Veveheaga 87

Foaki ma e Anoiha mo e Gahuahuaaga Pulotu

KO E oti la ia e tala ha Iesu ke he tama tane ne galo ke he moto tagata ne putoia ai hana tau tutaki, tau tagata oko tukuhau nakai fakamoli mo e falu a tagata agahala kitia maali foki, mo e tau tohikupu mo e tau Farasaio. Ko e magaaho nei, ne hagaao atu a ia ke he hana tau tutaki, ne talahau e ia e tala fakatai hagaao ke he tagata maukoloa ne kua moua e hokotakiaga nakai mitaki ke he hana a pule he kaina, po ke fekafekau pule.

He talahau e Iesu, ne ui he tagata maukoloa hana fekafekau pule mo e tala age ki a ia ko e fakaoti fai a ia mo e gahua. “Ko e heigoa e mena ke eke e au? ha ko e uta kehe ne fai he haku iki e feua haku he fekafekau pule?” he manamanatu hifo he fekafekau. “Nakai maeke ia au ke keli e kelekele; to ma au ke kaiole. Kua iloa e au e mena ke eke e au, kia talia au he tau magafaoa ha lautolu, ka uta kehe haku a feua he fekafekau pule.”

Ko e heigoa e tau fakatokatokaaga he fekafekau pule? Ne ui e ia a lautolu ne fai kaitalofa ke he hana a iki. “Po ke fiha e mena he haku a iki ne toka ia koe?” he huhu e ia.

Ko ia fakamua ne tali, ‘2,200 e lita lolo olive.’

‘Ati toto a e tohi hau mo e nofo fakaave ki lalo mo e tohi ke 1,100,’ he tala age e ia ki a ia.

Ne huhu a ia ke he taha foki: “Po ke ne fiha e mena ha ia koe?”

Ne pehe a ia, ‘22,200 e lita he saito.’

‘Ati toto a e tohi hau, mo e tohi 18,000.’

Kua ha ha he fekafekau pule e tonuhia ke tuku hifo e tau kaitalofa he tau tagata ke he hana a iki, ha ko ia e pule ke he fakatokatokaaga he tau tupe he hana a iki. Ha kua tuku hifo e tau kaitalofa, kua taute kapitiga a ia mo lautolu ke taui mai hana mahani mitaki ke he magaaho ka uta kehe hana gahua.

Ko e magaaho ne logona he iki e mena ne tupu, ne nava a ia. Ko e moli, ne “nava ai e iki ke he fekafekau hepehepe, ha kua eke e ia mo e pulotu.” Ko e moli, ne lafi atu e Iesu: “Ha kua mua e pulotu he tau tagata he mouiaga nai ke he hau ha lautolu, ke he tau tagata he maama.”

Ko e magaaho nei, ne talahau e fakaakoaga ma e hana tau tutaki, ne fakamalolo e Iesu: “Ko e koloa he mahani hepehepe kia eke ai e mutolu e tau kapitiga ma mutolu, kia talia ai e lautolu a mutolu ke he tau fale tukulagi, ka toka kehe ai a mutolu.”

Ne nakai nava a Iesu ke he mahani hepehepe he fekafekau ka ko e hana a onoono mamao atu ki mua, mo e pulotu. Ko e mahani he “tau tagata he mouiaga nai” ke pulotu e fakaaogaaga he ha lautolu a tau tupe po ke tau tutuaga ke taute kapitiga mo lautolu ne maeke ke taui mai e mitaki ki a lautolu. Ti ko e tau fekafekau he Atua, “tau tagata he maama,” kua lata foki ke fakaaoga ha lautolu a tau koloa ne moua, ha lautolu a “koloa he mahani hepehepe,” ke he puhala iloilo ke aoga ai ma lautolu.

Ka e tuga ne talahau e Iesu, kua lata a lautolu ke taute kapitiga puhala aki e tau koloa nei mo lautolu ka liga talia a lautolu “ke he tau fale tukulagi.” Ma lautolu e fuifui mamoe gahoa, ko e tau fale ia ha he lagi; ma lautolu e ‘tau mamoe kehe,’ ha ha ia lautolu ia e lalolagi Parataiso. Ha ko laua ni ko Iehova ko e Atua mo e hana Tama ne maeke ke talia e tau tagata nei ke he tau fale nei, kua lata ia tautolu ke fakamakutu ke feaki e kapitiga mo laua he fakaaoga ha “koloa he mahani hepehepe” ne ha ha mo tautolu ke lalago e tau gahua he Kautu. Ka kaumahala e tau koloa ia po ke malona, ha ko e mena to pihia moli, to fakamoli ai ha tautolu a moui tukulagi ke he anoiha.

Ne matutaki e vagahau ha Iesu ke he tau tagata ne fakamoli ke leveki foki e tau koloa nei, po ke tau mena gahoa, to fakamoli pihia foki ke leveki ke he tau mena ne mua atu e aoga. “Kaeke foki,” he matutaki e ia, “kua nakai fakamoli a mutolu ke he koloa he mahani hepehepe, ke tuku atu e hai kia mutolu e koloa moli [ko e tau koloa fakaagaga, po ke he Kautu] ke leveki? Kaeke foki kua nakai fakamoli a mutolu ke he tau mena he tagata kehe [ko e tau koloa he Kautu ne tuku age he Atua ke he hana a tau fekafekau], ke tuku atu e hai kia mutolu ha mutolu a tau mena [ko e taui he moui ke he tau fale tukulagi]?”

Ne nakai maeke ia tautolu ke eke mo tau fekafekau moli he Atua mo e magaaho taha ia ko e tau fekafekau ke he tau koloa he mahani hepehepe, tau koloa he tino, he fakaoti mai e Iesu: “Nakai maeke ke he taha fekafekau ke fekafekau ke he na iki tokoua; ha ko e mena fakavihia e ia taha, ka e fakaalofa atu ke he taha; ka nakai pihia, ti piki atu a ia ke he taha, ka e fakateaga ke he taha. Nakai maeke ia mutolu ke fekafekau ke he Atua mo Mamone.” Luka 15:​1, 2; 16:1-13; Ioane 10:16.

▪ Taute kapitiga fefe e fekafekau pule ha tala fakatai ha Iesu mo lautolu ne maeke ke lagomatai a ia he magaaho fakamui?

▪ Ko e heigoa e “koloa he mahani hepehepe,” mo e maeke fefe ia tautolu ke taute kapitiga he puhala aki e tau mena ia?

▪ Ko hai ka talia a tautolu ke he “tau fale tukulagi,” mo e ko e heigoa e tau fale nei?