Loto Fakaaue ki a Iehova ha Tautolu a Eke Kapiniu Kelekele

1. Ko e ha a Iehova ko e Eke Kapiniu Kelekele ne mua ue atu?

IA NOVEMA 2010, i Igilani, ne tuku ai e tau tupe ke teitei 70 e miliona talā ke moua e fakatū keu ne taute mai i Saina aki e kelekele. Ofoofogia ha kua maeke he tagata eke kapiniu kelekele ke fakahakohako taha mena fa mahani mo e nakai tauuka tuga e kelekele ke moua e fakatū keu fulufuluola mo e tauuka. Ko Iehova ko e ha tautolu a Eke Kapiniu Kelekele kua mua atu e mitaki ke he ha tagata eke kapiniu kelekele. Pehē e Tohi Tapu kua tufuga e Iehova e tagata mitaki katoatoa “ke he efuefu” he kelekele. (Kenese 2:7) Ko e tagata ia ko Atamu “ko e tama a ia he Atua” ti kua tufuga aki e lotomatala ke fifitaki e tau mahani he Atua.​—Luka 3:38.

2, 3. Maeke fēfē a tautolu ke fifitaki e aga he tau Isaraela ne fakatokihala?

² He totoko a Atamu ke he Tufuga haana, ne nakai liu a ia eke mo tama he Atua. Ka e tokologa e hologa ha Atamu ne fifili a Iehova ke eke mo Pule ha lautolu. (Heperu 12:1) He omaoma fakatokolalo ke he Tufuga ha lautolu, ne fakakite ai kua manako a lautolu ki a Ia ke eke mo Matua mo e Eke Kapiniu Kelekele ha lautolu, ka e nakai ko Satani. (Ioane 8:44) Ko e ha lautolu a mahani fakatokolalo ke he Atua kua fakamanatu ki a tautolu e mena ne talahau he tau Isaraela ne fakatokihala: “Iehova na e, ko koe ni ko e ha mautolu a Matua; ko mautolu nai ko e kelekele, ka ko koe ko e Tufuga [“Eke Kapiniu Kelekele,” NW]; ko e gahua he hau a tau lima a mautolu oti kana.”​—Isaia 64:8.

³ Ko e tau tagata tapuaki mooli ha Iehova he vahā nei kua eketaha fakalahi foki ke fakatokolalo mo e omaoma. Ne manamanatu ai a lautolu ko e lilifu ke fakahigoa a Iehova ko e ha lautolu a Matua, ti manako a lautolu ki a ia mo Eke Kapiniu Kelekele ha lautolu. Makai nakai a tautolu ke tuga e kelekele molū ka fakahakohako he Atua ke he kapiniu uho? Kitia nakai e tautolu e tau matakainaga takitaha ha tautolu ko e gahua fakaholo ki mua hane fakahakohako agaia he Atua? Ke lagomatai a tautolu ke moua e aga hako, to fakatutala a tautolu ke he puhala kua fifili e Iehova a lautolu ka fakahakohako e ia, kakano ne fakahakohako e ia a lautolu, mo e puhala ne taute pihia e ia.

FIFILI E IEHOVA A LAUTOLU KA FAKAHAKOHAKO E IA

4. Fifili fēfē e Iehova a lautolu kua futia mai e ia? Talahau e tau fakatai.

⁴ Nakai onoono a Iehova ke he tau tagata tuga he puhala ha tautolu. Ka e kumikumi e ia e tau loto mo e kitia mooli a tautolu takitokotaha. (Totou 1 Samuela 16:7e.) Fakatātā e Iehova e mena nei he mogo ne fakatū e ia e fakapotopotoaga Kerisiano. Ne futia e ia ki a ia mo e Tama haana e tau tagata tokologa ne liga onoono fakateaga e falu ki ai. (Ioane 6:44) Ma e fakatai, taha he tau tagata pihia ko e Farasaio ne higoa ko Saulo ne “vagahau kelea fakamua, to favale, to fakakelea atu.” (1 Timoteo 1:13) Ka e kumikumi a Iehova ke he loto ha Saulo ti nakai logona hifo ko e kelekele fakateaga a Saulo. (Tau Fakatai 17:3) Ka e kitia e Iehova na maeke a Saulo ke fakahakohako ke eke mo “kapiniu . . . kua fifili” ka fakamatala “ki mua he tau motu kehe, mo e tau patuiki, mo e fanau a Isaraela.” (Gahua 9:15) Ne fifili foki e Iehova e falu ka fakahakohako mo “mena mitaki,” putoia e tau tagata konahia, tau tagata feuaki, mo e tau tagata kaihā. (Roma 9:21; 1 Korinito 6:9-11) He fakaako e lautolu e tau Tohiaga Tapu, ne fakamalolō e lautolu e tua ha lautolu ki a Iehova mo e fakaatā a ia ke fakahakohako a lautolu.

