Veveheaga 74

Fakatonuaga ki a Mareta, mo e Fakaakoaga he Liogi

KO E fakamatala ha Iesu i Iutaia, ne afe atu a ia ke he maaga ha Petania. Ko e maaga hanei ne nonofo ai a Mareta, Maria, mo e ha laua a tugaane ko Lasalo. Liga kua feleveia a Iesu mo lautolu tokotolu nei fakamua he hana a feua fakamatala mo e kua fita ko e kapitiga uho ha lautolu. Ne fano a Iesu he magaaho nei ke he kaina ha Mareta mo e fakafeleveia fiafia e ia.

Ne fiafia lahi a Mareta ke foaki ki a Iesu e hana a tau mena mitaki. Ko e moli, ko e lilifu mua ue atu ke ahi he Mesia he maveheaga e kaina he taha! Ko e mena haia ne lavelave a Mareta he tauteute he tau mena kai loga mo e uka mo e kitia foki ke he tau mena loga ke maeke he nofo mai ha Iesu ke fiafia mo e hagahaga mitaki.

Ko e taha fahi, ko Maria e tehina ha Mareta ne nofo he tau hui ha Iesu mo e fanogonogo ki a ia. Ne fai magaaho he mole, ne finatu a Mareta mo e vagahau ki a Iesu: “Ko e Iki na e, nakai kia manatu mai a koe, kua toka au he matakainaga haku ke eke mena tokotaha? kia tala age a koe kia ia ke lagomatai mai kia au.”

Ka e nakai talia e Iesu ke vagahau ha mena taha ki a Maria. Ka e fakatonu e ia a Mareta he molea e tupetupe ke he tau mena he tino. “Mareta, Mareta na e,” he akonaki fakatotonu atu e ia, “kua fakaatukehe a koe, mo e kapaletu hau a loto ke he tau mena loga; ka e taha e mena kua aoga.” Ko e pehe a Iesu kua nakai lata ke lahi e tau magaaho ke tauteute loga e tau mena kai kehekehe ma e taha e fua kai. Ko e gahoa ni po ke lata ni he taha.

Kua mitaki e tau amaamanakiaga ha Mareta; ko e manako a ia ke eke mo tali fenoga fakamokoi. Ka e taha e mena, ko e hana a tupetupe ke foaki he tau mena he tino, kua fakato e ia e magaaho ke moua e tau fakaakoaga mai he Tama he Atua! Ti fakaoti e Iesu: “Kua fifili foki e Maria e mena uho, nakai maeke ke uta kehe ia ia.”

Ko e magaaho fakamui, ke he taha mena foki ne huhu e tutaki a Iesu: “Ko e Iki na e, kia fakaako mai e koe kia mautolu e liogi; tuga foki a Ioane ne fakaako ke he hana tau tutaki.” Liga nakai fakalataha e tutaki nei he taha mo e hafa e tau fakamua he magaaho ne foaki e Iesu e liogi fakaako he hana a Lauga he Mouga. Ne liu a Iesu fatiaki e tau fakaakoaga hana ka e matutaki ke foaki mai e tala fakatai ke peehi e lata ke fakamakamaka ke he liogi.

“Ko hai taha ia mutolu hana e kapitiga,” he kamata e Iesu, “ka fano kia ia he tuloto po, mo e tala age kia ia, Teme na e, ati ta mai a tolu e areto, ka e taui atu; ha kua hau tuai e kapitiga haku ke he hana fenoga, ka e nakai fai mena au ke age ki ai. Ti ui mai a ia mai he fale, kua pehe mai, Ua fakahoha mai a koe kia au; kua pa tuai e gutuhala, ti kua tatakoto a mautolu mo e haku a fanau; nakai maeke ia au ke matike mo e atu māu. Kua tala atu e au kia mutolu, Pete he nakai matike a ia mo e age kia ia, ha ko ia hana kapitiga; ka e matike a ia, mo e age e tau mena oti ne manako ai a ia, ha ko e hana ole fakamakamaka.”

Kua nakai kakano e fakatataiaga nei ke pehe ke nakai fiafia a Iehova ko e Atua ke talia e tau ole, ke tuga e kapitiga he tala nei. Nakai, ka ko e fakatai, kaeke ke talia he kapitiga nakai fiafia e ole fakamakamaka, ka to mua atu he ha tautolu a Matua fakaalofa he lagi! Ti matutaki e Iesu: “Kia ole atu a mutolu, ti foaki mai ai kia mutolu; kia kumikumi a mutolu, ti moua ai e mutolu; kia tukituki atu a mutolu, ti vevete mai ai kia mutolu. Ha ko ia ke ole atu, to moua e ia; ko ia ke kumi, to iloa e ia; ko ia ke tukituki, to vevete mai kia ia.”

Ko e magaaho ia ne tala a Iesu ke he tau matua tane hala, nakai mitaki katoatoa, he pehe: “Ko hai e matua ia mutolu ke age kia e ia e maka ke he tama hana ka ole mai e areto? ka ole mai e ika, ke age kia e gata kia ia mo ika. Ka ole mai e ia e fufua moa, ke age kia kia ia e akarava? Hanai, ko mutolu ne mahani kelea, kaeke kua iloa e mutolu ke uta e tau mena mitaki mo e tau fanau ha mutolu; ka e nakai kia mua e Matua ha mutolu ha ha he lagi ke foaki mai e agaga tapu kia lautolu ka ole atu ai kia ia?” Ko e moli, ko e fakamaloloaga fakaohooho ha a ia ne foaki mai e Iesu ke fakamakamaka ke liogi. Luka 10:​38–​11:13.

▪ Ko e ha ne lahi e tauteuteaga ha Mareta ki a Iesu?

▪ Ko e heigoa ha Maria ne taute, mo e ko e ha ne talahau mitaki e Iesu a ia ka e nakai ki a Mareta?

▪ Ko e heigoa ne fakaohooho a Iesu ke fatiaki hana tau fakaakoaga ke he liogi?

▪ Fakatai fefe e Iesu e lata ke fakamakamaka ke he liogi?