Puipui Mai he Hufeilo ke he Tau Tupua Kehekehe

“Ke loto fakalataha fefe e faituga he Atua mo e tau tupua?”​—2 KORINITO 6:16.

1. Ko e heigoa e fakataiaga he fale uta fano mo e tau faituga ha Isaraela?

HA HA ia Iehova e faituga ne nakai nonofo ai e tau tupua. Ne fakatai aki e faituga ne ta e Mose mo e tau faituga ne ta fakamui i Ierusalema. Ne fakatai e tau fale oti ia ke he “fale uta fano moli,” ko e faituga fakaagaga lahi a Iehova. (Heperu 8:1-5) Ko e faituga ia ko e fakatokatokaaga ke hagaao atu ke he Atua ke tapuaki ha ko e fakaveaga he poa lukutoto ha Iesu Keriso.​—Heperu 9:2-10, 23.

2. Ko hai kua eke mo tau pou he faituga fakaagaga he Atua, mo e ko e heigoa e tuaga ne fiafia lahi ai e moto tagata tokologa?

² Ko e tau Kerisiano fakauku oti ka eke ia mo “pou he faituga he Atua,” ka moua e nofoaga ke he lagi. “Ko e moto tagata tokologa” he falu foki ne tapuaki ki a Iehova kua “fekafekau kia ia ke he aho mo e po” ne fakatino mai he lotopa he tau motu kehe ke he faituga ne liu ati hake e Herota. Ha ko e tua ke he poa ha Iesu, ne ha ha ia lautolu e tutuaga tututonu ti maeke ke fakahao mai he “matematekelea lahi.”​—Fakakiteaga 3:12; 7:9-15.

3, 4. Ne fakatai ke he heigoa e fakapotopotoaga he tau Kerisiano fakauku mo e ko e heigoa e tau mena kelea ke tokanoa mai ai?

³ Ko e fakapotopotoaga he tau Kerisiano fakauku he lalolagi kua fakatai ai foki ke he faituga kua tokanoa mai he hufeilo ke he tau tupua. Kia lautolu ia ne ‘fakamau aki e agaga tapu,’ ne pehe e aposetolo ko Paulo: “Kua ati hake ki luga he fakaveaga he tau aposetolo mo e tau perofeta, ko Iesu Keriso haia ko e maka ke fakamau aki e malokuaga, Kua fakataitai ia ia e fale katoa kua hake, ke eke mo faituga tapu ke he Iki, Ko ia foki kua ati hake fakalataha ai a mutolu ke he Agaga, ke eke mo haeleaga he Atua.” (Efeso 1:13; 2:20-22) Ko e 144,000 nei ne kua fakamau fakamailoga ko e tau “maka momoui, ko e fale kua lata mo e agaga, ko e tau ekepoa kua tapu.”​—1 Peteru 2:5; Fakakiteaga 7:4; 14:1.

⁴ Ha ko e “fale ne eke he Atua” e tau ekepoa nei, ne nakai fakaata e ia e faituga nei ke fakatakiva. (1 Korinito 3:9, 16, 17) “Aua neke hahamo a mutolu mo e nakai tatai fakalataha mo lautolu kua nakai tua,” he poaki e Paulo. “Ha ko e mena fakalataha fefe e tututonu mo e mahani kelea? Ke fakafetui fefe e maama mo e pouli? Ke loto fakalataha fefe a Keriso mo Pelialo? Po ke igatia fakalataha fefe a ia kua tua mo ia kua nakai tua? Ke loto fakalataha fefe e faituga he Atua mo e tau tupua?” Ko e tau Kerisiano fakauku ha ‘Iehova ko e malolo oti kana,’ kua lata ni ke tokanoa mai he hufeilo ke he tau tupua. (2 Korinito 6:14-18) Ko lautolu foki e moto tagata tokologa kua lata ke fakamamao mo e hufeilo ke he tau tupua kehekehe.

5. Ha kua mailoga e tonuhiaaga ha Iehova, ko ia ni tokotaha maka ka hufeilo ki ai, ko e heigoa he tau Kerisiano moli ka taute?

