Lagomatai Nakai a Koe ke he Hokotakiaga Hako?
1 Loga e tau talahauaga he Tohi Tapu ne putoia e tau numera hakotika, kua lagomatai ke fakakite e fakatino maaliali ke he mena ne tupu. Ma e fakatai, ne 300 ni e tagata he kau ha Kiteona ne fakakaumahala e kemuaga a Mitiana. (Fakafili 7:7) Ne tamate he agelu ha Iehova 185,000 he tau kautau Asuria. (2 Patu. 19:35) He Penetekoso 33 V.N., kavi ke he 3,000 ne papatiso, mo e nakai leva e mole ti holo hake e numera ke kavi ke he 5,000 he tau tagata ne tua. (Gahua 2:41; 4:4) Kua maaliali ai mai he tau talahauaga nai ne fakamakamaka e tau fekafekau he Atua i tuai ke tohi fakahako mo e ke katoatoa e tau fakamauaga ia.
2 Ko e fakatokaaga ha Iehova he vaha nai kua fakaako mai ki a tautolu ke taute e tau hokotaki ma e fekafekauaga ha tautolu ke he fonua he tau mahina takitaha. Ko e kaufakalataha fakamoli ha tautolu mo e fakatokaaga na ka lagomatai ke lauia mitaki e levekiaga ke he gahua fakamatala. Liga to fakakite mai he tau hokotaki e tau fahi he fekafekauaga kua lata ke fai kitekiteaga ki ai po kua manako tagata fakamatala e falu matakavi he fonua. Ki loto he fakapotopotoaga, ko e tau hokotaki ma e gahua he fonua kua lagomatai e tau motua ke kitia a lautolu kua maeke ke fakalahi ha lautolu a fekafekauaga mo e pihia foki a lautolu kua liga lata ke lagomatai. Ti eke foki e tau hokotaki he tupu tolomaki he gahua fakamatala he Kautu mo fakamaloloaga ke he fakamatakainaga Kerisiano katoa. Kua taute nakai e koe hau a vala ke lagomatai ke he tauteaga he hokotakiaga hako?
3 Matagahua Hau Fakatagata: He hoko ke he matahiku he mahina, fa uka nakai a koe ke manatu ko e heigoa hau ne taute he fekafekauaga? Kaeke kua pihia, ko e ha ne nakai fakamau ai e tau gahua hau he tau magaaho oti ka fakalataha a koe ke he fekafekauaga he fonua? Falu kua fakaaoga e kalena po ke pepa fakamau fakatagata. Ko e falu kua uta mo lautolu ke he fekafekauaga e lautohi hokotaki ne nakai la fakapuke ia. He matahiku he mahina, fakamafiti ke tuku age hau a hokotaki ke he leveki fakaakoaga tohi. Kaeke kua nimo ke tuku age e hokotaki hau, fakailoa fakamafiti atu ke he hau a leveki fakaakoaga tohi ka e ua fakatali ke fina atu a ia ki a koe. He taute mo e manamanatuaga fakamoli e hokotaki he gahua hau kua fakakite e fakalilifu ma e fakaholoaga ha Iehova mo e manamanatu fakaalofa ke he tau matakainaga tane ne kotofa ke oko mo e lafilafi fakalataha e tau numera he tau hokotaki oti.—Luka 16:10.
4 Matagahua he Leveki Fakaakoaga Tohi: Ha ko e leveki mamoe mataala mo e manamanatu ke he falu, kua fakakite he leveki fakaakoaga tohi e fiafia ke he gahua he matakau hana he mahina. (Fakatai 27:23) Iloa mitaki e ia e tau tagata fakailoa takitaha po kua fakalataha tumau, taute fai kakano, mo e fiafia nakai ke he fekafekauaga ti mafiti ke foaki e lagomatai kaeke fai kua nakai la fina atu ia he taha e mahina ke he fekafekauaga. Ko e kupu fakamafana, ko e manatu fakaohooho, po ke uiina ke fakatauo mo ia ke he gahua he fonua ha ko e lahi he tau magaaho ko e mena ia ni kua lata ke lagomatai aki.
5 Ke he matahiku he mahina, ko e leveki fakaakoaga tohi ka fakakia ki a lautolu oti he matakau kua mumuitua nakai ke taute ha lautolu a matagahua ke hokotaki ha lautolu a gahua, ke maeke he tohikupu ke ta atu e hokotakiaga hako ma e fakapotopotoaga ke he ofisa he la matapatu ato hoko e aho ono he mahina fou. He gutu atu ke he matahiku he mahina, to liga lagomatai ki a ia ke fakamanatu ke he matakau mo e ke fai lautohi hokotaki ka toka he matakavi fakaako tohi ha lautolu. Kaeke fai ne fa loto nimo ke hokotaki ha lautolu a gahua, maeke ia ia ke foaki e tau fakamanatu mo e fakamafanaaga kua lata.
6 Ko e tuku age fakamafiti he tau hokotaki ha tautolu ka lagomatai ke taute e hokotakiaga ne fakakite fakahako e mena ne tupu ke he fonua. To taute nakai e koe e vala hau he taute fakamafiti e hokotaki hau he tau mahina takitaha?