Veveheaga 77

Ko e Huhu ke he Tau Mena he Matua

NE ILOA moli he tau tagata ko e kai a Iesu he kaina he Farasaio. Ko e mena haia ne fakapotopoto a lautolu ko e tau afe i fafo mo e fakatali ke he magaaho ka hau a Iesu ki fafo. Ne nakai tuga e tau Farasaio ne totoko ki a Iesu mo e lali ke hele a ia ka vagahau taha mena kua hepe, ne fiafia e tau tagata ke fanogonogo ki a ia mo e fakaaue.

Ne fuluhi fakamua ke he hana tau tutaki, ne pehe a Iesu: “Kia kalo kehe ni a mutolu mo e mena fakaea he tau Farasaio, ko e fakavai haia.” Tuga ne fakakite he magaaho ne kai ai, ko e fakatokaaga lotu katoatoa he tau Farasaio kua puke ia he tau fakatupua. Ka e pete ni he fufu e tau kelea he tau Farasaio aki e tau tapuakiaga fakavai, ka e to fakakite ni he magaaho fakamui. “Ha kua nakai fai mena,” he talahau e Iesu, “kua ufia ke nakai fakakite; nakai fai mena galo foki, ke nakai kitia.”

Ne matutaki a Iesu ke fatiaki e fakamaloloaga ne age ke he toko 12 ne fakafano e ia a lautolu he fenoga fakamatala ki Kalilaia. Ne pehe a ia: “Ua matakutaku a mutolu ia lautolu ne kelipopo e tino; ka mole ia, ti kua nakai tuai toe ha mena ke maeke ai e lautolu.” Ha kua nakai nimo he Atua e taha he tau manu ikiiki, ne fakamalolo e Iesu hana tau tutaki to nakai nimo pihia he Atua a lautolu. Ne pehe a ia: “Ka takitaki a mutolu ke he tau sunako, mo e tau iki, mo e tau patu, . . . Ha ko e mena fakaako he agaga tapu a mutolu ke he magaaho ia ni ke he tau kupu ke lata ke tala atu ai.”

Ko e tagata tane he moto tagata ne vagahau. “Ko e akoako na e,” he ole e ia, “kia tala age a koe ke he haku a matakainaga, kia vevehe māku e tau mena he matua ha maua.” Ko e maveheaga he Fakatufono a Mose ko e ua e veveheaga he tama tane uluaki mai he tau mena he tau matua, ti nakai fai kakano ke taufetoko. Ko e moli ko e manako e tagata tane ke lahi atu hana tau mena mai he matua.

Liga nakai talia a Iesu ke putoia he mena ia. “Teme na e, ne eke e hai au mo fakafili, mo e pule kia mutolu?” he huhu e ia. Ko e magaaho ia ne age e ia e fakatonuaga aoga lahi ke he moto tagata: “A mutolu, kia leveki e mutolu a mutolu neke velevelemena; ha ko e mena nakai moui taha he loga hana tau mena ha i ai.” E, ko e pete he loga e tau koloa he tagata, kua fa mahani ni, ka mate a ia ti toka hifo oti e tau mena ia. Ke peehi e mena moli nei, mo e fakakite foki e goagoa he nakai ati hake e higoa mitaki mo e Atua, ne fakaaoga e Iesu e fakatai. Ne fakamaama e ia:

“Kua fua loga mai e fonua he taha tagata maukoloa; ti manamanatu hifo a ia, kua pehe, Ko heigoa e mena ke eke e au, ha kua nakai fai mena au ke tanaki ai haku a tau mena? Ti pehe a ia, Hanai e mena ke eke e au; to ulu e au haku a tau fale saito, mo e ta fakalalahi; ti tanaki e au ki ai haku a tau fua mo e tau mena mitaki oti haku. To pehe hifo au ke he haku a agaga, Haku agaga na e, ha ha ia koe e tau mena mitaki loga kua toka mo e tau tau loga; kia nofo fakatekiteki a, ti kai a, mo e inu, mo e fiafia ai a koe. Ka kua tala age e Atua kia ia, Ko e goagoa na e, to ahi atu hau a moui mai ia koe ke he po a magaaho; to eke ma hai e tau mena ia ne taute e koe?”

Ko e fakahikuaga, ne kitia e Iesu: “Ha ha ne pihia foki e tagata kua tanaki e tau koloa ia ia, ka e nakai maukoloa a ia ke he Atua.” Pete ne liga nakai fakahehe e tau tutaki ke tanaki e tau koloa, ha ko e tau fekafekauaga he tau aho takitaha he moui ka e maeke foki a lautolu ke mukamuka ke fakahehe mai he fekafekau solu katoa ki a Iehova. Ti ko e mena haia ne fakaaoga e Iesu e magaaho ia ke fatiaki e fakatonuaga mitaki ne age e ia he liga taha mo e hafa e tau fakamua he hana Lauga he Mouga. Ne fuluhi ke he hana tau tutaki, ti pehe a ia:

“Ko e mena ia ke tala atu ai e au kia mutolu, ua fakaatukehe a mutolu he ha mutolu a moui, ke he mena ke kai ai a mutolu; po ke tau mena he tino, ke he mena ke tapulu ai a mutolu. . . . Kia manamanatu a mutolu ke he tau oreva, nakai gana saito a lautolu, ti nakai helehele saito a lautolu, to nakai fai poko a lautolu po ke fale saito, ka e fagai ni he Atua a lautolu. . . . Kia manamanatu a mutolu ke he tau talotalo po ke tupu fefe. Nakai gahua a lautolu ti nakai filo foki; ka e tala atu e au kia mutolu, ko Solomona mo e hana fulufuluola lahi nakai tapulu a ia poke taha he tau mena na. . . .

“Ko mutolu foki, ua kumi e mutolu po ke kai a mutolu ha ha, po ke inu a mutolu ha ha; ua fakauaua foki ha mutolu a tau loto. Ka ko e tau mena oti ia, kua kumi he tau motu he lalolagi; kua fioia foki he Matua ha mutolu kua aoga e tau mena ia kia mutolu. Ka kia kumi e mutolu e kautu he Atua; ati lafi mai ai e tau mena oti ia kia mutolu.”

Kua mua atu ke he tau magahala uka e mouaga he tau tupe ne aoga ke manamanatu fakalahi ke he tau kupu ha Iesu. Ko e tagata ne molea e fakaatukehe ke he hana a tau mena he tino mo e kamata ke lolelole fakahaga ke he tau foliaga fakaagaga, ko e moli, ko e fakakiteaga nakai tua ke he malolo he Atua ke foaki mai ma e Hana a tau fekafekau. Luka 12:​1-31; Teutaronome 21:17.

▪ Liga ko e ha la ne huhu e tagata tane ke he hana a tau mena mai he matua, mo e ko e heigoa e fakatonuaga ne age e Iesu?

▪ Ko e heigoa e fakatai ne fakaaoga e Iesu, mo e ko e heigoa hana a kakano?

▪ Ko e heigoa e fakatonuaga ne liu a Iesu fatiaki, mo e ko e ha ne lata tonu ai?