Veveheaga 82

Liu a Iesu ki Ierusalema

NE NAKAI leva ti liu a Iesu fano fenoga, fakaako mai he taha maga ke he taha maga mo e taha magamotu ke he taha magamotu. Ha ha i ai a ia he maga i Perea, ko e taha faahi he Vailele i Ioritana mai i Iutaia. Ka ko e hana a fakaotiaga he fenoga ko Ierusalema.

Ko e pulotu faka-Iutaia ko e kaupa ni e numera ka moua e fakamouiaga fakalata ati huhu he tagata tane: “Ko e Iki na e, to tokogaogao kia a lautolu ke fakamomoui?” Ko e hana tali, ne fakaohooho e Iesu e tau tagata ke manamanatu ko e heigoa e mena kua lata ma e fakamouiaga: “Kia eke taha a mutolu [ko e pehe a ia, fakafekefeke, po ke kokono] ke huhū atu ke he gutuhala apiapi.”

Kua manako mafiti ke he malolo fakafekefeke ia ha ko e “tau tagata tokologa,” he matutaki e Iesu, “to kumi . . . kia huhū atu, ka e nakai maeke ni.” Ko e ha ne nakai maeke ai a lautolu? Ne fakamaama e ia, ‘ka oti he tu e patu he fale, mo e pa e gutuhala, ka e tutu e tau tagata i fafo mo e tukituki mo e pehe, “Ko e Iki na e, ko e Iki na e, kia vevete mai a e koe kia mautolu,” to pehe a ia: “Nakai iloa e au a mutolu po ke mai fe; ati o kehe a ia au ko mutolu oti ne eke mahani kelea.” ’

Ko lautolu oti ne pa ki fafo ne o mai ni a lautolu he magaaho ne pule ni a lautolu ki ai. Ka ko e magaaho ia ko e gutuhala he magaaho tonu kua pa mo e fakamau. Ke huhu ki loto, kua lata ia lautolu ke o mai tuai, pete ni he nakai hagahaga mitaki ki a lautolu ke taute pihia. Ko e moli, ko e magaaho momoko ne fakatali ki a lautolu ne tiaki e tapuakiaga ki a Iehova ko e kakano uho he ha lautolu a tau momoui!

Ko e tau Iutaia ne fakafano mai a Iesu ke fekafekau ki ai, ke he laulahi he tau magaaho, ne kaumahala ke kuku e magaaho tonu ia ke talia e foakiaga he fakamouiaga he Atua. Ti pehe a Iesu to tagi aue mo e konoi ha lautolu a tau nifo ka tolo ki fafo. Ka ko e taha vala, ko e tau tagata mai he “fahi uta, mo e fahi lalo, mo e fahi tokelau, katoa mo e fahi toga,” e, mai he tau motu oti, “ke tatakoto ke kai mena ke he kautu he Atua.”

Ne matutaki a Iesu: “Ha i ai falu ne fakamui [ko e tau tagata nakai ko e tau Iutaia ne vihiatia ki ai, ti pihia mo e tau Iutaia ne taholi ki lalo] to mumua ni a lautolu; ha i ai foki falu ne mumua [ko lautolu a ia e tau Iutaia maukoloa ke he tino mo e mahuiga fakalotu] to fakamui a lautolu.” Ko e kakano he ha lautolu a fakamui ko e tau tagata teva mo e nakai fai fakaaue ka nakai hohoko ke he Kautu he Atua.

Ne o mai e tau Farasaio mogonei mo e pehe ki a Iesu: “Fano a a koe, kia fano kehe, ha ko Herota [Anetipa] kua fia kelipopo a koe.” Liga ko e kamata ni e Herota e tala nei ke fakalagalaga aki a Iesu ke hola kehe mo e matakavi ia. Liga ko e matakutaku a Herota he neke putoia he mate he taha perofeta foki he Atua ke tuga a ia ne putoia he kelipopoaga ha Ioane Papatiso. Ka e tala age a Iesu ke he tau Farasaio: “Ati o a a mutolu, mo e tala age ke he alope ia, Kitiala, kua vega e au ki fafo e tau temoni, kua fakamalolo foki e au e tau tagata gagao ke he aho nai, mo a pogipogi, ka ko anoiha ke fakahiku ai e au.”

Ko e magaaho ne oti e gahua hana he matakavi ia, ne matutaki e fenoga ha Iesu ki Ierusalema ko e kakano he fakamaama e ia, “ha ko e mena nakai maeke ni he mate ha perofeta ki tua a Ierusalema.” Ko e ha ne amanaki ai ke kelipopo a Iesu i Ierusalema? Ha ko Ierusalema ko e uho maga, ne ha ha i ai e tau fakafili tokoluga Saneheturini ne toko 71 pihia foki mo e tauteaga he tau poa manu. Ti ko e mena haia ne nakai maeke he “Punua Mamoe he Atua” ke kelipopo he taha matakavi noa ka ko Ierusalema ni hokoia.

“Ierusalema na e, Ierusalema na e, ko koe ne kelipopo e tau perofeta, mo e pinimaka a lautolu ne fakafano atu kia koe!” he tagi e Iesu, “lagaloga he manako au ke fakapotopoto e tau fanau hau, ke tuga ne moa kua fakapulupulu hana tau punua ki lalo hifo he hana tau tapakau; ka e nakai mafai a mutolu. Kitiala, ke toka ai ha mutolu a fale ke moumou.” Ha kua tiaki e Tama he Atua, ati moumou ai e motu!

He matutaki e fenoga ha Iesu ki Ierusalema, ne uiina a ia ke he fale he pule he tau Farasaio. Ko e Sapati, ti takahao fakalahi e tau tagata ki a ia, ha kua ha ha i ai e tagata ne matematekelea he fua e fatu, liga ko e puke vai hana tau lima mo e tau hui. Ne vagahau a Iesu ke he tau Farasaio mo lautolu ne pulotu he Fakatufono ne ha ha i ai, mo e huhu: “Kua lata nakai ke fakamalolo e tau gagao ke he sapati?”

Ne nakai vagahau e taha. Ti ko e mena ia ne fakamaulu e Iesu e tagata mo e fakafano kehe a ia. Ne huhu a ia: “Ko hai taha ia mutolu ne fai asini po ke povi, kua to ke he luo, ka e nakai kia futi hake ai agataha ke he aho sapati?” Ne nakai fai kupu taha ke tali atu ai. Luka 13:​22–​14:6; Ioane 1:29.

▪ Ko e heigoa ne fakakite e Iesu ke lata mo e fakamouiaga, mo e ko e ha ne tokologa ne pa ki fafo?

▪ Ko hai e “fakamui” ka fakamua, mo e “fakamua” ka fakamui?

▪ Ko e ha he fakalata ne talahau ai ko e manako a Herota ke kelipopo a Iesu?

▪ Ko e ha ne nakai maeke ha perofeta ke kelipopo i fafo ha Ierusalema?