Veveheaga 57

Fakaalofa Hofihofi Noa ma Lautolu ne Matematekelea

MOLE he vale ke he tau Farasaio ha ko e ha lautolu a tau kupu toka tuai ne taute ke lata ni mo lautolu, ne o a Iesu mo e hana tau tutaki. Nakai la leva ia fakamua, liga manatu e koe, hana a lali ke hola kehe mo lautolu ke okioki ti fakatauhele ni he moua he moto tagata a lautolu. Ko e magaaho nei, fakalataha mo e hana tau tutaki, ne o a lautolu ke he tau maga i Turo mo Saitonu, loga e tau maila ke he fahi tokelau. Ko e fenoga ni a nei ha Iesu mo e hana tau tutaki ne molea e tau katofia ha Isaraela.

Mole e magaaho he moua e fale ke nonofo ai, ne fakailoa e Iesu e nakai manako hana ke iloa e taha ha lautolu a mena ne nonofo ai. Ka e taha e mena, ke he maga kehe nei nakai ko e maga ha Isaraela, ne nakai maeke a ia ke galo nakai iloa e taha. Ko e fifine Heleni, fanau i Foinike i Suria, ne moua a ia ti ole fakamakamaka: ‘Kia fakaalofa noa mai a koe kia au ma Iki na e, ko e Tama a Tavita; kua heketia lahi haku a tama fifine.’ Ka e taha e mena ne nakai fai tali a Iesu.

Ko e fakahikuaga, ne tala age hana tau tutaki ki a Iesu: “Kia fekau e koe a ia ke fano, ha ko e mena mui mai a ia, mo e ui mai kia tautolu.” Ne fakamaama e ia hana kakano he nakai fakatautonu a ia, ne pehe a Iesu: “Nakai fakafano mai au ke he falu, ka ko e tau mamoe ni hokoia he faoa a Isaraela ne galo.”

Ka e taha e mena, ne nakai oti e ole he fifine. Ne finatu e fifine ki a Iesu mo e hufeilo ki a ia. Ne ole a ia, “Ko e Iki na e, kia lagomatai mai a koe kia au.”

Ne momokoina a Iesu he ole fakamakamaka he fifine! Ka e taha e mena, ne liu ni a ia tuhi ke he hana a kotofaaga fakamua, ke fekafekau ke he tau tagata he Atua i Isaraela. Ko e magaaho taha ia, ke kamatamata hana tua, ne fatiaki e ia e fili tagata he tau Iutaia ke he tau motu kehe, he totoko: “Nakai lata ke uta e mena kai he fanau mo e liti ke he tau kuli ikiiki.”Ko e hana a leo fakaalofa hofihofi noa mo e fofoga, ne fakakite moli e Iesu hana a loto fakaalofa moli ke he tau motu kehe nakai ko e tau Iutaia. Ne fakamolu foki e ia e fakatataiaga he tau Motu Kehe ke he tau kuli he ui a lautolu ko e “tau kuli ikiiki,” po ke tau punua kuli. Ne nakai ita, ka e matutaki he fifine e talahauaga he fili tagata he tau Iutaia mo e talahau e onoonoaga fakatokolalo: “Ko e Iki na e, ko e moli a koe; ka ko e mena kai he tau kuli ikiiki e tau valavala mena ne mokulu hifo he kaiagamena he tau tagata ha lautolu e tau kuli.”

“Teme na e, kua lahi hau a tua,” he tali e Iesu. “Ke tuga e manako hau, kia eke foki pihia māu.” Ti pihia ni! Ko e magaaho ne liu a ia ke he hana kaina, ne moua e ia hana tama fifine ke he mohega, kua malolo katoatoa.

Mai he maga i Saitonu tata ki tahi, ne o a Iesu mo e hana tau tutaki ke he taha fahi he motu, hagaao atu ia ke he kamataaga he Vailele i Ioritana. Ne mahino mitaki ko e o a lautolu ke he taha fahi i Ioritana ke he matakavi ni he Tahi i Kalilaia ti hohoko ke he maga he tau Tekapoli he fahi uta he tahi. Ne toli a lautolu he mouga ke he matakavi ia, ka e moua ni he tau moto tagata a lautolu mo e tamai ki a Iesu ha lautolu a tau kulikuli, tau matapouli, tau kuhukuhu, tau kunekune mo e falu foki ne gagao mo e nakai katoatoa e tau alaga. Ne tuku a lautolu ke he tau ve ha Iesu, mo e fakamalolo e ia a lautolu. Ne ofomate e tau tagata, he kitia e lautolu e tau kuhukuhu kua vagahau, tau kulikuli kua o e tau hui, tau matapouli kua kitia; mo e fakaheke a lautolu ke he Atua a Isaraela.

Ne onoono fakalahi a Iesu ke he taha e tagata tane teliga tuli mo e nakai hohoko e vagahau. Na mahani e tau teliga tuli ke mukamuka ke ma, mua atu ke he toloaga tagata. Liga mailoga e Iesu e hopoate he tagata nei. Ko e mena haia ne fakaalofa hofihofi noa a Iesu mo e uta a ia mai he moto tagata. Hoko laua ni, ne fakakite e Iesu e mena hana ka taute ki a ia. Ne tuku e ia hana tau matalima ke he tau pu teliga he tagata, oti e anu, ti aamo hana alelo. Ko e magaaho ia, ne ono hake ke he lagi, fafagu fakalahi mo e pehe: “Kia hafagi.” Ko e magaaho ia ni ne liu e tagata moua hana malolo logona, mo e maeke foki ke hohoko mitaki e vagahau.

Ko e magaaho ne taute e Iesu e tau fakamaloloaga loga nei, ne tali aki he moto tagata e fakaaue. Ne pehe a lautolu: “Uhoaki hana tau mena oti ne eke; kua fakafanogonogo e ia e tau tagata teliga tuli, katoa mo e tau tagata kuhukuhu, kua fakavagahau e ia.” Mataio 15:​21-31; Mareko 7:​24-37.

▪ Ko e ha ne nakai fakamalolo fakaave e Iesu e tama he fifine Heleni?

▪ Ko e magaaho fakamui, uta e Iesu hana tau tutaki ki fe?

▪ Fakaalofa hofihofi noa fefe e tauteaga ha Iesu ke he tagata teliga tuli ne nakai hohoko mitaki e vagahau?