Veveheaga 126

“Ko e Moli, ko e Tama Ni he Atua Hanā”

NAKAI la leva e fakatautau a Iesu he akau, he magaaho tupou laa, ne tupu ai e pouli leva ne kua matakehe lahi ke tolu e tula. Nakai ko e fakanikoa he laa, ha ko e mena tupu ni e mena nei he mahina pula fou ka ko e mahina kaulapalapa a ia he magahala he Paseka. Ko e taha mena foki ko e mena ku, ko e gahoa ni e tau minuti ne nikoa e laa. Ti ko e pouli ia kua mai faka-Atua! Ti liga ke fakamaoki aki a lautolu ne ekefakakelea a Iesu, mo e fakaoti foki ha lautolu a tau fakafiufiu.

Kaeke ko e tupu fakamua e tau mena matakutaku ia ka e nakai la akonaki he taha mai he tau tagata agahala e hana kapitiga mo e ole ki a Iesu ke manatu a ia, liga ni ko e mena nei ati tokihala ai a ia. Liga ko e magaaho pouli ia ne fakatata atu e tau fifine tokofa, ko e matua fifine ha Iesu mo e hana tehina ko Salome, Maria Makatala, mo Maria ko e matua fifine he aposetolo ko Iakopo Tote, ke he akau fakakikiveka. Ko Ioane, ko e aposetolo ofania ha Iesu, ne ha ha i ai foki mo lautolu.

Ko e loto he matua fifine ha Iesu kua ‘tuina’ he onoono ke he tama tane ne leveki mo e feaki e ia hane fakatautau mo e fakafifilo he mamahi lahi! Ka e taha e mena, nakai manamanatu a Iesu ke he hana ni a mamahi, ka e ke he levekiaga he matua. Ne fakamalolo, ti gaki ki a Ioane mo e tala age ke he hana matua fifine: “Teme na e, kitiala, ko e hau a tama.” Ati, gaki atu ai a ia ki a Maria, mo e vagahau ki a Ioane: “Kitiala, ko e hau a matua fifine.”

Ne tuku e Iesu e levekiaga he hana a matua fifine, ko e takape he magaaho nei, ke he hana aposetolo ne ofania lahi ki ai. Ko e taute e ia e mena nei ha ko e falu fanau foki ha Maria ne nakai la fakakite e tua ki a ia. Ti kua fakatoka e ia e fakafifitakiaga mitaki he nakai taute ni ke lata mo e levekiaga fakatino ke he hana a matua fifine ka e taute foki ma e fakaagaga.

Liga ko e magaaho tolu he mole e pale laa, ne pehe a Iesu: “Kua fia inu au.” Ne logona e Iesu ko e hana a Matua liga kua utakehe e puipuiaga mai ia ia ke maeke ke kamatamata hana a mahani fakamoli katoatoa. Ko e mena haia ne hea fakalahi ai a ia: “Haku Atua na e, haku Atua na e, ko e heigoa e mena kua tiaki mai ai e koe au?” Ko e magaaho ne logona e mena nei, ne pehe falu ne tutu tata atu: “Kitiala, kua ui a ia kia Elia.” Ko e magaaho ia ni ne poi e taha mo e tuku e omomi ne fuifui ke he vineta kua pipi ke he hisopo mo e age ke inu a ia. Ka e pehe e falu: “Tokai a, to kitia e tautolu, po ke ne hau nakai a Elia ke ta hifo a ia.”

Ko e magaaho ne inu e Iesu e vineta, ne ui fakalahi a ia: “Kua fakaoti tuai.” E, kua fakaoti tuai e ia e tau mena oti ne fakafano mai he hana Matua a ia ke taute ke he lalolagi. Ko e fakahikuaga, ne pehe a ia: “Ma Matua na e, kua tuku atu e au haku agaga ke he hau a tau lima.” Kua tuku e Iesu hana moui ke he Atua mo e mauokafua to liuaki mai he Atua ki a ia. Ne tukutuku hifo e ulu hana ti mate.

Ko e magaaho ia ne fafagu e Iesu hana a fafagu fakahiku, ne to ai e mafuike lahi, ti maihiihi mo e mahafagi e tau maka. Ne lahi mahaki e mafuike ti ko e tau tuagamau fakamanatu i fafo i Ierusalema ne malona mo e tolo mai e tau tino mamate ki fafo. Ko lautolu ne o ai, ne kitia e tau gati tino kua mokulu mai ki fafo, ne o ke he loto maga mo e hokotaki ai.

Ko e taha mena foki, he magaaho ia ne mate a Iesu, ko e ie lahi ne veveheua aki e Tapu mo e Tapu Ue Atu he faituga he Atua kua maheua, kamata hifo i luga ke hoko ke he kelekele. Ko e moli, ko e ie puipui fakamanaia fulufuluola nei ko e 18 e mita he tokoluga mo e mamafa lahi! Ko e mana ofoofogia nei kua nakai ni fakakite e ita lahi he Atua ki a lautolu ne kelipopo Hana a Tama ka e fakamailoga foki ko e puhala ki loto he Tapu Ue Atu, ko e lagi, kua maeke ai he magaaho nei ha ko e mate ha Iesu.

Ko e magaaho ne logona he tau tagata e mafuike mo e kitia e tau mena ne tutupu, ne tupu lahi e matakutaku ha lautolu. Ko e takitaki he tokoteau ne pule ke he kelipopoaga kua fakaheke ke he Atua. “Ko e moli, ko e Tama ni he Atua hanā,” he fakailoa e ia. Liga ha ha i ai a ia he magaaho ne talahau ai ko e tuaga he tama faka-Atua ke he fakatutalaaga he fakafiliaga ha Iesu i mua ha Pilato. Ti ko e magaaho nei kua iloa moli e ia ko Iesu ko e Tama he Atua, e, ko ia moli ko e tagata kua mua ue atu ne moui.

Ko e falu foki kua ofo he tau mana nei ne tutupu, mo e kamata ke liliu ki kaina mo e pokipoki ha lautolu a tau fatafata, ko e fakamailoga he ha lautolu a momoko lahi mo e ma. Ko lautolu ne onoono mamao mai, ko e tau tutaki fifine tokologa ha Iesu ne kua lahi e fakalagalaga he tau mena tutupu ofoofogia nei. Ne ha ha i ai foki e aposetolo ko Ioane. Mataio 27:​45-56; Mareko 15:​33-41; Luka 23:​44-49; 2:​34, 35; Ioane 19:​25-30.

▪ Ko e ha ne nakai ko e fakanikoa he laa ati pouli ai ke he tolu e tula?

▪ Ko e magaaho ku ato mate a ia, ko e heigoa e fakafifitakiaga mitaki ne foaki e Iesu ma lautolu ne kua motua e tau matua?

▪ Ko e heigoa e tau talahauaga fa fakahiku ha Iesu ato mate a ia?

▪ Ko e heigoa ne fakakatoatoa he mafuike, mo e ko e heigoa e kakano he maheua e ie puipui he faituga?

▪ Lauia fefe e takitaki he tokoteau ne pule ke he kelipopoaga ha ko e tau mana?