga kua fai mena foki kua lata ke fakatokatoka fakamui he fakaakoaga magafaoa, ka e nakai taute mai mua ki tua. Ko e falu mena foki, kua lata tonu e aga hako kaeke ke manako ke mitaki e fakaakoaga magafaoa. Taha e matua tane ne pehe: “Ko e kei hanei ma e takitaki ke fakamalolo e fakahautoka ka e fakalilifu he magaaho he fakaakoaga magafaoa​—fakaata ka e nakai fakagoagoa. Ko e lagotatai hako kua nakai mukamuka tumau ke moua, ti kua lata e tau fanau ikiiki ke hikihiki tumau e aga. Kaeke ke nakai holo mitaki e tau mena he taha magaaho mo e taha, fakamalolo mo e ono ki mua ke he magaaho ne toe.” Ko e matua tane taha nei ni ne talahau, ke he hana liogi to taute e tau fakaakoaga takitaha, ne ole fakahako ni a ia ma e lagomatai mai ia Iehova ke he onoonoaga hako he vala ka lauia ai e tau tagata oti.​—Salamo 119:66.

¹³ Ke takitaki e fakaakoaga magafaoa ko e kotofaaga he tau matua talitonu a ia. Moli, ko e falu he tau matua nakai ko e tau faiaoga taleni pauaki, ti uka ki a lautolu ke kumi e tau puhala ke taute aki e fakaako magafaoa ke fiafia. Pete ni he pihia, kaeke ke fakaalofa a mutolu ke he tau fanau fuata ha mutolu ke “mahani mo e fakamoli,” to manako a mutolu ke lagomatai a lautolu ke he puhala he mahani molu mo e fakamoli ke holo ki mua fakaagaga. (1 Ioane 3:18) Liga to gugu a lautolu he falu magaaho, ka e fa mahani ke logona e lautolu e hokulo he ha mutolu a fiafia he leveki ki a lautolu.

14. Maeke fefe e Teutaronome 11:18, 19 ke fakaaoga he magaaho ka fakamatutaki e tau mena fakaagaga ke he tau fanau fuata?

¹⁴ Ko e fakaakoaga magafaoa, nakai ko e magaaho ni a ia ke fakamatutaki e tau mena kua fakaagaga ne mua e aoga. Manatu nakai e mutolu e poaki a Iehova ke he tau matua? Ne pehe a ia: “Hanai, kia tuku e mutolu e tau kupu nai ke he ha mutolu a tau loto mo e ha mutolu a tau manatu, ti pipi ai foki mo fakamailoga ke he ha mutolu a tau lima, ke eke mo foupapa ke he vaha he ha mutolu a tau mata. Kia fakaako atu ai ke he fanau ha mutolu mo e vagahau ai ka nofo a koe ke he hau a fale, ti pihia foki ka fano a koe ke he puhala, ti pihia foki ka takoto a koe, ti pihia foki ni ka matike a koe.” (Teutaronome 11:18, 19; kikite foki Teutaronome 6:6, 7.) Kua nakai kakano pehe e mena nei kua lata e tau matua ke lauga tumau ke he tau fanau ha lautolu. Ka ko e ulu magafaoa fakaalofa kua lata ke mataala tumau ma e tau magaaho tokanoa ke ati hake e tuaga fakaagaga he hana magafaoa.

AKONAKI MO E FAKALILIFU

15, 16. (a) Ko e heigoa e akonaki? (e) Ko hai kua lata ke tuku age e akonaki, mo e ko hai ne ha ha i ai e kotofaaga ia ke kitia moli kua logona?

¹⁵ Ko e akonakiaga ko e fakamahani ne kua fakahako mo e kua lafi fakalataha mo e matutakiaga. Ko e akonaki ke uta he manatu ke fakahako aki, kua mua atu ke he fakahala​—pete ni he hoko e fakahala kaeke kua lata. Kua lata e fanau ha mutolu ke akonaki he magaaho ne ikiiki ai, ti ko e magaaho nei ha ko lautolu ko e tau fanau fuata, kua lata agaia a lautolu ke he falu puhala, po kua lata lahi ke pihia. Ko e tau fanau fuata pulotu kua iloa e lautolu kua moli e mena nei.

