Veveheaga 49

Ko e Taha Fenoga Fakamatala Foki i Kalilaia

MOLE atu e liga ua e tau tau he fakamatala fakamakutu, to liga tukutuku hifo mo e fakamama kia a Iesu mogonei? Nakai, ne fakalaulahi e ia hana tau gahua fakamatala he fakatokatoka foki e taha fenoga, ke tolu aki i Kalilaia. Ne ahiahi oti e ia e tau loto maga mo e tau magamotu he matakavi, fakaako ke he tau sunako mo e fakamatala e tala mitaki he Kautu. Ko e kitiaaga hana ke he fenoga nei ati fakamakamaka a ia ke fakalahi atu foki e gahua fakamatala.

Ko e tau mena oti ne finatu a Iesu ki ai, ne mailoga e ia e moto tagata kua lata ke fakamalolo mo e fakamafana fakaagaga. Kua tuga e tau mamoe nakai fai leveki mamoe a lautolu, kua fakamamahi mo e tiaki noa, ti fakaalofa hofihofi a ia ki a lautolu. Ne tala age a ia ke he hana tau tutaki: “Kua loga e tau saito ke helehele, ka ko e tau tagata gahua, kua tokogaogao a lautolu. Ko e mena ia, kia olelalo atu ai a mutolu ke he Iki hana e tau saito ke helehele, kia fakafano mai e ia e falu ke gahua ke he tau saito hana ke helehele.”

Ne ha ha ia Iesu e tau fakatokatokaaga. Ne poaki a ia ke he tau aposetolo 12, ne fifili e ia fakamua liga kua teitei tu tuai e tau. Ne vehevehe e ia a lautolu taki hoa ua, moua ai ono e matakau fakamatala, mo e tuku age ki a lautolu e tau fakaakoaga. Ne fakamaama e ia: “Aua neke o a mutolu ke he taha hala he tau motu kehe, aua foki neke afe atu a mutolu ke he taha maga i Samaria; ka e mitaki ke o atu a mutolu ke he tau mamoe galo he faoa a Isaraela. Ka e o a a mutolu mo e fakamatala atu, kia pehe atu, Kua tata mai tuai e kautu he lagi.”

Ko e Kautu nei ka fakamatala e lautolu ko e Kautu haia ne fakaako e Iesu a lautolu ke liogi ki ai he liogi fakaako. Kua tata mai e Kautu, kakano ko e Patuiki ne fifili he Atua, ko Iesu Keriso, kua ha ha hinai. Ke fakave hana tau tutaki ko e tau hukui he fakatufono tokoluga hake he tau tagata, ne foaki e Iesu e malolo ki a lautolu ke maeke ke fakamalolo e tau tagata gagao mo e fakaliliu tutu mai e tau tagata mamate. Ne fakaako e ia a lautolu ke taute noa nakai fai totogi e tau gahua ia.

Mui mai ne tala age e ia ke he hana tau tutaki ke nakai tauteute ha koloa ke lata mo e ha lautolu a fenoga fakamatala. “Aua neke uta ma mutolu e tau auro, po ke tau ario, po ke tau apa kula ke he tau pipi ha mutolu. Aua foki neke uta ha kato mo e fenoga; aua foki neke takiua e tau tapulu tino, po ke tau afialoalohui, po ke tokotoko; ha ko e mena lata e mena kai ke he tagata eke gahua.” Ko lautolu ne fakaaue ke he fekau to talia mo e foaki e tau mena kai mo e tau fale ke nonofo ai. Tuga ne talahau e Iesu: “Ko e māga, po ke magamotu ke hohoko atu a mutolu ki ai, kia hūhū po ko hai ha i ai kua lata; ti nonofo ai a mutolu, ato o a mutolu.”

Ti foaki foki e Iesu e tau fakaakoaga ke he fakafeleveiaaga he tau tagata ma e fekau he Kautu. “Ka hūhū atu a mutolu ke he taha magafaoa kia fakaalofa atu a mutolu ki ai. Kaeke foki kua lata e magafaoa ia, to hoko atu ki ai ha mutolu a fakamonuina; kaeke foki kua nakai lata, ti liliu mai ai kia mutolu ha mutolu a fakamonuina. Ka nakai talia e taha a mutolu, po ke nakai fanogonogo ke he tau kupu ha mutolu, ka toka e mutolu e fale ia po ke māga ia, ti lulululu kehe ai e mutolu e kelekele ke he tau hui ha mutolu.”

Ko e maga ne tiaki ha lautolu a fekau, ne fakakite e Iesu ko e fakafiliaga ki ai to matematekelea lahi moli. Ne fakamaama e ia: “Ko e moli, ke tala atu e au kia mutolu, ko e Aho Fakafili to laukauka ai a Sotoma mo Komora ke he māga ia.” Mataio 9:​35–​10:15; Mareko 6:​6-12; Luka 9:​1-5.

▪ Ko e magaaho fe ne kamata e Iesu e fenoga fakamatala ke tolu aki i Kalilaia, mo e ko e heigoa ne kitia e ia ke fakamakamaka ki ai?

▪ Ko e magaaho ne fakafano e ia e hana a tau aposetolo 12 ke fakamatala, ko e heigoa e tau fakaakoaga ne foaki age e ia ki a lautolu?

▪ Ko e ha ne tonu ai he tau aposetolo ke fakaako kua tata tuai e Kautu?