5, 6. Lata fēfē he falanaki ha tautolu ki a Iehova ko e ha tautolu a Eke Kapiniu Kelekele ke lauia e aga ha tautolu ke he (a) tau tagata ha tautolu he fonua? (e) ha tautolu a tau matakainaga?

⁵ Falanaki a tautolu kua maeke a Iehova ke fifili mo e futia mai e tau tagata hako. Ko e kakano haia ne nakai lata a tautolu ke fakafili e falu he fonua ha tautolu po ke fakapotopotoaga ha tautolu. Ma e fakatai, mailoga e puhala ne tali atu e tagata ne higoa ko Michael he mogo ne ahiahi atu e Tau Fakamoli a Iehova. Pehē a ia: “Na haga kehe mo e fakaheu e au a lautolu tuga kua nakai ha ha i ai a lautolu. Hemu mooli au! He taha tuaga foki, ne feleveia au mo e magafaoa ne nava e au ha kua mitaki e tau mahani ha lautolu. Taha aho ne ofo lahi au ha ko lautolu ko e Tau Fakamoli a Iehova! Ko e mahani ha lautolu ne fakalagalaga au ke kumikumi hifo e aga fili tagata haaku. Maeke agataha au ke mailoga e aga haaku ne fakavē ke he nakai maama mo e logona teliga he tau tala, nakai ke he tau mena mooli.” Manako a Michael ke iloa lahi atu foki ti talia ai ke fakaako e Tohi Tapu. Fakamui ne papatiso a ia ti eke mo fekafekau mau.

⁶ He mailoga e tautolu a Iehova ko e ha tautolu a Eke Kapiniu Kelekele, to hiki foki e aga ha tautolu ke he tau matakainaga ha tautolu. To kitia e tautolu a lautolu takitaha ko e matagahua holo ki mua. Pihia e onoonoaga ha Iehova ki a lautolu. Kitia e ia e tau loto mooli ha lautolu ti iloa ko e mena kū ni e nakai mitaki katoatoa ha lautolu. Kitia foki e ia e tuaga he tau tagata takitaha mo e aga kua maeke a lautolu ke fakakite. (Salamo 130:3) Maeke a tautolu ke fifitaki a Iehova ka pihia foki e aga mitaki ha tautolu ke he tau matakainaga ha tautolu. Maeke a tautolu ke gahua foki mo e ha tautolu a Eke Kapiniu Kelekele ke lagomatai e tau matakainaga ha tautolu ke holo ki mua. (1 Tesalonia 5:14, 15) Lata he tau motua he fakapotopotoaga ke fakatoka e fakafifitakiaga mitaki he taute e mena ia.​—Efeso 4:8, 11-13.

KO E HA NE FAKAHAKOHAKO E IEHOVA A TAUTOLU?

7. Ko e ha kua loto fakaaue a koe ke he akonaki ha Iehova?

⁷ Liga pehē falu tagata: ‘Nakai uho lahi mahaki e akonaki ne moua e au mai he tau matua haaku ato fanau e au e tau tama haaku.’ He lalahi fakahaga a tautolu, maeke a tautolu ke mailoga e uho he akonaki ha kua kitia e tautolu ko e fakakiteaga he fakaalofa haia. (Totou Heperu 12:5, 6, 11.) Ē, fakaalofa a Iehova ki a tautolu ko e tau fanau haana, ko e kakano haia ti akonaki fakaeneene e ia a tautolu, po ke fakahakohako a tautolu. Manako a ia ki a tautolu ke pulotu mo e fiafia mo e ke fakaalofa ki a ia ko e ha tautolu a Matua. (Tau Fakatai 23:15) Nakai manako a ia ke kitia a tautolu ne matematekelea, ti nakai manako a ia ki a tautolu ke mamate ko e tau tagata agahala nakai tokihala.​—Efeso 2:2, 3.

8, 9. Fakaako fēfē e Iehova a tautolu mogonei, ti matutaki fēfē e fakaakoaga nei anoiha?

