Ko e Liu Tu Mai​—Maeke ha ko e Lukutoto

Ko e Fakamanatuaga kua foaki ki a tautolu e magaaho mitaki ke fakaata e tau monuina anoiha ne maeke ha ko e lukutoto, tuga e liu tu mai. Nakai ko e finagalo ha Iehova ke mamate e tau tagata. Taha kakano haia ne logona hifo e tautolu e tau logonaaga mamahi lahi, ko e maanu he mate e fakahele. (1Ko 15:26) Ne mamahi a Iesu ke kitia e tau tutaki haana ne maanu he mate a Lasalo. (Ioa 11:33-35) Ha ko e ata mitaki katoatoa a Iesu he haana a Matua, maeke ia tautolu ke iloa tonu kua mamahi foki a Iehova ke kitia a tautolu ne maanu ha kua mamate e tau fakahele ha tautolu. (Ioa 14:7) Amanaki lahi a Iehova ke he magaaho ka fakaliu tu mai e ia e tau fekafekau haana mai he mate, ti kua lata foki ke pihia a tautolu.​—Iop 14:14, 15.

Ha ko Iehova ko e Atua maopoopo, hako ai ke talitonu to fakahoko e liu tu mai he puhala fakatokatoka. (1Ko 14:33, 40) He nakai fai mauku, to liga fai magaaho ke fakafeleveia a lautolu ne fakaliu tu mai. Manamanatu fakahokulo nakai a koe ke he liu tu mai, mua atu ke he tau magaaho maanu? (2Ko 4:17, 18) Fakaaue nakai a koe ki a Iehova he foaki e lukutoto mo e fakakite mai i loto he tau Tohiaga Tapu to liu momoui a lautolu ne mamate?​—Kol 3:15.

• Ko hai he tau kapitiga mo e tau magafaoa haau kua amaamanaki pauaki a koe ke liu ke kitia?

• Ko hai he Tohi Tapu kua manako pauaki a koe ke feleveia mo e tutala ki ai?