¹⁶ Kua pehe e Tohi Tapu: “Kua tiaki he tagata goagoa e fakaakoaga he hana matua tane; ka ko ia kua omaoma ke he akonakiaga kua loto matala ni a ia.” (Tau Fakatai 15:5) Kua iloa lahi e tautolu mai he tohiaga tapu nei. Ko e tuga e pehe kua lata ke age e akonakiaga. Ko e tama fuata kua nakai maeke ia ia ke “omaoma ke he akonakiaga” kaeke ke nakai age. Kua age e Iehova e kotofaaga he foaki e akonakiaga ke he tau matua, ka e pauaki ke he matua tane. Ka e taha e mena, ko e kotofaaga ke fanogonogo ke he akonakiaga ia kua lata mo e tama fuata. To fakaako fakalahi mai i ai a ia mo e to gahoa e tau hepehepe ka taute kaeke ke logona e akonakiaga iloilo he hana matua tane mo e matua fifine. (Tau Fakatai 1:8) Kua pehe e Tohi Tapu: “To ha i ai e mā mo e nofogati kia ia kua tiaki e tau mena ne fakaako atu ai; ka ko ia kua omaoma ke he akonakiaga, to lilifu ni a ia.”​​—Tau Fakatai 13:18.

17. Ko e heigoa e lagotatai ne manako e tau matua ke foli ki ai he magaaho ka tuku age e akonaki?

¹⁷ Ko e magaaho ka akonaki ai e tau fanau fuata, kua lata e tau matua ke lagotatai. Kua lata a lautolu ke tiaki e kaka lahi neke fakahogohogomanava e tau fanau ha lautolu, neke hoko foki ke moumou e loto malolo he fanau ha lautolu. (Kolose 3:21) Ka e pete ia kua nakai manako e tau matua ke tokanoa lahi ti to noa ha lautolu a tau fanau ikiiki mai he tau fakaakoaga aoga. Ko e fakatokanoaaga lahi pihia kua eke mo mena matematekelea. Kua pehe e Tau Fakatai 29:17: “Kia akonaki e koe hau a tama tane, ti moua ai e koe e okiokihaga; to tupu ai ni e fiafia ke he hau a loto.” Ka e taha e mena, pehe e kupu 21: ‘Ko ia kua fakahelehele hana fekafekau tali mai he vaha tote hana, to eke a ia fakamui mo tama tane hana [“nakai fakaaue,” NW].’ Pete ni he tutala e kupu nei ke he fekafekau, ka e tatai agaia ni e fuafuaaga mo e ha tama tote he magafaoa.

18. Ko e mena fe ne eke ai e akonaki mo fakamoliaga, mo e ko e heigoa kua tiaki he magaaho ka tuku age he tau matua e akonakiaga tatai?

¹⁸ Ke he kupu moli, ko e akonakiaga mitaki ko e fakamoliaga he fakaalofa he matua ma e hana tama. (Heperu 12:6, 11) Kaeke ko koe ko e matua, kua iloa e koe kua uka lahi ke tatai tumau e puhala he akonakiaga mitaki. Ko e eke noa ni ke mafola, liga mukamuka ke fakaata e tama fuata kafilo ke taute e tau mena ne loto a ia ki ai. Ke lata mo e vaha loa mogoia, ko e matua ne mui ke he fakaakoaga fakamui e, to moua e totogi mo e magafaoa kua fakatokanoa.​​—Tau Fakatai 29:15; Kalatia 6:9.

GAHUA MO E FEFEUA

19, 20. Maeke fefe he tau matua ke taute fakapulotu e tau mena he fakafiafia tino ma e tau fanau fuata ha lautolu?