⁸ Ato iloa e tautolu a Iehova, liga loga lahi e tau mahani kelea ha tautolu. Ka e fakahakohako e Iehova a tautolu mo e lagomatai a tautolu ke hiki, ti ko e fua, kua ha ha ia tautolu mogonei e falu mahani mitaki. (Isaia 11:6-8; Kolose 3:9, 10) Nonofo a tautolu he parataiso fakaagaaga. Ko e takatakaiaga pauaki anei ne fakatū e Iehova he magahala ha tautolu ke lagomatai ke fakahakohako a tautolu. Logona hifo e tautolu i ai e haohao mitaki mo e puipuiaga pete ni kua kelea e lalolagi ne viko takai ia tautolu. Falu ne tutupu hake he magafaoa ne nakai fai fakaalofa ka e mogonei kua logona hifo e lautolu e fakaalofa mooli mai he tau matakainaga ha lautolu he parataiso fakaagaaga. (Ioane 13:35) Ti kua fakaako a tautolu ke fakakite e fakaalofa ke he falu. Ka e mua atu e aoga, kua iloa e tautolu a Iehova ti logona hifo mogonei e fakaalofa fakamatua haana.​—Iakopo 4:8.

⁹ He lalolagi foou, to aoga katoatoa a tautolu mai he parataiso fakaagaaga. To olioli foki e tautolu e moui he parataiso mooli ne pule he Kautu he Atua. He magaaho ia, to matutaki a Iehova ke fakahakohako a tautolu mo e fakaako a tautolu ke he puhala ne nakai amanaki ki ai he magaaho tonu nei. (Isaia 11:9) To taute foki e Iehova e tau manamanatuaga mo e tau tino ha tautolu ke mitaki katoatoa. To fakamukamuka lahi he mena nei ma tautolu ke maama mo e omaoma katoatoa ke he tau fakatonuaga haana. Kia matutaki a tautolu ke fakaatā a Iehova ke fakahakohako a tautolu, ti fakakite ki a Ia kua uho lahi e fakamooliaga nei he fakaalofa Haana ki a tautolu.​—Tau Fakatai 3:11, 12.

PUHALA NE FAKAHAKOHAKO E IEHOVA A TAUTOLU

10. Fakaata fēfē e Iesu e fakauka mo e pulotu he Eke Kapiniu Kelekele Mua Ue Atu?

¹⁰ Tuga e tagata eke kapiniu kelekele pulotu ne iloa e vahega kelekele ne fakahakohako e ia, ne iloa mitaki he ha tautolu a Eke Kapiniu Kelekele ko Iehova, a tautolu. Iloa e ia ha tautolu a tau lolelole, tau kūkū, mo e holo ki mua ha tautolu, ti fakahakohako e ia a tautolu takitokotaha he tokaloto e tau tutūaga nei. (Totou Salamo 103:10-14.) Maeke a tautolu ke iloa e finagalo ha Iehova ki a tautolu he onoono ke he fakafehagai ha Iesu mo e tau kūkū he tau aposetolo haana. He falu mogo ne taufetoko e tau aposetolo ko hai ne mahomo atu. Kaeke ko koe i ai, to fēfē e onoonoaga haau ke he mahani he tau aposetolo? Liga logona hifo a koe ne nakai tuga e tau kelekele molū a lautolu. Ka ko Iesu ne iloa na maeke a lautolu ke fakahakohako kaeke kua fanogonogo a lautolu ke he fakatonuaga totonu mo e fakauka mo e maeke a lautolu ke fifitaki e mahani fakatokolalo haana. (Mareko 9:33-37; 10:37, 41-45; Luka 22:24-27) He mole e liu tu mai ha Iesu, ne moua he tau aposetolo e agaaga he Atua mo e nakai liu hagaaki ko hai ne mahomo atu. Ka e hagaaki a lautolu ke he gahua ne tuku age e Iesu ki a lautolu.​—Gahua 5:42.

11. He tau puhala fe kua fakamooli a Tavita ke eke mo kelekele molū, ti maeke fēfē a tautolu ke fifitaki ki a ia?

¹¹ He vahā nei, fakaaoga e Iehova e Tohi Tapu, haana agaaga tapu, mo e fakapotopotoaga ke fakahakohako a tautolu. Maeke fēfē e Tohi Tapu ke fakahakohako a tautolu? Lata a tautolu ke totou ai, manamanatu fakahokulo ke he mena kua totou e tautolu, mo e ole ki a Iehova ke lagomatai a tautolu ke fakagahua e tau mena ne fakaako e tautolu. Ko e Patuiki ko Tavita ne tohi: “Ka manatu e au kia koe ke he moheaga haku, ti manamanatu ai au kia koe ke he tau leoleoaga he po.” (Salamo 63:6) Tohi foki e ia: “To fakamonu atu e au kia Iehova, ko ia ne fakatonu mai kia au; kua fakaako mai foki kia au haku a manamanatu ke he tau po.” (Salamo 16:7) Ē, ne manamanatu fakahokulo a Tavita ke he fakatonuaga ha Iehova ti fakaatā ai ke fakahakohako e tau fatuakiloto mo e tau logonaaga hokulo haana, pete foki ka uka e fakatonuaga ke talia. (2 Samuela 12:1-13) Fakatoka e Tavita e fakafifitakiaga atihake he mahani fakatokolalo mo e omaoma ma tautolu. Ti hūhū hifo: ‘Ka totou e au e Tohi Tapu, manamanatu fakahokulo nakai au ki ai mo e fakaatā e fakatonuaga he Atua ke aamotia e tau manatu mo e tau logonaaga hokulo haaku? Lata nakai au ke fai mena foki ke taute?’​—Salamo 1:2, 3.