⁵ Ne ha ha i ai e hufeilo ke he tau tupua ne kitia maali ti ha ha i ai foki ne fakagalogalo. Nakai, ne ai fakakaupa e hufeilo ke he tau tupua ke he tau atua fakavai mo e tau atua fifine. Ne putoia ai e tapuaki ke he ha tau mena he tau mena po ke ha tagata noa ni ne nakai ko Iehova. Ha ko ia ko e Pule ke he Lagi mo e Lalolagi katoa, ne tonuhia mo e lata tonu ia ia tokotaha maka ke tapuaki ki ai. (Teutaronome 4:24) Ha kua mailoga e mena nei, ne omaoma e tau Kerisiano moli ke he tau poakiaga he Tohiaga Tapu ke fakamamao mo e hufeilo ke he tau tupua. (1 Korinito 10:7) O mai a tautolu ke mailoga e falu vahega tapuakiaga ke he tau tupua kua lata ke fakamamao mai ai e tau fekafekau a Iehova.

Fakatino Mai e Hufeilo ke he Tau Tupua ha Kerisitenitome

6. Ko e heigoa e tau mena fakavihiatia ne kitia e Esekielu ke he fakakiteaga?

⁶ Ke he fakapaeaaga i Papelonia he 612 V.N.K., ne ha ha i ai e fakakiteaga he perofeta ko Esekielu ke he tau mena fakavihiatia he tau Iutaia ne tiaki e kupu he Atua ke he faituga a Iehova i Ierusalema. Ne kitia e Esekielu e “tupua he ita tafuā.” Ne toko fitugofulu e tau momotua ne kitia ai ne poa e tau mena manogi he faituga. Ne kitia ai foki e tau fifine ne tagi ke he atua fakavai. Ne 25 e tau tagata tane ne tapuaki ke he la. Ko e heigoa e kakano he tau gahua nei kua taute e lautolu kua tiaki e taofiaga?

7, 8. Ko e “tupua he ita tafua” kua liga ke hagaao ke he heigoa, mo e ko e ha ne fakahogohogomanava ai a Iehova ke mahekeheke?

⁷ Ko e hufeilo ke he tau tupua he Kerisitenitome ne fakatino mai tuai he tau mena faka­vihi­atia ne kitia e Esekielu ke he fakakiteaga. Tuga a nei, ne pehe a ia: “Kitiala, ha ha he fahi tokelau he gutuhala he fatapoa, ko e tupua he ita tafuā hanā ke he mena ne fina atu ai. Ti pehe mai [e Atua ko Iehova] kia au, Ko e tama he tagata na e, kua kitia nakai e koe e tau mena kua eke e lautolu; ko e tau mena vihatia ko e tau mena lalahi, kua eke he magafaoa a Isaraela i hinai, kia fakamamao ai au mo e haku a faituga?”​—Esekielu 8:1-6.

⁸ Liga ko e fakamailoga he tau tupua mahekeheke e pou fakatapu ne fakatino aki e tau atua fifine ko e tau hoana he atua ha lautolu ko Paala, he talahau he tau Kanana. Ko e fakatino ia ne fakaohooho e mahekeheke ha Iehova, kakano ha kua fakamavehevehe e tapuakiaga ha Isaraela ki a ia ko e moumouaga foki he hana a tau fakatufono: “Ko au ko Iehova hau Atua . . . Aua neke eke e koe mau e tau atua kehe hoku mua. Aua neke eke e koe māu ha tupua kua ta, po ke taha fakatai he taha mena ha he lagi i luga, po ke ha he fonua i lalo, po ke ha ha he tahi i lalo he fonua; Aua neke hufeilo a koe ki ai, aua foki neke fekafekau ki ai; ha ko au ko Iehova hau a Atua, ko e Atua ita tafua au.”​—Esoto 20:2-5.

