Veveheaga 41

Ko e Lotouho he Fetoko

NE NAKAI leva he mole e fakafiafia ki a ia he fale a Simona, ne kamata e Iesu e fenoga fakamatala ke ua aki i Kalilaia. Ke he fenoga fakamua hana ke he matakavi nei, ne fakalataha a ia mo e hana a tau tutaki fakamua, ko Peteru, Aneterea, Iakopo mo Ioane. Ka ko e magaaho nei ko e tau aposetolo 12, fakalataha mo e falu fifine pauaki ne fakatauo mo ia. Putoia ai a Maria Makatala, Susana, mo Ioana, ko e hoana he fekafekau he Patuiki ko Herota.

Ha kua lahi e gahua fakamatala ha Iesu ti lahi foki e totoko hagaao ia ke he hana tau gahua. Ko e tagata tane hu temoni, ne matapouli, mo e kuhukuhu ne ta mai ai ki a Iesu. Ko e magaaho ne fakamalolo e Iesu a ia, ti tokanoa a ia mai he pule he tau temoni mo e maeke ke vagahau mo e kitia, ne ofomate e tau moto tagata. Ne kamata a lautolu ke pehe: “Ka e nakai kia ko e Tama a Tavita hanai?”

Ne agaagai tokologa mai e tau moto tagata ke he fale ne nofo ai a Iesu ti nakai maeke ia ia mo e hana tau tutaki ke kai. Ke lafi atu ki a lautolu ne manamanatu liga ko ia ni ko e “Tama a Tavita” ne mavehe tuai mai, ha i ai e tau tohikupu mo e tau Farasaio ne o mai mamao i Ierusalema ke ekefakakelea ia ia. Ko e magaaho ne logona he magafaoa ha Iesu e lutu hagaao ia ki a Iesu, ne o mai a lautolu ke tapaki a ia. Ko e heigoa e kakano?

Pihia foki ni e tau lafu ha Iesu ne nakai la talitonu ko ia ko e Tama he Atua. Ko e taha mena foki, ko e go mo e taufetoko he tau tagata ne fakalagalaga e ia kua kehe mamao ki a lautolu ha ko Iesu ne iloa e lautolu he tupu hake i Nasareta. Ti ko e mena ia, ne talitonu a lautolu ko e fai mena kua hehe lahi mo e manamanatuaga ha Iesu. “Kua vikoia a ia,” he talahau e lautolu, mo e manako a lautolu ke tapaki a ia mo e uta kehe a ia.

Ka e mahino mitaki e fakamoliaga ha kua fakamalolo e Iesu e tagata ne hu temoni. Ne iloa he tau tohikupu mo e tau Farasaio to nakai fakatikai e lautolu e moli he mena nei. Ti ke ekefakakelea aki a Iesu ne tala age a lautolu ke he tau tagata: “Aua a Pelesepulo e iki he tau temoni, ti nakai vega he tagata na e tau temoni.”

Ne fioia e Iesu ha lautolu a tau manatu, ti ui e ia e tau tohikupu mo e tau Farasaio ki a ia mo e pehe: “Ko e tau kautu oti kua feveheaki, takitaha mo e fakaoti ni; ko e tau māga oti, po ke tau magafaoa kua feveheaki, to takitaha mo e nakai tumau ia. Kaeke foki kua vega e Satani, a Satani, kua feveheaki tuai e ia a ia to tumau fefe foki hana kautu?”

Ko e fakakakano moumou lahi a nei! Ha kua talahau he tau Farasaio ko e ha lautolu a tau tagata na maeke ke vega e tau temoni, ati huhu foki a Iesu: “Kaeke foki ko Pelesepulo, kua vega ai e au e tau temoni ko hai kia kua vega ai e tau temoni he tau fanau ha mutolu?” Ko e kakano, ko e hokotaki ha lautolu ki a Iesu kua lata foki ni mo lautolu tuga ni ki a ia. Ne akonaki e Iesu mogoia: “Kaeke foki ko e agaga he Atua kua vega ai e au e tau temoni kua hoko mai tuai kia mutolu e kautu he Atua.”

Ke fakamaama aki e hana vega he tau temoni ko e fakamoliaga he hana malolo ki a Satani, ne pehe a Iesu: “Ke maeke fefe taha ke hu atu ke he fale he tagata toa, mo e fofo hana tau mena; ato lili fakamua e tagata toa, to fofo ai hana a fale? Ko ia kua nakai kau mo au, kua kau kehe a ia ia au; ko ia nakai tanaki fakalataha mo au kua fakatafola kehe e ia.” Ne kitia maaliali e totoko he tau Farasaio ki a Iesu, he fakakite ko e tau kau gahua ha Satani a lautolu. Ne fakatafola kehe e lautolu e tau Isaraela ia ia.

Ti ko e mena ia, ne akonaki e Iesu e tau tagata totoko nei ha Satani “ko e kupu kelea ke he agaga, nakai fakamagalo ia ke he tau tagata.” Ne fakamaama e ia: “Ka fai kupu taha ke he Tama he tagata, ti fakamagalo a ia; ka ko ia ne fai kupu ke he agaga tapu, nakai fakamagalo a ia ke he mouiaga nai, po ke mouiaga ne tatali.” Ne taute he tau tohikupu mo e tau Farasaio e agahala lahi ne nakai fai fakamagaloaga he ekefakakelea ko e mai ia Satani e mana gahuahua he agaga tapu he Atua. Mataio 12:​22-32; Mareko 3:19-30; Luka 8:​1-3; Ioane 7:5.

▪ Kehe fefe e fenoga ke ua aki ha Iesu ki Kalilaia mai he fenoga fakamua?

▪ Ko e ha e magafaoa ha Iesu ne lali ke tapaki a ia?

▪ Fefe e lali he tau Farasaio ke ekefakakelea e tau mana ha Iesu, ka e totoko fefe e Iesu a lautolu?

▪ Ko e heigoa e hala he tau Farasaio, mo e ko e ha?