Ko e Tagata ne Nakai Matakutaku

ONOONO la ke he tau tagata kua vaiga e fuata taane nei. Iloa nakai e koe ko hai a ia? Ko Ieremia anei. Ko ia ko e perofeta aoga lahi he Atua.

He nakaila leva ia e kamata e Patuiki ko Iosia ke moumou e tau tupua tā he motu, ne tala age a Iehova ki a Ieremia ke eke mo perofeta Haana. Pete ia, ne manamanatu a Ieremia kua tote lahi a ia ke eke mo perofeta. Ka e tala age a Iehova to lagomatai e Ia a ia.

Ne tala age a Ieremia ke he tau Isaraela ke fakaoti e taute e tau mena kelea. ‘Ko e tau atua ne tapuaki e tau tagata he tau motu ki ai ko e tau atua fakavai,’ he ui e ia. Ka e tokologa e tau Isaraela ne manako ke tapuaki ke he tau tupua tā ka e nakai tapuaki ke he Atua mooli ko Iehova. Magaaho ne tala age a Ieremia to fakahala he Atua a lautolu ha ko e mahani kelea ha lautolu, ne fekī a lautolu ki a ia.

Loga e tau tau he mole ti mate a Iosia, ne tolu e mahina he mole ti patuiki ai e tama taane haana ko Iehoakima. Ne tala tumau a Ieremia ke he tau tagata: ‘To moumou a Ierusalema ka nakai hiki e mutolu e tau puhala kelea ha mutolu.’ Ne totō atu he tau ekepoa a Ieremia mo e kalaga: ‘Kua lata a koe ke tamate he talahau e tau mena nei.’ Ti tala age e lautolu ke he tau iki ha Isaraela: ‘Kua lata ni a Ieremia ke tamate, ha kua vagahau kelea a ia ke he maaga ha tautolu.’

Ko e heigoa ha Ieremia ka taute mogonei? Nakai matakutaku a ia! Ne tala age a ia ki a lautolu oti: ‘Kua fakafano mai e Iehova au ke tala atu e tau mena nei ki a mutolu. Ka nakai hiki e tau puhala kelea ha mutolu he moui, to moumou e Iehova a Ierusalema. Ka kia mailoga e mena nei: Ka tamate e mutolu au, kua tamate e mutolu e tagata nakai fai mena hepe ne taute.’

Ne fakahao he tau iki a Ieremia, ka e nakai hiki he tau Isaraela e tau puhala kelea ha lautolu. He mogo fakamui, ko e patuiki ha Papelonia ko Nepukanesa, ne hau ke tau atu ki Ierusalema. Fakahiku ai ne eke e Nepukanesa e tau Isaraela mo tau fekafekau haana. Ne totou afe ne uta e ia ki Papelonia. Manamanatu la na fēfē ka uta he tau tagata kehe a koe mai he kaina haau ti ta atu ke he motu kehe!