9. Kua fakaohooho fefe he Kerisitenitome e Atua ke mahekeheke?

⁹ Ko e hufeilo ke he mena fakatai he mahekeheke i loto he faituga he Atua ko e mena fakavihiatia lahi ne taute he tau Isaraela ne tiaki e taofiaga. Ko e mena taha nei ni he tau lotu he Kerisitenitome ne takiva aki e lautolu e tau mena fakatai mo e tau mena kua ta ne nakai fakalilifu aki e Atua, ti fakamavehevehe aki e tapuakiaga ne talahau e lautolu ko e taute ki a Ia ne pehe ko e fekafekau ki ai. Ne fakahogohogomanava foki e Atua ke mahekeheke, ha kua tiaki he tau akoako e Kautu hana ko e amaamanakiaga ni haia ma e tau tagata mo e hufeilo ke he Kautu Kaufakalataha​—ko e “mena vihiatia . . . kua tu ke he mena tapu,” ko e mena kua nakai lata.​—Mataio 24:15, 16; Mareko 13:14.

10. Ko e heigoa ha Esekielu ne kitia i loto he faituga, mo e fakatatai fefe e mena nei ne mailoga ai ke he Kerisitenitome?

¹⁰ Ko e hokotakiaga ha Esekielu, he hu atu ke he faituga: “Kitiala, ko e tau fakatino he tau mena totolo, mo e tau manu huifa oti ne vihiatia, mo e tau tupua oti he magafaoa a Isaraela, kua ta ai ke he kaupa ne agaagai ai. Ne tutu ai foki e tau tagata tokofitugofulu he tau patu he magafaoa a Isaraela, ti tu ai . . . ko e tagata mo e hana a kapiniu ke huhunu ai e tau mena manogi ha ha he lima hana, ti hake ai e ahua lahi he tau mena manogi.” Manamanatu la ki ai! Ko e tau momotua a Isaraela i loto he faituga a Iehova, ne taute e tau poa manogi ke he tau atua fakavai, ne fakatino he tau mena fakalialia ne ta ke he tau kaupa. (Esekielu 8:10-12) Ko e mena taha nei ni, ne fakaaoga he tau motu he Kerisitenitome e tau fakatino he tau manu lele mo e tau manu vale, ti hufeilo ki ai e tau tagata. Ko e falu mena foki, ne tokologa e tau akoako ne agahala, he lagomatai ke fakahehe e tau tagata tokologa ke fakapuloa e manatu hepe ke he tupu maiaga he tagata mai he tau manu, ka e nakai fakaako e tala moli mai he Tohi Tapu ko e tufugatia he Atua ko Iehova.​—Gahua 17:24-28.

11. Ko e ha e tau fifine Isaraela ne tiaki e taofiaga ne tagi ai ki a Tamusa?

¹¹ Ke he gutuhala he pa he fale a Iehova, ne kitia e Esekielu e tau fifine Isaraela kua tiaki e taofiaga ne tagi fakafohifo ki a Tamusa. (Esekielu 8:13, 14) Ko e atua he tau akau ne tutupu he vaha to uha a Tamusa ke he tau Papelonia mo e tau Suria, ti mamate ni he vaha mo, nakai fai uha. Ne fakatino he tau akau mamate e mate ha Tamusa, ne tagi tatuki he hana a tau tagata tapuaki ke he tau tau oti he magahala vela lahi. Ke he magaaho ka liliu ai e tau akau tutupu he vaha to uha, ko e liu maiaga ha Tamusa he lalo fonua. Ne fakamailoga aki e matatohi fakamua he hana higoa a ia, ko e tau i tuai ne fakatai ke he akau fakalava. Ne fakamanatu mai he mena nei ki a tautolu e akau fakalava he tau Kerisitenitome ne fa e hufeilo ke he tau tupua.

12. Ko e heigoa he tau tagata tane Isaraela toko 25 ne kua tiaki e taofiaga ne taute, he kitia e Esekielu, mo e ko e heigoa e vahega mena taha pehe nei ne fa e taute ia i Kerisitenitome?

