Taute Tumau e Samuela e Tau Mena Hako

Mai he magaaho ne tote lahi a Samuela, ne nofo a ia mo e gahua he fale uta fano he tutūutaaga, ko e matakavi ne ō atu e tau tagata ke tapuaki ki a Iehova. IIoa nakai e koe ko e hau fēfē a Samuela ke nofo he fale uta fano? O mai mua la ke fakaako hagaao ke he matua fifine ha Samuela, ko Hana.

Leva lahi ne nakai maeke a Hana ke fai tama, pete ni ne fia loto a ia ki ai. Ti liogi a ia ki a Iehova mo e olelalo ke lagomatai a ia. Ne mavehe a Hana kaeke ke fai tama taane a ia, to fakafano atu e ia ke nofo mo e gahua he fale uta fano. Ne tali e Iehova e liogi haana, ti moua e ia e tama taane. Ne fakahigoa e ia e tama taane ko Samuela. Tuga ni he mavehe e Hana, he tolu po ke fā e tau ha Samuela, ne uta e ia a Samuela ke he fale uta fano ke fekafekau ke he Atua.

Ko e ekepoa ne mua a Eli he fale uta fano. Ne gahua foki e tau tama taane tokoua haana i ai. Manatu, ko e fale uta fano ko e fale tapuaki ke he Atua, ti lata e tau tagata ke taute e tau mena mitaki i ai. Ka e taute he tau tama taane ha Eli e tau mena kelea. Ti kitia e Samuela e tau mena ha laua ne taute. Taute mena kelea nakai a Samuela ke tuga e tau tama taane ha Eli?— Nakai, ne fakatumau ni a ia ke taute e tau mena hako, tuga he fakaako he tau matua haana a ia ke taute.

Ko e heigoa he manatu e koe ne kua lata a Eli ke taute ke he tau tama taane tokoua haana?— Kua lata a ia ke fakahala a laua.Ne nakai lata a ia ke fakaatā a laua ke gahua he fale he Atua. Ka e nakai taute pihia e Eli, ti ita lahi a Iehova ki a ia mo e haana tau tama taane tokoua. Ti fakahala e Iehova a lautolu.

He taha pō he mohe a Samuela, ne logona e ia e tagata ne hea a ia: ‘Samuela!’ Ti poi atu a ia ki a Eli, ka e ui a Eli: ‘Nakai ui atu au.’ Ne lagaua foki e tupu e mena nei. He laga toluaki, ne tala age a Eli ki a Samuela ka liu a ia ke logona foki e leo, kua lata a ia ke pehē: ‘Iehova na e, kia vagahau mai a koe ha kua fanogonogo atu au.’ Ti ko e mena tonu ia ni ne taute e Samuela. Ti pehē a Iehova ki a Samuela: ‘Tala age ki a Eli to fakahala e au e magafaoa haana ha ko e tau mena kelea ne taute e lautolu.’ Manatu nakai a koe kua mukamuka ma Samuela ke tala age e fekau ia ki a Eli?— Nakai, ai mukamuka. Ka e pete he matakutaku a Samuela, ne taute e ia e mena ne fekau e Iehova a ia ke taute. Kua fakamooli ni e mena ne talahau e Iehova. Ne mamate e tau tama taane tokoua ha Eli, ti mate foki a Eli.

Ko e fakafifitakiaga mitaki a Samuela ma tautolu. Ne taute e ia e tau mena hako pete he kitia e ia e falu tagata ne taute e tau mena kelea. Ka e kua a koe? To tuga nakai a Samuela a koe mo e fakatumau ke taute e mena hako? Ka taute pihia e koe, to fakafiafia e koe a Iehova mo e haau a tau matua.