Maeke Nakai a Koe ke Fakalataha ke he Gahua he Fonua he Tau Aho Tapu?
1. Ko e heigoa ha tautolu ka fakaako mai he tau gahua ha Paulo mo e haana matakau i Filipi?
1 Ko e Sapati, ko e aho okioki he laulahi he tau Iutaia i Filipi. Ne aahi atu a Paulo mo e matakau haana ke he maaga he taha he tau fenoga misionare ha lautolu. Nakai fai tagata ne tokutoku kelea a lautolu ha ko e okioki kua lata pauaki mai he fekafekauaga he aho ia foki. Ka e iloa e lautolu kua fakapotopoto e tau Iutaia i fafo he maaga ke liogi, ti fakaaoga fakamitaki e lautolu e magaaho ke fakamatala ki a lautolu. Ko e fiafia ha ia ha Paulo mo e haana matakau he magaaho ne fanogonogo ai a Litia ti papatiso e magafaoa katoa haana! (Gahua 16:13-15) Ha kua tokologa he vahā nei kua okioki he Aho Tapu, ko e ha ne nakai fakaaoga ai e taha vala he aho nei ke fakamatala ki a lautolu?
2. Ko e heigoa e tau paleko kua kautū e tau tagata ha Iehova ki ai ke maeke ke fakamatala he Aho Tapu mo e nakai fakatauhele?
2 Ko e Taufetului ke Fakamatala he Aho Tapu: He 1927, ne fakamafana e tau tagata ha Iehova ke fakaaoga taha vala he tau Aho Tapu oti ke he fekafekauaga. Kua mafiti lahi e totoko ha ko e mena nei. Tokologa he Tau Faahi Kaufakalataha kua tapaki ha kua moumou e tau matafakatufono Sapati he Aho Tapu, tauhele e mafola, mo e fakafua atu ka e nakai fai tohi fakaatā. Ka e nakai mataofi e tau tagata ha Iehova. He tau atu tau he 1930, ne fakatokatoka e lautolu e “tau matakau gahua,” ti fakapotopoto mai e tau tagata fakailoa he tau fakapotopotoaga ne tata mai ke gahua e matakavi. He falu magaaho ne tapaki e tau tagata fakailoa, ka e uka e tau takitaki ke taofi ha kua tokologa lahi e tau matakainaga. Loto fakaaue mooli nakai a koe ke he tau foakiaga ne taute he tau matakainaga ia ke maeke a tautolu ke fakamatala mo e nakai fakatauhele he Aho Tapu?
3. Ko e heigoa ati mitaki e Aho Tapu ke fakalataha ke he fekafekauaga?
3 Ko e Aho Mitaki Lahi Mahaki ke Fakamatala: Tokologa e tau tagata kua nakai gahua ne ha ha i kaina he Aho Tapu. Ti fa mahani a lautolu ke okioki mitaki. Falu tagata o tapu ne liga fia tutala hagaao ke he Atua he aho nei. Ka taute e feleveiaaga ha tautolu he Aho Tapu, kua fitā a tautolu he tauteute tuga ke lata mo e fekafekauaga, ti ko e ha ne nakai fakatoka ai ke gahua he fonua ato kamata po ke ka oti e feleveiaaga? Kaeke kua lata, taute e kai māmā ke uta mo koe.
4. Ko e heigoa e olioli ka moua e tautolu kaeke ke fakaaoga e taha vala he Aho Tapu ke he fekafekauaga?
4 Ka fakaaoga e tautolu e taha vala he Aho Tapu ma e fekafekauaga, to fai magaaho agaia a tautolu ke moua e okioki kua lata. Ko e okioki ha tautolu to lagotatai mo e makona ka puna mai he gahua ke he fekafekauaga tapu. (Fakatai 19:23) Liga to logona foki e tautolu e olioli ka moua taha tagata tuga a Litia!