Lata Nakai ia Tautolu ke Fakamanatu e Tau Aho Okioki?

KUA nakai puna mai he Tohi Tapu e tau aho okioki mahuiga ne fakamanatu he tau lotu mo e he tau motu ke he tau faahi loga he lalolagi he vahā nei. Ti ko e heigoa e punaaga he tau fakamanatuaga pihia? Ka maeke a koe ke kumikumi ke he fale toka tohi, to mailoga e koe e tau mena ne talahau he tau tohi kumikumi hagaao ke he tau aho okioki ne mahuiga he kavi ne nofo ai a koe. Mailoga falu a fakataiaga.

Isitā. “Kua nakai fai mena ne talahau ke he fakamanatuaga he galue he Isitā i loto he Maveheaga Foou,” he talahau he The Encyclopædia Britannica. Kamata fēfē e Isitā? Kua puna mai he tapuakiaga pouliuli. Pete kua lata e aho okioki nei ke fakamanatu e liu tu mai ha Iesu, ko e tau aga fakamotu ne matutaki ke he vahā Isitā kua nakai faka-Kerisiano. Ke tuga anei, hagaao ke he “lapiti he Isitā,” ne pehē he The Catholic Encyclopedia: “Ko e lapiti ko e fakataiaga pouliuli ti kua eke tumau mo fakamailoga he fanafanau loga.”

Tau Fakamanatuaga he Tau Foou. Ko e aho mo e tau aga fakamotu ne hagaao ke he tau fakamanatuaga he Tau Foou kua kehe mai he taha motu ke he taha motu. Hagaao ke he punaaga he fakamanatuaga nei, ne talahau he The World Book Encyclopedia: “Ne fakatū he pule Roma ko Julius Caesar a Ianuari 1 mo Aho he Tau Foou he 46 V.N. Ti fakatapu he tau Roma e aho nei ki a Janus, ko e Atua he tau pā hala, tau gutuhala, mo e he tau kamataaga. Ko e mahina Ianuari kua ui aki a Janus, ne ua e fofoga​—taha ne ono ki mua mo e taha ne ono ki tua.” Ti ko e tau fakamanatuaga he Tau Foou kua puna mai he tau aga fakamotu pouliuli.

Halloween. Ne pehē he The Encyclopedia Americana: “Ko e tau puhala ke he tau aga fakamotu ne matutaki mo e Halloween kua moua ke he fakamanatuaga Druid [matakau ekepoa Celtic i tuai] he tau vahā nakaila Kerisiano. Ne taute he tau Celt e tau galue ma e tau atua lalahi ne tokoua​—ko e atua he laā mo e atua he tau tagata mamate . . . ne taute e galue ia Novema 1, ko e kamataaga he Tau Foou he tau Celt. Ko e galue he tau tagata mamate kua fakahū fakahaga ke he tau gahua faka-Kerisiano.”

Falu Aho Okioki. Kua nakai maeke ke fakatutala ke he tau fakamanatuaga oti ne fakahoko ke he lalolagi katoa. Ka e, ko e tau aho okioki ne fakatokoluga e tau tagata mo e tau fakatokatokaaga he tagata kua nakai talia e Iehova. (Ieremia 17:5-7; Gahua 10:25, 26) Manatu foki, ko e punaaga he tau fakamanatuaga fakalotu kua fifili ai ko e fiafia po ke nakai fiafia e Atua ki ai. (Isaia 52:11; Fakakiteaga 18:4) Ko e tau matapatu fakaakoaga he Tohi Tapu ne totoku he Veveheaga 16 he tohi nei ka lagomatai a koe ke mailoga e puhala ne kitia he Atua e fakalataha ke he tau aho okioki fakamotu nei ne nakai fakavē fakalotu.