Veveheaga 83

Fakafiafia he Taha Farasaio

NE NOFO agaia a Iesu he kaina he taha Farasaio talahaua mo e kua fita he fakamaulu e ia e tagata tane ne matematekelea he fua e fatu. Ha kua kitia mata e ia e tau tagata ne uiina ne fifili ni he tau nonofoaga ne mua he kaiaga, ne fakaako e ia e fakaakoaga he mahani fakatokolalo.

“Kaeke ke ui atu taha kia koe, ke fano ke he kaiaga mena,” he fakamaama atu e Iesu, “ua takoto a koe ke he mena ne mua, neke nofo ai foki taha ne uiina e ia kua mua kia koe; ati fina atu ai a ia ne ui kia mua mo ia, mo e tala atu kia koe, Ati unuunu atu la mo e tagata nai; ti kamata ai ke ma a koe he fano ke he mena fakateaga.”

Ti fakaako e Iesu: “Ka ui atu kia koe, ti fano a koe ke takoto ke he mena fakateaga; ka hau a ia ne ui kia koe, kia pehe mai a ia, Teme na e, kia hake a koe ke he mena ne mua; ti lilifu ai a koe ki mua he tau tagata ne tatakoto ke kai mena fakalataha mo koe.” Ko e fakaotiaga, ne pehe a Iesu: “Ha ko e tagata ne fakatokoluga e ia a ia, to fakatokolalo a ia; ka ko e tagata ne fakatokolalo e ia a ia, to fakamatalahi a ia.”

Ne vagahau foki a Iesu ke he Farasaio ne uiina a ia mo e fakamaama e puhala ke foaki e kaiaga mena ne fiafia e Atua ki ai. “Ka taute e koe e kaiaga mena, po ke kai huluhulu, ua ui e koe ke he tau kapitiga hau, po ke hau a tau matakainaga, po ke tau tagata he hau a faoa, po ke tau tagata maukoloa ne katofia mo koe, neke ui mai foki e lautolu kia koe, ati taui mai ai kia koe. Ka taute e koe e kaiaga mena, ati ui a e koe ke he tau nonofogati, mo e tau kunekune, mo e tau kulikuli, mo e tau matapouli; ti monuina ai a koe, ha ko e mena nakai maeke ia lautolu ke taui mai kia koe.”

Ko e foaki he kaiaga pihia ma lautolu ne matematekelea ka moua e fiafia ki a ia ne taute, kakano he fakamaama e Iesu ke he tagata ne uiina a ia, “Ka e taui kia koe ka liliu foki tutu mai a lautolu ne mahani tututonu.” Ko e fakamaamaaga ha Iesu ke he kaiaga mena mitaki nei ne fakamanatu ke he taha foki ne uiina e taha kaiaga mena foki. “Uhoaki e tagata ke kai mena ke he kautu he Atua,” he talahau he taha ia foki ne uiina. Ka e taha e mena, ne nakai tokiofa oti e amanakiaga fiafia ia, he matutaki a Iesu ke fakakite aki e fakataiaga.

“Kua taute he taha tagata e kaiaga mena lahi, ti ui e ia ke he tau tagata tokologa; ti fakafano atu e ia hana fekafekau . . . ke tala age kia lautolu ne uiina, Kia o mai a a mutolu, ha ko e mena kua taute tuai e tau mena oti. Ati kamata ai a lautolu takitokotaha ke kalo kehe, kua taha e loto. Kua pehe mai taha kia ia, Kua fakatau tuai e au e taha kaina, ke lata ia au ke fano ke kitekite ki ai; kua ole au kia koe, kia tuku mai e koe au. Ti pehe mai taha, Kua fakafua tuai e au e tau povi, lima ni kua takiua, ko e fano ne fai au ke fakafifitaki ai; kua ole au kia koe, kia tuku mai e koe au. Ti pehe mai taha, Kua fai hoana tuai au; ko e mena ia kua nakai maeke ai ia au ke fina atu.”

Ko e tau fakamolemole fakateaga ha a ia! Ko e fonua po ke fuifui manu ko e mena fa mahani ke tivi fakamua to fakatau, ti nakai fai fekau mafiti ke tivi foki a lautolu ka mole e tauteaga ia. Pihia foki ni, e mau hoana he tagata kua nakai taofi a ia mai he uiina aoga lahi ia. Ti ko e logonaaga he tau fakamolemole nei, ne ita lahi e iki mo e poaki ke he hana fekafekau:

“Ati fano a fakaave ke he tau hala tu, mo e tau hala loto he māga, mo e ta mai ki hinei e tau tagata nonofogati, mo e tau kunekune, mo e tau kulikuli, katoa mo e tau matapouli. Ti tala mai ai e fekafekau, Ko e iki na e, kua oti he eke e mena ne poaki mai ai e koe; ka e nakai kanonia e fale. Kua tala age e iki ke he fekafekau, Ati fano e ke he tau hala tu, mo e tau mafegahala, ti fakamakamaka atu ke o mai a lautolu, kia puke haku a fale. . . . nakai fakai taha he tau tagata ia ne uiina ke kai haku a kaiaga mena nai.”

Ko e heigoa e tuaga ne fakamaama he fakatai? ‘Ko e iki,’ ne foaki e kaiaga mena ne hukui e Iehova ko e Atua; ‘ko e fekafekau’ ne uta e uiina, ko Iesu Keriso; mo e “kaiaga mena lahi,” ko e tau magaaho he uiaga ke lata mo e Kautu he lagi.

Ko lautolu fakamua ne moua e uiina ke lata ia mo e Kautu, fakamua ke he tau tagata oti, ko e tau takitaki lotu Iutaia he vaha ha Iesu. Ka e taha e mena, ne tiaki e lautolu e uiina. Ti ko e mena ia, mua atu ke he kamataaga ha Penetekoso 33 V.N., ko e uiina ke ua aki ne tuku age ki a lautolu ne vihiatia mo e tokolalo he motu he tau Iutaia. Ka e nakai tokologa ne talia ke katoa e 144,000 he tau nonofoaga he Kautu he Atua he lagi. Ti ko e mena ia he 36 V.N., he mole e tolu mo e hafa e tau tau fakamui, ko e uiina ke tolu aki mo e fakamui ne foaki ia ke he tau tagata nakai ko e tau Iutaia nakai peritome, ti ko e fakapotopoto ha lautolu ia ne matutaki mai agaia ke he vaha nei ha tautolu. Luka 14:​1-24.

▪ Ko e heigoa e fakaakoaga ke he mahani fakatokolalo ne fakaako e Iesu?

▪ Taute fefe e ia ne uiina e kaiaga mena ne fiafia e Atua ki ai, mo e ko e ha ne maeke ke moua e ia e fiafia?

▪ Ko e ha e tau fakamolemole ha lautolu ne uiina ne fakateaga ai?

▪ Ko e heigoa ne hukui he fakatai ha Iesu ke he “kaiaga mena lahi”?