Veveheaga 84

Ko e Kotofaaga he Gahua Tutaki

MOLE atu he toka e ia e fale he taha Farasaio talahaua, ko e taha he Saneheturini, ne matutaki atu a Iesu ki Ierusalema. Ne mumui ki a ia e moto tagata tokologa. Ka ko e heigoa ne omoomoi aki a lautolu? Ko e heigoa ne putoia moli ke he tuaga tutaki moli hana?

Ke he fenoga ha lautolu, ne fuluhi a Iesu ke he moto tagata mo e liga fakaofo a lautolu he magaaho ne pehe a ia: “Kaeke ke hau taha kia au, ka e nakai fakavihia e ia hana matua tane mo e matua fifine, mo e hoana, mo e fanau, mo e tau matakainaga, mo e lafu mahakitaga, ti hoko ni ke he hana moui, nakai maeke ke eke a ia mo tutaki haku.”

Ko e heigoa e kakano ha Iesu? Nakai pehe a Iesu he mena nei ke he hana tau tutaki ke fakavihia moli ha lautolu a tau magafaoa. Ka ko e kakano he fakavihia nei ke fakaalofa fakatote ki a lautolu ka fakatatai mo e fakaalofa ki a ia. Ko e matua tupuna ha Iesu ko Iakopo ne pehe ko e “fakavihia” a Lea ka e fakaalofa ki a Rahela, ko e kakano ko e fakaalofa fakatote ki a Lea mai he hana tehina ko Rahela.

Manamanatu foki la, ko e pehe a Iesu kua lata he tutaki ke fakavihia “ti hoko ni ke he hana moui.” Kua liu fatiaki foki e kakano ha Iesu ko e tutaki moli ke fakaalofa fakalahi ki a Ia he fakaalofa ke he hana a moui ni. Ko e peehi e Iesu he mena nei ke eke mo tutaki hana ko e kotofaaga uka. Ko e gahua nakai uta noa ni mo e nakai fai manamanatuaga fakalahi ki ai.

Kua putoia ai e tau mena uka mo e favale he kotofaaga tutaki ha Iesu, he fakakite mai e ia: “Ko ia kua nakai fua hana ni a satauro, mo e nakai mui mai kia au, nakai maeke ke eke a ia mo tutaki haku.” Ko e mena ia, ko e tutaki moli kua lata ke fiafia ke fakauka ke he kavega taha he favale ne fakauka ki ai a Iesu, putoia foki, kaeke kua lata e mate ke he tau lima he tau fi he Atua, ka fakahoko mafiti e Iesu.

Ke eke mo tutaki ha Keriso, ko e mena ia, kua lata he moto tagata ne mumui ki a ia ke manamanatu fakalahi ki ai. Ne peehi e Iesu e mena moli nei aki e fakatai. “Ma e fakatai,” ne talahau e ia, “ha ko hai taha ia mutolu kua manako ke ati e kolo, ka e nakai nofo fakamua ki lalo ke totou e tau tupe ke palepale aki, po kua lahi nakai ia ia e tau mena ke fakaoti ai? Neke va mai kia ia e tau tagata oti ka mamata ai, he toka e fakave, ka e nakai maeke ke fakaoti ai, kua pehe mai, Ko e tagata a ena, ne kamata ke eke, ka e nakai maeke ke fakaoti.”

Ti kua fakatai e Iesu ke he moto tagata ne mumui ki a ia, fakamua to eke mo tau tutaki hana, kua lata ia lautolu ke fifili fakalahi ko e maeke nakai ia lautolu ke fakamoli e tau mena ne putoia ai, tuga ni e tagata ne manako ke ta e kolo ke tauteute fakamua to kamata kua ha ha ia ia e tau koloa ke maeke ke mau e kolo. Ne talahau foki e taha fakatai, ne matutaki a Iesu:

“Po ko hai e patuiki, ko e fano ne fai ke tau ke he taha patuiki, ka e nakai nofo fakamua ki lalo ke fifili, po ke ne maeke nakai ia ia, mo e hana kau ne taha e hogofulu afe, ke tau kia ia kua hau ke tau mai ka e ua e hogofulu afe hana kau? Kaeke kua nakai, ti fakafano atu e ia e tau fekafekau, ka kua mamao, ke ole atu ke vete e tau.”

Ne peehi mogoia e Iesu e kakano he hana a tau fakatai, he pehe: “To pihia foki a mutolu ka nakai takitokotaha mo e tiaki hana tau mena oti, ti nakai maeke ke eke a ia mo tutaki haku.” Ko e mena haia he moto tagata ne mumui ki a ia, mo e, e, mo lautolu oti ne ako ki a Keriso, kua lata ke fiafia ke taute. Kua lata a lautolu ke mautali ke poa e tau mena oti ne ha ha ia lautolu​—tau koloa oti ha lautolu, putoia ai foki e moui—kaeke ke eke a lautolu mo tau tutaki hana. Fiafia nakai a koe ke taute e mena nei?

“Ko e mena mitaki e masima,” he matutaki e Iesu. Ko e hana Lauga he Mouga, ne pehe a ia ko e hana tau tutaki “ko e masima he lalolagi,” ko e kakano kua ha ha ia lautolu e mena ke fakamomoui aki e tau tagata, tuga ni e masima moli ko e mena ke fakamata leva aki e tau mena kai. “Kaeke ke magalo e masima, po ke heigoa taha mena ke fakakona aki? Nakai aoga ia ke he fonua, nakai aoga foki ke tanu aki e tau akau,” he fakahikuaki e Iesu. “Ka e tolo ni ki fafo. Ko ia ne fai teliga ke fanogonogo aki, ati fanogonogo a a ia.”

Ko e mena haia ne fakakite e Iesu ki a lautolu foki ne kua leva e tutaki ki a ia ke nakai fakalolelole he ha lautolu a fakamakamaka ke matutaki. Kaeke ke pihia a lautolu, to nakai fai mena ke aoga ai a lautolu, ko e mena ke va ki ai he lalolagi nei mo e nakai fai aoga ki mua he Atua, ko e moli ko e eke fakakelea ke he Atua. Ti ko e mena ia, ke tuga ni e masima nakai fai malolo mo e magalo, to tolo ia ki fafo, e, ti moumou. Luka 14:​25-35; Kenese 29:​30-33; Mataio 5:13.

▪ Ko e heigoa e kakano ke “fakavihia” e magafaoa mo e moui he tagata?

▪ Ko e heigoa e tau fakatai ua ne foaki mai e Iesu, mo e ko e heigoa e tau kakano ha laua?

▪ Ko e heigoa e kakano he talahauaga fakahiku ha Iesu hagaao ke he masima?