Veveheaga 17

Fakaako ia Nikotemo

HA HA i ai a ia ke he Paseka he 30 V.N., ne taute e Iesu e tau fakamailoga lalahi, po ke tau mana. Ko e fua, ne tokologa ne tua ki a ia. Ko Nikotemo, ko e taha mai he Saneheturini, ko e fakafiliaga tokoluga faka-Iutaia, ne fiafia mo e manako ke fakaako atu foki. Ko e mena haia ne aahi atu a ia ki a Iesu he pouli he po, liga ha ko e matakutaku ke he hana a tuaga neke moumou he falu takitaki Iutaia kaeke ke kitia a ia.

“Rapai na e,” he talahau e ia, “kua iloa e mautolu, ko e akoako a koe, ne haele mai mai he Atua; ha ko e mena nakai maeke e taha he eke e tau fakamailoga ia ne eke e koe, aua e Atua mo ia.” Ke he hana a tali, ne talaage a Iesu ki a Nikotemo, ke maeke ke hao ke he Kautu he Atua, kua lata he tagata ke “liu foki fanau.”

Ka e taha e mena, maeke fefe he tagata ke liu foki fanau? “To maeke kia ke liu foki hao ke he manava he hana matua fifine, ke fanau mai ai?” he huhu e Nikotemo.

Nakai, ne nakai pihia e kakano he liu foki fanau. “Kaeke kua nakai fanau e tagata ke he vai mo e agaga,” he fakamaama e Iesu, “ti nakai maeke ke hao a ia ke he kautu he Atua.” Ke he magaaho ne papatiso a Iesu mo e hifo mai e agaga tapu ki a ia, ko e fanau mai a ia he “vai mo e agaga.” Ko e fakailoaaga mai he lagi, “Ko e haku a Tama fakahele hanā, kua fiafia na au kia ia,” ne fakailoa he Atua kua ta mai e ia e Tama fakaagaga ne ha ha i ai e amaamanakiaga ke liu atu ke he Kautu he lagi. Ko e magaaho fakamui, he Penetekoso 33 V.N., ko lautolu foki ne papatiso to moua e agaga tapu mo e to liu fanau mai foki ko e tau fanau fakaagaga he Atua.

Ka ko e gahua he Tama fakatagata pauaki he Atua kua aoga lahi. “Ke tuga a Mose, ne ta hake ki luga e gata ke he tutakale,” he talaage e Iesu ki a Nikotemo, “kia ta hake pihia e Tama he tagata ke lata ai; kia nakai mate taha ne tua kia ia, ka kia moua e moui tukulagi.” E, ke tuga e tau Isaraela ne gagau he tau gata kona ka onoono ke he gata apa kula ti moua e fakamouiaga, ti kua lata pihia foki e tau tagata oti ke tua ke he Tama he Atua ke fakamoui mai he tuaga mate ha lautolu.

Ne peehi e tuaga fakaalofa ha Iehova ke he mena nei, ne talaage a Iesu ki a Nikotemo: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” Ti ko e mena ia, i Ierusalema he mole e ono e mahina mai he kamataaga he hana gahua fakamatala, ne fakamahino e Iesu ko ia ko e puhala ha Iehova ko e Atua ke fakahao aki e tau tagata oti.

Ne fakamaama fakalaulahi foki e Iesu ki a Nikotemo: “Ha ko e mena nakai fakafano mai he Atua hana Tama ke he lalolagi ke fakahala e lalolagi,” pehe a ia, nakai ke fakafili kelea ai, po ke fakahala ai, he moumou e tau tagata oti. Nakai, tuga ni he talahau e Iesu, ne fakafano mai a ia “kia fakamomoui e lalolagi kia ia.”

Ne fano a Nikotemo ki a Iesu mo e matakutaku ke he pouli he po. Ti kehe ai he fakaoti e Iesu e fakatutalaaga mo ia he pehe: “Ko e fakahala foki hanai, kua hoko mai e maama ke he lalolagi [ko Iesu mo e moui fakatagata mo e hana tau fakaakoaga], ka ko e tau tagata kua mua ha lautolu a manako ke he pouli he ha lautolu a manako ke he maama; ha kua kelea ha lautolu a tau mahani. Ha ko lautolu oti kua eke mena kelea, kua vihiatia e lautolu e maama; ti nakai o mai ni ke he maama, neke fakailoa ai ha lautolu a tau mahani. Ka ko ia kua eke e mahani fakamoli, kua hau ni a ia ke he maama, kia fakailoa hana tau mahani, ha kua lata ia mo e Atua.” Ioane 2:​23–​3:21; Mataio 3:16,17; Gahua 2:​1-4; Numera 21:9.

▪ Ko e heigoa ne fakalagalaga aki e aahi atu ha Nikotemo, mo e ko e ha ne fina atu a ia he po?

▪ Ko e heigoa e kakano he “liu foki fanau”?

▪ Fakatino fefe e Iesu hana kotofaaga ke he ha tautolu a fakamouiaga?

▪ Ko e heigoa e kakano he nakai hau a Iesu ke fakafili e lalolagi?