¹² Ke he lotopa i loto he faituga, ne kitia foki e Esekielu toko 25 e tau tagata tane Isaraela ne kua tiaki e taofiaga ne hufeilo ke he la​—ko e moumouaga he poakiaga a Iehova hagaao ke he hufeilo he tau tupua. (Teutaronome 4:15-19) Ko e tau tagata hufeilo ke he tau tupua na ne toto hake ki ai foki e la akau vihiatia ke he ihu he Atua, liga ko e fakatai ke he maaga kakano fufu he tagata tane. Ko e mena haia ne nakai tali e Iehova e tau liogi ha lautolu, tuga ni e tau Kerisitenitome ka kumi, ke he hana a lagomatai ke he ‘vaha matematekelea lahi,’ ka e to nakai fai aoga. (Mataio 24:21) Ha ko e tau Isaraela kua tiaki e taofiaga ne tapuaki ke he la ne moua mai e maama, mo e ha lautolu a tua ke he faituga a Iehova, ti fuluhi pihia foki e tau tua he tau Kerisitenitome ke he maama mai he Atua, fakaako e tau taofiaga pikopiko, hufeilo ke he iloilo fakalalolagi mo e faka­kapitiga atu ke he mahani kelea.​—Esekielu 8:15-18.

13. Ko e heigoa e tau puhala he Tau Fakamoli a Iehova ke fakamamao mo e tau vahega hufeilo ke he tau tupua ne kitia ke he fakakiteaga ha Esekielu?

¹³ Ne fakamamao e Tau Fakamoli a Iehova ke he tau gahua hufeilo ke he tau tupua he tau Kerisitenitome, po ke fakatai ha Ierusalema, ne kitia e Esekielu ke he fakakiteaga. Ne nakai hufeilo a tautolu ke he tau mena fakatai ne nakai fakalilifu e Atua. Pete ne fakakite e tautolu e fakalilifu ke he tau “pule malolo ne mua” he fakatufono, ko e fakakaupa ni ha tautolu a loto omaoma. (Roma 13:1-7, NW; Mareko 12:17; Gahua 5:29) Ko e ha tautolu a tapuakiaga mai he tau loto ne tuku atu ni ke he Atua mo e hana Kautu. Ne nakai hiki aki e tautolu e Tufuga mo e hana a tufugatiaaga e taofiaga tupu mai noa. (Fakakiteaga 4:11) Ne nakai fiafia a tautolu ke he akau fakalava po ke hufeilo ke he iloilo fakalalolagi, tau pulotu he lalolagi, po ke falu lotomatala he pulotu fakalalolagi. (1 Timoteo 6:20, 21) Ne puipui mai foki a tautolu mo e falu vahega hufeilo ke he tau tupua. Ko e heigoa e falu he tau mena nei?

Ko e Falu Hufeilo ke he Tau Tupua Kehekehe

14. Ko e heigoa e tuaga he tau fekafekau a Iehova hagaao ia ke he “manu favale” he Fakakiteaga 13:1?

¹⁴ Ne nakai fakalataha e tau Kerisiano mo e lalolagi ke hufeilo ke he mena fakatai ko e “manu favale.” Ne pehe e aposetolo ko Ioane: “Ti kitia atu ai e au e manu favale kua hake mai he tahi, ne fitu la e tau ulu hana mo e tau hoe ne hogofulu; ha he tau hoe foki hana e tau foufouiki ne hogofulu . . . Kua hufeilo foki kia ia a lautolu oti kua nonofo ke he lalolagi.” (Fakakiteaga 13:1, 8) Kua maeke ke fakatai he tau manu e tau “patuiki” po ke tau malolo fakapolitika. (Tanielu 7:17; 8:3-8, 20-25) Ti ko e tau malolo fakatufono he lalolagi e kakano he mena fakatai ko e manu favale​—ko Aikupito, Asuria, Papelonia, Metai mo Peresia, Heleni, Roma, mo e Igilani-Amerika ko e kautu ha Peritania mo e Kautu Kaufakalataha ha Amerika ne lalafi ua. Ne fakakite he tau akoako he tau Kerisitenitome e nakai fai fakalilifuaga ke he Atua mo Keriso ha kua takitaki e lalolagi ke hufeilo ke he fakatufono ha Satani, “ko e pule he lalolagi nei.” (Ioane 12:31, NW) Ha ko e tau Kerisiano tu uho mo e tau tagata fakapuloa he Kautu, ne tiaki he tau fekafekau ha Iehova e tau vahega hufeilo ke he tau tupua pihia.​—Iakopo 1:27.