¹⁹ Ko e tau vaha fakamua na fa mahani e fanau ke amanaki ke lagomatai e kaina po ke faama. Ko e vaha nei kua tokologa e tau fanau fuata ne loga e tau magaaho tokanoa nakai fai leoleoaga. Ke fakapuke e magaaho ia, kua kitia he lalolagi fakafua koloa ke foaki e tau koloa ke fakafiafia aki ha lautolu a tau magaaho fiafia. Lafi atu ke he mena nei e vala kua tuku fakatote he lalolagi e uho ke he tau tutuaga mahani mitaki he Tohi Tapu, ti ha ha ia koe e fuafuaaga lata tonu he matematekelea ka moua.

²⁰ Ko e mena ia, ko e matua fakafili tonu kua taofi e hako ke taute e tau fifiliaga ke he fakafiafia tino. Aua neke nimo, mogoia, na lahi fakahaga e tama fuata. He tau tau takitaha, ko e tama tane po ke tama fifine kua mahani ke amaamanaki ke taute tuga e tagata lahi. Ko e mena ia, ko e pulotu ni he matua ke fakaata fakalahi e fifiliaga he fakafiafia tino ka motua fakahaga e tama fuata​—ko e fano ni e tau fifiliaga nei ke tupu atu fakahaga ke he motua fakaagaga. Ke he falu a magaaho, kua taute he tama fuata e tau fifiliaga nakai pulotu ke he tau leo kofe, tau kapitiga, mo e falu foki. Kaeke ke tupu ha mena pihia, kua lata ni ke fakatutala mo e tama fuata ke maeke ke taute e tau fifiliaga mitaki he vaha i mua.

21. Maeke fefe he fakaaoga fakamitaki e tau magaaho he fakafiafia tino ke puipui aki e tama fuata?

²¹ Lahi fefe e magaaho kua lata ke fakatokatoka ma e fakafiafia tino? Ke he falu a motu ne takitaki e tau fanau fuata ke talitonu kua lata a lautolu ke matutaki fakahaga e fakafiafia tino. Ko e mena ia, liga kua fakatokatoka he fuata mui e fakaholoaga ke maeke ia ia ke fano he taha “magaaho fakafiafia tino” ke he taha. Ka e toka ni e mena ia ke he tau matua ke fakahoko e fakaakoaga, kua lata foki e magaaho ia ke fakaaoga ke he falu a mena, tuga ke he magafaoa, fakaakoaga fakatagata, lafi atu ke he tau tagata motua fakaagaga, tau feleveiaaga Kerisiano, mo e tau gahua he magafaoa. To taofi he mena nei e “tau mena fakafiafia” neke looa mai ki fafo e Kupu he Atua.​—Luka 8:11-15.

22. Fakalataha mo e heigoa e fakafiafia tino kua lata ke lagotatai ke he moui he tama fuata?

²² Ne pehe e Patuiki ko Solomona: “Kua iloa e au nakai fai mena kua mitaki kia lautolu, ka kia olioli e tau tagata, mo e eke e tau mena mitaki he momoui ai a lautolu. Hanai foki, kia takitaha e tagata mo e kai, mo e inu, mo e fiafia ai ke he tau mena mitaki he hana tau gahua oti; ko e mena kua foaki mai he Atua ia.” (Fakamatalaaga 3:12, 13) E, ko e olioli ko e vala he moui lagotatai. Ka e ko e gahua uka lahi. Tokologa e tau fanau fuata he vaha nei ne nakai iloa e makona ne moua mai he uka e gahua po ke logona e fakalilifu fakatagata ne moua mai he fehagai mo e mena vihi mo e taute ke mitaki. Ko e falu kua nakai age ha magaaho ke fakalaulahi e lotomatala po ke fakafua aki e tau mena ke lagomatai aki e lautolu ha lautolu a moui he tau magaaho fakamui. Ko e paleko moli a nei ma e matua. Kua kikite fakamitaki nakai a koe ke moua he tama tote hau e taha magaaho pihia? Kaeke ke kautu a koe he fakaako e tama fuata hau ke fakauho mo e olioli foki ke he uka he gahua, to fakalaulahi he tama tane po ke tama fifine e tuaga tino malolo ka ta mai e tau mena aoga ke he vaha he moui.

