Veveheaga 48

Toka e Kaina ha Iairo mo e Liu Ahi Atu ki Nasareta

NE LAVELAVE lahi a Iesu he aho​—ko e fenoga hala tahi mai i Tekapoli, fakamalolo e fifine ne fakatafea, mo e liu fakatu mai e tama fifine ha Iairo. Ka e nakai la oti ia e aho. Ko e moli, ko e magaaho ne toka e Iesu e kaina ha Iairo, tokoua e tagata tane matapouli ne mumui he tua hana mo e tauhea fakalahi: “Ko e Tama a Tavita na e, kia fakaalofa mai a koe kia maua.”

Ha kua ui a Iesu ko e “Tama a Tavita,” ko e tau tagata nei ne talahau ha laua tua ko Iesu ko e hakeaga ke he nofoaiki a Tavita, ko e pehe a ia ko ia ko e Mesia he maveheaga. Ka e taha e mena, ko Iesu ne tuga ke nakai mailoga ha laua a tagi ke lagomatai, liga ko e kamatamata he ha laua a fakatumau. Ka e nakai oti e tauui he tau tagata tane. Ne mumui a laua ki a Iesu ke he mena ne nofo ai a ia, ti ko e magaaho ne hu a ia ki fale, ne mumui a laua ki fale.

Ne huhu a Iesu i ai: “Kua tua nakai a mua kia au ke maeke ia au e mena nai ka eke?”

“E, ko e Iki na e,” he tali atu fakamalolo e laua.

Ti, he aamo e tau mata ha laua, ne pehe a Iesu: “Kia tuga e tua ha mua, kia eke ni pihia ma mua.” Ko e magaaho ia ni ne maeke a laua ke kitia! Ne poaki fakamakamaka a Iesu ki a laua: “A mua, neke fakailoa atu kia taha.” Ka kua puke ke he fiafia, ne tiaki e laua e poakiaga ha Iesu mo e fakapuloa ki a ia ke he tau fahi motu oti ia.

He momole laia e tau tagata nei, ti tamai he tau tagata e tagata tane hu temoni ne kua fakakuhukuhu he temoni. Ne vega kehe e Iesu e temoni, mo e ko e magaaho ia ni ne kamata e tagata ke tutala. Ne nava e tau moto tagata ke he tau mana nei, mo e pehe: “Ko e kitia la nai ha mena pihia i Isaraela.”

Ne ha ha i ai foki e tau Farasaio. Ne nakai fakatikai e lautolu e tau mana, ka ko e ha lautolu a nakai talitonu kelea ne liu a lautolu talahau ke he puna maiaga he tau gahua malolo ha Iesu, he pehe: “Ko e temoni lahi, kua vega ai e ia e tau temoni.”

Nakai leva he mole e tau mena nei, ne liu a Iesu ke he hana maga nofo i Nasareta, ka ko e magaaho nei, kua fakalataha a ia mo e hana tau tutaki. Liga ko e tau fakamua, ne ahi atu a ia ke he sunako mo e fakaako i ai. Pete ni he nava e tau tagata he magaaho fakamua ke he hana tau kupu mitaki, ne hukia a lautolu he magaaho fakamui ke he hana tau fakaakoaga mo e lali ke kelipopo a ia. Ko e mogonei, ha ko e fakaalofa hofihofi, ne lali foki a Iesu ke lagomatai hana tau katofia fakamua.

Ko e falu maga ne tolo mai e tau tagata ki a Iesu, ka e nakai pihia ke he matakavi nai. Ti ko e mena ia, ke he Sapati, ne fano a ia ke he sunako ke fakaako. Tokologa ia lautolu ia ne logona a ia ne ofomate. “Po ke moua mai fe he tagata nai e pulotu nai mo e tau mana ia?” he huhu e lautolu. “Ka e nakai kia ko e tama he tagata ta fale hanei? ka e nakai kia ko Maria e higoa he hana matua fifine, ko e hana tau matakainaga foki ko Iakopo, mo Iose, mo Simona, mo Iuta? Ka e nakai kia ha ha ia tautolu hana lafu mahakitaga oti? ka e moua mai fe he tagata nai e tau mena oti ia?”

‘Ko Iesu ko e tagata he maga tuga ni a tautolu,’ he fakakakano e lautolu. ‘Ne kitia e tautolu a ia he lahi, ti iloa foki e tautolu hana magafaoa. Maeke fefe a ia ke eke mo Mesia?’ Ti pete ni e ha ha ai e tau fakamoliaga​—hana a pulotu mo e tau mana​—ne tiaki e lautolu a ia. Ha ko e ha lautolu a mahani lahi mo ia, ti tupetupe foki hana magafaoa ia ia, ke maeke ia Iesu ke fakaoti: “Nakai noa ha perofeta mo e lilifu, ka ko e hana māga ni mo e hana a faoa, mo e hana fale kua nakai lilifu ai.”

Ko e moli, ne manamanatu a Iesu ke he nakai tua ha lautolu. Ti nakai taute e ia ha mana i ai ka ko e fakalago lima ni ke he falu a tagata gagao gahoa mo e fakamalolo a lautolu. Mataio 9:27-34; 13:54-58; Mareko 6:​1-6; Isaia 9:7.

▪ He ui a Iesu ko e “Tama a Tavita,” ko e heigoa ne fakakite he tau tagata matapouli ne talitonu a laua ki ai?

▪ Ko e heigoa e fakamaamaaga ma e tau mana ha Iesu ne kua talia ki ai he tau Farasaio?

▪ Ko e ha ne ko e fakaalofa hofihofi ha Iesu ke liu ke lagomatai a lautolu i Nasareta?

▪ Ko e heigoa e taliaaga ne moua e Iesu i Nasareta, mo e ko e ha?