15. Fefe e onoonoaga he tau tagata a Iehova ke he tau tagata talahaua he lalolagi, mo e ko e heigoa e talahauaga he taha Fakamoli hagaao ia ke he mena nei?

¹⁵ Ne nakai hufeilo foki e tau tagata he Atua ke he tau tagata mahuiga he tau fakafiafiaaga mo e tau sipote. Ke he magaaho ne eke ai a ia mo taha he Tau Fakamoli a Iehova ne pehe e taha tagata ta kofe: “Maeke he tau leo fakatagi fakafiafia ke fakaohooho e tau manako hehe . . . Ko e tagata lologo ne lologo ke he fiafia mo e totonu, ne tokologa he tau tagata fanogonogo ne nakai moua mai he ha lautolu a tau hoa he fakamauaga. Ne fa mahani e tufuga ke mailoga ke he tau mena ia ne hagaao hana a tau lologo ki ai. Ko e falu a tagata lologo mau totogi tupe ne iloa e au kua mahuiga lahi ke he tau fifine ha ko e kakano nei. Ka ufia e tagata ke he lalologi manamanatuaga nei, ti takitaki atu ke hufeilo ke he tagata lologo. Liga to kamata aki e ole ke he tohi lima he hana higoa mo tokiofa ti nakai fai mena ke hagahaga kelea ai. Ka ko e onoonoaga he falu ke he tagata lologo ko e ha lautolu a tau manako, mo e tuku e fakalilifuaga lahi ki ai, kua eke tuai e lautolu a ia mo tupua ke hufeilo ki ai. Ti liga tuku hake e lautolu hana a ata ki luga he kaupa ti kamata ke tauteute a lautolu fakafifitaki ki a ia. Kua lata ni he tau Kerisiano ke toka loto ko e navaaga kua lata ni ke tuku atu ke he Atua hokoia.”

16. Ko e heigoa e fakakiteaga ko e mena tiaki he tau agelu tututonu e hufeilo ke he tau tupua?

¹⁶ E, ko e Atua ni hokoia kua lata tonu ke nava po ke tapuaki ki ai. Ko e magaaho ne “fakaveli fakafohifo a [Ioane] mo e hufeilo ke he na ve he agelu” ne fakakite age ki a ia e tau mena ofomate loga, ne nakai talia he mena fakaagaga ke hufeilo ke he ha puhala taha ka e pehe: “A koe, aua ia; ha ko au ko e hau a matakainaga a fekafekau, mo e taha he hau a tau matakainaga e tau perofeta, mo e taha a lautolu kua omaoma ke he tau kupu he tohi nai; kia hufeilo ke he Atua.” (Fakakiteaga 22:8, 9) Ko e matakutaku ki a Iehova, po ke fakalilifu fakalahi ki a ia, ke maeke ia tautolu ke hufeilo ni ki a ia hokoia. (Fakakiteaga 14:7) Ti ko e mena ia, maeke he hufeilo fakamoli ke he fakaatua ke puipui a tautolu he hufeilo ke he tau tupua.​—1 Timoteo 4:8.

17. Maeke fefe ia tautolu ke puipui mai he hufeilo ke he tupua mahani feuaki?

¹⁷ Ko e mahani feuaki foki e taha vahega hufeilo ke he tau tupua ne nakai talia he tau fekafekau a Iehova. Ne iloa e lautolu, “ko e tagata feuaki, po ke taha kua eke mena fakalialia, po ke velevelemena, (ko e mena hufeilo ke he tupua haia,) nakai fakai taha ia lautolu ke moua māna e kautu a Keriso ko e Atua ia.” (Efeso 5:5) Kua putoia ai e hufeilo ke he tau tupua ha kua eke e manako lahi ke he fakafiafia ne nakai fai fakaataaga mo tapuakiaga. Ne fakahagahaga kelea he tau manako lahi ke he feuaki e tau mahani mitaki ke he Atua. Ha kua hihiga atu hana tau mata mo e tau teliga ke he tau mena kiva, ne fakahagahaga kelea ni he tagata hana a fakafetuiaga ne liga ha ha ia ia mo e Atua tapu, ko Iehova. (Isaia 6:3) Ke puipui mai he tau puhala hufeilo ke he tau tupua pihia, ti kua lata ni he tau fekafekau he Atua ke fakamamao mo e tau tohi kiva mo e tau leo lologo fakahehe tagata. Kua lata ia lautolu ke gega ke he tau fakaakoaga fakaagaga malolo ne fakave aki e tau Tohiaga Tapu, ti gahua tumau a lautolu ke “tapulu . . . ke he tagata fou kua eke ke lata mo e Atua, ke he tututonu mo e mahani mitaki ke fakamoli ai.”​—Efeso 4:22-24.

