Ako Mai he Tau Hehē he Tau Isaraela
NE ILOA he tau Isaraela e mena ne amanaki a Iehova mai ia lautolu he huhū atu a lautolu ke he Motu he Maveheaga. Puhala ia Mose, ne poaki e Atua: “Ti vega e mutolu ki mua ia mutolu a lautolu oti kua nonofo ke he motu, ti moumou e mutolu ha lautolu a tau fakatino oti kana; ti moumou foki e mutolu ha lautolu a tau tupua lapatoa oti ni; ko e ha lautolu a tau mena tokoluga oti kia moumou fakaoti ni e mutolu.”—Nume. 33:52.
Nakai lata e tau tagata ha Isaraela ke taute e maveheaga mo e tau tagata ne nonofo he motu, po ke mau mo lautolu. (Teu. 7:2, 3) Ne hataki mooli ke he tau tagata fifili he Atua: “A koe ni, neke eke e koe e maveheaga mo e tau tagata kua nonofo [ke] he motu ko e fano ne fai a koe ki ai, neke eke ai mo hele kia koe.” (Esoto 34:12) Ka kua liuliu e tau Isaraela ke he Atua ti hele ai. Ko e heigoa ne takitaki atu ke he hehē ha lautolu? Ko e heigoa e tau fakaakoaga hataki ka ako e tautolu mai he tau mena ne tutupu ki a lautolu?—1 Kori. 10:11.
Mai he Lafiaga ke he Tapuaki Tupua
He moua e Motu he Maveheaga, ne fitā e kautū e tau Isaraela ke he tau tagata ne nonofo he motu. Ka kua kaumahala e fanau a Isaraela ke omaoma katoatoa ke he tau poakiaga he Atua. Ne nakai vega e lautolu e tau fī. (Fakafili 1:1–2:10) Kehe ai, ne kamata nonofo e tau Isaraela ke he vahāloto he “fitu . . . e motu” ne ha ha i ai, ne feleveia tumau mo e tau tagata he tau motu ia ati takitaki atu ke kapitiga mo lautolu. (Teu. 7:1) Ne lauia fēfē e tau Isaraela ha ko e mena nei? Ne talahau he Tohi Tapu: “Ti faihoana ai a lautolu ke he tau tama fifine ha lautolu; ti age e lautolu ha lautolu a tau tama fifine ke eke mo tau hoana he tau tama tane ha lautolu, ti fekafekau ai a lautolu ke he tau atua ha lautolu. Ti mahani kelea e fanau a Isaraela ki mua a Iehova; ti nimo ia lautolu a Iehova ha lautolu a Atua, ka e fekafekau ai a lautolu kia Paala mo Asaira.” (Fakafili 3:5-7) Ma e tau tagata ha Isaraela, ko e lafiaga mo e tau tagata he motu ne takitaki atu ke femauaki mo e tapuaki tupua. He mole e femauaki, ne tote fakahaga e liga ke vega kehe he tau Isaraela e tau tagata pouliuli mai he motu. Ne fakakelea e tapuakiaga mooli, ti kamata e tau Isaraela ke fekafekau ke he tau atua fakavai.
Ko e tau kapitiga ia ha lautolu, ko lautolu ne nonofo he Motu he Maveheaga kua mua atu e hagahaga kelea fakaagaaga ke he tau Isaraela ka fakatatai ke he magaaho fakamua ne matafī ki a lautolu. Manamanatu ke he taha puhala foki ne liga fakahehē ai fakalotu.
Mai he Gahua Fonua ke he Tapuaki Paala
He huhū atu ke he Motu he Maveheaga, ne oti e nomaea he fanau Isaraela ti tokologa ne eke mo tau tagata gahua fonua. Ko e tau puhala gahua fonua ha lautolu ne fakaaoga kua liga tatai mo e tau puhala he tau tagata ne gahua mua he kelekele ia. Maaliali ai, ko e hikiaga nei ne nakai ko e fifitaki ni ke he tau puhala gahua fonua he tau Kanana. He lafi mo e tau tagata he motu ne kua takitaki foki e tau Isaraela ke talia e tau tapuakiaga ha lautolu ne fakapiki ke he gahua fonua.
