Veveheaga 42

Akonaki e Iesu e Tau Farasaio

KAEKE ko e malolo ha Satani ne vega e ia e tau temoni, he totoko e Iesu, ti feveheaki ne Satani a ia. “Kia eke e mutolu e akau ke mitaki, kia mitaki foki mo e hana tau fua,” he matutaki e ia, “po ke eke e mutolu e akau ke kelea, kia kelea foki mo e hana tau fua; ha ko e hana tau fua kua mailoga ai e akau.”

Ko e goagoa ke hokotaki e fua mitaki he vega e tau temoni ha ko e fekafekauaga ha Iesu ki a Satani. Kaeke kua mitaki e fua, nakai maeke ke popo e akau. Ka ko e taha fahi, ko e fua popo he tau Farasaio ha ko e tau hokotaki nakai fai fakaveaga mo e mena goagoa ia ki a Iesu, ko e fakamoliaga he popo ha lautolu. “Ko e tau fanau he tau gata gagau na e,” he talahau e Iesu, “ko mutolu ne mahani kelea ke maeke fefe ia mutolu ke vagahau ke he tau mena mitaki? Ha ko e loga he tau mena he loto ke vagahau mai ai e gutu.”

Ha kua fakakite he tau kupu ha tautolu e tuaga he ha tautolu a tau loto, ko e tau mena ne talahau e tautolu ke eke ia mo fakaveaga he fakafiliaga. “Ka e tala atu e au kia mutolu,” he talahau e Iesu, “ko e tau kupu fakateaga oti ke vagahau he tau tagata, to fakamatala atu ai e lautolu ke he Aho Fakafili. Ha ko e hau a tau kupu ke talahau ai a koe ko e tututonu; ko e hau a tau kupu foki ke fakahala aki a koe.”

Pete ni e loga e tau gahua lalahi ha Iesu, ne ole e tau tohikupu mo e tau Farasaio: “Ko e akoako na e, kua fia kitia e mautolu taha fakamailoga ia koe.” Pete ni he nakai kitia mata he tau tagata nei mai i Ierusalema e hana tau mana, ka e ha ha i ai e tau fakamoliaga ne nakai fai fetoko ne kitia mata e tau mena ia. Ti tala age a Iesu ke he tau takitaki lotu Iutaia: “Ko e hau kelea mo e faivao kua kumi mai taha fakamailoga; ka e nakai ta atu ha fakamailoga ki ai, ka ko e fakamailoga hokoia ni a Iona ko e perofeta.”

Ko e fakamaamaaga ke he hana kakano, ne matutaki a Iesu: “Ka e tuga a Iona ne nofo ke he manava he ika lahi ke he tolu a aho mo e tolu a po, to pihia foki e Tama he tagata ke nofo ai i lalo he kelekele ke he tolu a aho mo e tolu a po.” Mole e folo he ika, ne liu mai a Iona ki fafo tuga e liu tu mai, ti kua talahau tuai e Iesu, to hoko e mate ki a ia ti liu ke moui mai he aho ke tolu aki. Ka e taha e mena, ko e tau takitaki lotu Iutaia, pete ni he liu tu mai a Iesu ke he magaaho fakahiku, ne tiaki e “fakamailoga hokoia ni a Iona.”

Ti ko e mena haia ne vagahau a Iesu ko e tau tagata Nineva ne tokihala ha ko e fakamatalaaga ha Iona to liliu ke tutu mai he fakafiliaga ke fakahala e tau Iutaia ne tiaki a Iesu. Ko e mena taha ia ni, ne fakatatai e ia mo e patuiki fifine ha Sihipa, ne hau he taha matapotu he lalolagi ke fanogonogo ke he pulotu ha Solomona mo e nava ke he tau mena ne kitia mo e logona e ia. “Kitiala,” he mailoga e Iesu, “ha hinai taha kua mua kia Solomona.”

Ne foaki e Iesu e fakatai ke he tagata ne hau ai e agaga kelea. Ka e taha e mena, ko e tagata ne nakai fakapuke aki taha mena mitaki, ti liu a ia huhu ai e tau agaga kelea ne tokofitu. “Ke eke pihia foki ke he hau kelea nai,” he talahau e Iesu. Ko e motu ha Isaraela ne kua fakamea mo e liu tokihala​—tuga e fano kehe fakaku he agaga kelea. Ka ko e tiaki he motu e tau perofeta he Atua, ko e totoko pauaki ki a Keriso, ne fakakite e tuaga kelea kua mua atu ke he kamataaga.

Ke he magaaho ne vagahau a Iesu, ne hohoko mai hana a matua fifine mo e hana tau lafu mo e tutu he kaukau he moto tagata. Ti pehe mai taha: “Kitiala, kua tutu mai i fafo hau a matua fifine, mo e hau a tau matakainaga kua fia vagahau mo koe.”

“Ko hai kia hoku matua fifine? Ko hai foki haku tau matakainaga?” he huhu e Iesu. Ne fakaolo e ia hana a lima ke he tau tutaki, mo e pehe: “Kitiala, ko e hoku matua fifine, mo e hoku tau matakainaga. Ha ko ia kua eke e finagalo he haku a Matua ha he lagi, ko e haku a matakainaga a ia, mo e haku a mahakitaga, mo e haku a matua fifine.” Ko e puhala nei ne fakakite e Iesu pete ni e malolo e pipiaga fakahele ne pipi a ia ke he hana a tau magafaoa, ka e mokoina agaia ni e hana a matutakiaga mo e hana a tau tutaki. Mataio 12:​33-50; Mareko 3:​31-35; Luka 8:​19-21.

▪ Kua kaumahala fefe e tau Farasaio ke taute e “akau” mo e “fua” ke mitaki?

▪ Ko e heigoa e “fakamailoga hokoia ni a Iona,” mo e tiaki fefe e mena nei he magaaho fakamui?

▪ Tuga fefe e tagata ne hau e agaga kelea ki fafo e motu ko Isaraela he senetenari fakamua?

▪ Peehi fefe e Iesu hana a fakafetuiaga tata mo e hana a tau tutaki?