Kalo Kehe mo e Lotokai mo e Velevelemena

18, 19. (a) Ko e heigoa e lotokai mo e velevelemena? (e) Maeke fefe a tautolu ke puipui mai he hufeilo ke he tupua he lotokai mo e velevelemena?

¹⁸ Ne puipui mai foki e tau Kerisiano he lotokai mo e velevelemena, ko e tau puhala fetataiaki ke hufeilo ke he tau tupua. Ko e lotokai ko e manako lahi, mo e velevelemena ko e mahani lotokai ke he ha mena he tau mena he falu tagata. Ne poaki a Iesu ke fakamamao mo e velevelemena mo e vagahau hagaao ke he tagata velevelemena maukoloa, ne nakai moua ha aoga mai he hana a tau koloa he mateaga mo e nofo ke he tuaga momoko he nakai “maukoloa a ia ke he Atua.” (Luka 12:15-21) Ne lata tonu e fakatonuaga ha Paulo ke he hana a tau matakainaga he tua: “Tamate e tau fahi tino ha mutolu he lalolagi hagaao ke he . . . velevelemena, ko e tapuaki ke he tupua a ia.”​—Kolose 3:5, NW.

¹⁹ Ko lautolu ne gagao he manako lahi ke he tupe, mo e kai mo e inu lahi, po ke foli lahi ke moua e pule malolo kua eke e tau manako lahi ia ha lautolu mo hufeilo ke he tau tupua. Tuga ne fakakite mai e Paulo, ko e hufeilo ke he tupua e tagata lotokai ti nakai hoko ke he Kautu he Atua. (1 Korinito 6:9, 10; Efeso 5:5) Ti ko e mena ia, ko e tau tagata kua papatiso ne gahua hufeilo ke he tupua ha ko e tau mahani lotokai, kua lata ke tuku ki tua he fakapotopotoaga Kerisiano. Ka fakaaoga e tau Tohiaga Tapu mo e liogi fakamakamaka, ti maeke ia tautolu ke fakamamao mo e mahani lotokai. Ne pehe e Fakatai 30:7-9: “Ua e mena ne ole atu ai au kia koe; aua neke lamakai mai ai a koe kia au, ka e nakaila mate au; Kia tuku mamao atu e koe ia au e tau mena fakateaga mo e tau kupu pikopiko; aua neke foaki mai e koe kia au e nofogati po ke muhu mena; kia fagai e koe au ke he tau mena kai kua lata mo au. Neke makona ni au mo e fakatikai e au a koe, mo e pehe age au, Ko hai kia a Iehova neke nofogati foki au, mo e kaiha e au, mo e totoku teao ai e au e higoa he haku a Atua.” Ko e agaga pihia ke maeke ke lagomatai aki a tautolu ke puipui mai he hufeilo ke he tau tupua he lotokai mo e velevelemena.

Puipui Mai he Hufeilo ke he Tau Tupua e Koe a Koe

20, 21. Maeke fefe he tau tagata a Iehova ke puipui mai he hufeilo ke he tau tupua e koe a koe?