Ne tapuaki e tau Kanana ke he loga e tau Paala—ko e tau atua ne amanaki ke fakatalumelie e kelekele. Lafi ke he gahua he kelekele mo e helehele mai e tau fua, ne fakahiku e tau Isaraela ke fakalataha ke he fakalilifuaga he tau atua Kanana he pehē ko lautolu ne foaki fakaloga mai. Tokologa mogoia i Isaraela ne fakatupua ke tapuaki ki a Iehova, ka kua hufia katoatoa a lautolu he tiaki taofiaga.
Hatakiaga Malolō ma Tautolu he Vahā Nei
Ne liga nakai amanaki e tau Isaraela ke putoia ke he tapuaki Paala mo e tau mena fakalialia ne lafi ki ai he magaaho ne feleveia fakamua a lautolu mo e tau tagata he Motu he Maveheaga. Ka ko e tau lafiaga ha lautolu ati takitaki a lautolu ke he mena tonu ia. To nakai kia amanaki foki a tautolu ke he tau lauiaaga hagahaga kelea pihia kaeke ke lafi mo lautolu ne liga fakakapitiga ka e nakai talia e tau taofiaga, tau mena kua aoga, mo e tau matapatu fakaakoaga faka-Kerisiano? Mooli, liga fai lafiaga ne kua lata he matakavi ne gahua ai, he aoga, po ke he kaina foki ha tautolu. Pete ia, kia eke e mena ne tupu ke he tau Isaraela mo hatakiaga ki a tautolu, ko e kumi lafiaga pihia ka fakatupu e lekua. Kua talahau he Tohi Tapu e mena mooli nei: “Ko e feoaki mo lautolu kua mahani kelea kua kelea ai e tau mahani mitaki.”—1 Kori. 15:33.
He vahā nei, ne loga e paleko kua fehagai a tautolu ki ai ne tuga he fehagai mo e tau Isaraela. Kua loga foki e tau atua he vahā nei. Putoia ai e tupe, tau tagata fakafiafia, tau tagata sipote, tau fakatokaaga fakapolitika, falu takitaki lotu, mo e tau tagata foki he magafaoa. Kua maeke e taha he tau mena nei ke eke mo matapatu he moui ha tautolu. Ko e atihake e kapitiga tata mo lautolu ne nakai fakaalofa ki a Iehova ka takitaki a tautolu ke matematekelea fakaagaaga.
Ko e muitui e kelea he mahani fakataane mo e fifine ko e vala lahi he tapuaki Paala ne futiaki mo e tataki e tokologa he tau Isaraela. Ko e tau matahele pihia agaia ni ne kaumahala ai e tau tagata he Atua. Ma e fakatai, ko e peehi lagataha ni he mouse he komopiuta he nofo tokotaha e tagata he kaina haana ka liga takitaki e tagata fia iloa mena po ke tagata fakahanoa ke fakakelea e manamanatuaga mitaki haana. Ko e momoko ha ia kaeke ke hele e Kerisiano he tau fakatino telefua he Internet!
‘Fiafia a Lautolu kua Omaoma ke he Hana Tau Talahau’
Ko e fifiliaga ke omaoma ki a Iehova po ke nakai omaoma he fifili e tau lafiaga ha tautolu ko e mena fakatagata. (Teu. 30:19, 20) Ati lata ia tautolu ke hūhū ki a tautolu ni: ‘Ko hai ne lafi au ki ai he taute e tau mena fakafiafia? Ko e heigoa e tau mena kua aoga ki a lautolu mo e tau mahani ha lautolu? Tapuaki nakai a lautolu ki a Iehova? He lafi mo lautolu to fakamalolō nakai au ke eke mo Kerisiano mitaki?’
Ne lologo he salamo: ‘Fiafia a lautolu kua hakohako ha lautolu a puhala, ko lautolu kua o fano ke he fakatufono ha Iehova. Fiafia a lautolu kua omaoma ke he hana tau talahau, ko lautolu kua kumi kia ia mo e loto katoa.’ (Sala. 119:1, 2) Mooli, ‘fiafia a lautolu oti kua matakutaku kia Iehova, ko lautolu ne o ke he hana tau puhala.’ (Sala. 128:1) Ka hoko e magaaho ke fifili e tau lafiaga ha tautolu, kia ako mai a tautolu he tau hehē he tau Isaraela ti omaoma katoatoa ki a Iehova.—Fakatai 13:20.
[Fakatino he lau 26]
Kua maeke e lafi mo lautolu ne nakai fakaalofa ki a Iehova ke takitaki a tautolu ke tapuaki tupua