MAI HE TAMA FUATA KE HE TAGATA LAHI

23. Fakamalolo fefe he tau matua ha lautolu a tau fanau fuata?

²³ Pete ni he fai mena vihi a koe mo e tama fuata hau, kua taofi moli agaia ni e Tohiaga Tapu: “Nakai tuai oti e fakaalofa.” (1 Korinito 13:8) Ua tiaki ke fakakite e fakaalofa ia ne logona e koe mo e nakai fakauaua. Huhu hifo ki a koe, ‘Kua nava nakai au ke he haku a tau tama takitaha ha kua maeke ia lautolu ke taute ha lautolu a tau mena vihi po ke kautu mai he tau mena tupetupe? Kua taofi nakai e au ha magaaho ke tala age e fakaalofa mo e fakaaue ke he haku a fanau, neke mole e tau magaaho ia?’ Pete ni ko e tau fehalakaki he falu a magaaho, ka e kaeke ke logona moli he tau fanau fuata e fakaalofa hau ki a lautolu, kua fa mahani lahi ke liuaki e lautolu e fakaalofa ia.

24. Ko e heigoa e matapatu fakaakoaga faka-Tohiaga Tapu ne taofi moli agaia ke eke mo fakatufono mua ue atu he feakiaga he fanau, ka ko e heigoa kua lata ke toka he tau loto?

²⁴ Moli lahi, ha kua tutupu e fanau ke eke mo tau tagata lalahi, to maeke ia lautolu ke taute e tau fifiliaga mamafa ma lautolu ni. Ke he falu a mena pihia kua nakai manako e tau matua ke he tau fifiliaga pihia. Ka e kua ka manatu ha laua a tama ke nakai tutaki e fekafekau ke he Atua ko Iehova? Na fa tupu pihia e mena nei. Ko e falu he tau tama agaga foki a Iehova ne tiaki hana fakatonuaga mo e totoko a lautolu. (Kenese 6:2; Iuta 6) Ko e fanau nakai ko e tau komopiuta, ne maeke ke tuku e fakaholoaga ki loto ti gahua mai e tau mena ne manako a tautolu ki ai. Ko lautolu ko e tau mena momoui mo e ha ha i ai e tau manamanatuaga ataina, mo e aoga ki a Iehova ke he tau fifiliaga ha lautolu ne taute. Pete ia, ko e Tau Fakatai 22:6 kua taofi moli agaia ke eke mo fakatufono ma e tau tagata oti: “Kia fakaako a e tama ke lata mo e hana puhala; ka hoko foki ke he vaha ke motua ai a ia, nakai ni fano kehe ai a ia.”

25. Ko e heigoa e puhala mua atu he mitaki ma e tau matua ke fakakite e fakaaue ki a Iehova ma e monuina he kotofaaga fakamatua?

²⁵ Ti ko e magaaho nei, kia fakakite fakaloga e fakaalofa ke he fanau ha mutolu. Kia eketaha ke muitua ke he tau matapatu fakaakoaga he Tohi Tapu he feaki ia lautolu. Kia fakatoka e fakafifitakiaga mitaki he puhala mahani Atua. Ko e mena haia ke tuku age ai e mutolu ke he fanau ha mutolu e magaaho mitaki lahi ke tutupu hake ke eke mo tau tagata lalahi kua aoga, mo e matakutaku Atua. Ko e puhala kua mua atu hanei he mitaki ma e tau matua ke fakakite e fakaaue ki a Iehova ma e monuina he kotofaaga fakamatua.