²⁰ Puipui mai foki e tau tagata a Iehova he hufeilo ke he tau tupua e koe a koe. Ko e mena fa mahani e lalolagi nei ke hufeilo ke he tupua e koe a koe mo e hau ni a finagalo. Ko e manako lahi ke he talahaua mo e lilifu ne maeke he tokologa ke taute e tau mena kelea. Ne taute ni a lautolu he ha lautolu a finagalo, ka e nakai ko e he Atua. Ti nakai maeke a tautolu ke fai fakafehagaiaga mo e Atua ka fakaata e tautolu e hufeilo ke he tau tupua e koe a koe he kumi ke he tau puhala hehe ke he tau mena ne finagalo a tautolu ki ai mo e lali ke fia iki atu ke he falu. (Fakatai 3:32; Mataio 20:20-28; 1 Peteru 5:2, 3) Ha ko e tau tutaki ha Iesu, kua tiaki tuai e tautolu e tau puhala hehe he lalolagi.—2 Korinito 4:1, 2.

²¹ Ne nakai kumi ke talahaua, ka e talia he tau tagata he Atua e fakatonuaga ha Paulo: “Po ke kai mena a mutolu, po ke inu a mutolu, po ke eke e mutolu taha mena, kia eke e mutolu e tau mena oti kana ke fakaheke ai ke he Atua.” (1 Korinito 10:31) Ha ko e tau fekafekau he Atua, ne nakai fakamakamaka ni a tautolu ke hufeilo ke he tau tupua ke taute ni ke he puhala ha tautolu, ka e gahua mo e fiafia e finagalo mai he lagi, talia e tau takitakiaga mai he “tupa fakamoli mo e lotomatala” mo e katoatoa e kaufakalatahaaga mo e fakapotopotoaga a Iehova.​—Mataio 24:45-47, NW.

Fakatumau ke Puipui!

22, 23. Ko e heigoa e puhala ke maeke ia tautolu ke puipui mai he hufeilo ke he tau tupua kehekehe?

²² Ha ko e tau tagata a Iehova, ne nakai fakaveveli fakafohifo a tautolu ke he tau tupua talaga. Ne puipui mai foki a tautolu he tau vahega hufeilo ke he tau tupua ne nakai kitia e mahino mitaki. Ko e moli, kua lata ia tautolu ke fakatumau ke fakamamao he hufeilo ke he tau tupua kehekehe. Ti ko e mena haia ne omaoma ai a tautolu mo e fakatonuaga ha Ioane: “Kia leveki e mutolu a mutolu kia mamao mo e tau tupua.”​—1 Ioane 5:21.

²³ Kaeke ko e taha he tau fekafekau a Iehova a koe, ki a fakagahuahua tumau hau a manamanatuaga fakaako mai he Tohi Tapu mo e malolo ke mailoga e tau mena mitaki mo e tau mena kelea. (Heperu 5:14) To nakai maeke he agaga he lalolagi ne hufeilo ke he tau tupua ke takiva a koe ka e to tuga e tau Heperu ne tua fakalahi mo e tau Kerisiano fakamoli i tuai. To foaki e koe ki a Iehova tokotaha e tapuakiaga katoatoa, ti lagomatai e ia a koe ke puipui mai he hufeilo ke he tau tupua kehekehe.

Ko e Heigoa Hau a Tau Manamanatuaga?

◻ Tiaki fefe he Tau Fakamoli a Iehova e tau puhala hufeilo ke he tupua ne kitia ai ke he fakakiteaga ha Esekielu?

◻ Ko e heigoa e “manu favale” he Fakakiteaga 13:1, mo e ko e heigoa e tuaga he tau fekafekau a Iehova hagaao ia ke he mena ia?

◻ Ko e ha ne puipui mai ai he hufeilo ke he tau tupua he tau fakafiafiaaga mo e tau tagata mahuiga he sipote?

◻ Puipui mai fefe a tautolu he hufeilo ke he tau tupua e koe a koe?

◻ Ko e ha ne puipui tumau ke he tau puhala oti he hufeilo ke he tau tupua kehekehe?

[Tau Fakatino he lau 17]

Iloa nakai e koe ko e fakatino fefe he tau mena fakalialia ne kitia ke he fakakiteaga ha Esekielu e hufeilo ke he tupua ha Kerisitenitome?

[Credit Line]

Gahua Tufuga (fahi hema i luga) fakave ke he ata mai ia Ralph Crane/Bardo Museum