12, 13. Fakahakohako fēfē e Iehova a tautolu puhala he agaaga tapu mo e fakapotopotoaga Kerisiano?

¹² Maeke e agaaga tapu ke fakahakohako a tautolu ke he tau puhala loga. Ma e fakatai, maeke ai ke lagomatai a tautolu ke fakaako ke fifitaki e aga ha Iesu mo e fakakite e tau vala kehekehe he fua he agaaga. (Kalatia 5:22, 23) Ko e taha vala he fua ia ko e fakaalofa. Fakaalofa a tautolu ke he Atua mo e manako ke omaoma ki a ia mo e ke fakahakohako e ia ha kua iloa e tautolu kua aoga e tau poakiaga haana ki a tautolu. Lafi ki ai, maeke he agaaga tapu ke foaki ki a tautolu e malolō ke fakamamao mai he fakahakohako he lalolagi kelea nei. (Efeso 2:2) He mogo ne fuata e aposetolo ko Paulo, ne fakaohooho a ia he tau takitaki lotu Iutaia fakatokoluga. Ka e lagomatai he agaaga tapu a ia ke hiki. Tohi e ia fakamui: “Kua maeke ia au e tau mena oti kana ke he fakamalolo mai [“he Atua,” NW] kia au.” (Filipi 4:13) Lata foki ia tautolu ke ole ma e agaaga tapu, he iloa e tautolu to tali e Iehova e tau liogi fakamooli ha tautolu.​—Salamo 10:17.

¹³ Fakaaoga foki e Iehova e fakapotopotoaga mo e tau motua ke fakahakohako a tautolu takitokotaha. Ma e fakatai, ka mailoga he tau motua kua lolelole a tautolu, to lali a lautolu ke lagomatai a tautolu. Ka e nakai foaki e lautolu e fakatonuaga ne fakavē ke he tau manatu ni ha lautolu. (Kalatia 6:1) Ka e liogi fakatokolalo a lautolu ki a Iehova ma e maamaaga mo e pulotu. Ti kumikumi a lautolu ke he Tohi Tapu mo e tau tohi faka-Kerisiano ha tautolu ke moua e tau vala tala ka lagomatai a tautolu. Ka o mai e tau motua ki a koe mo e foaki atu e fakatonuaga totonu mo e fakaalofa, liga hagaao ke he tau mena tui haau, manatu ko e fakatonuaga nei ko e fakamooliaga he fakaalofa he Atua ma haau. Ka fakagahua e koe e fakatonuaga, to tuga e kelekele molū a koe kua maeke a Iehova ke fakahakohako, mo e to aoga ki a koe.

14. Pete he pule ke he kelekele, fakakite fēfē e Iehova e fakalilifu ke he atāina ha tautolu ke fifili?

¹⁴ Ka maama e tautolu e puhala ne fakahakohako e Iehova a tautolu, maeke ai ke lagomatai a tautolu ke moua e fakafetuiaga mitaki mo e tau matakainaga ha tautolu. To moua foki e tautolu e aga mitaki hagaao ke he tau tagata he fonua ha tautolu, putoia e tau tagata fakaako Tohi Tapu ha tautolu. He vahā Tohi Tapu, ato fakahakohako e kelekele, kua lata he tagata eke kapiniu kelekele ke fakameā ai mo e utakehe e tau vala maka mo e falu mena foki. Ko e Eke Kapiniu Kelekele Mua Ue Atu ko Iehova kua lagomatai e tau tagata ne manako ke fakahakohako. Nakai peehi e ia a lautolu ke hiki, ka e fakakite e ia ki a lautolu e tau tutūaga meā haana. Ti kua lata ia lautolu ke fifili kaeke kua manako a lautolu ke hikihiki.

15, 16. Fakakite fēfē he tau tagata fakaako Tohi Tapu e manako ha lautolu ke fakahakohako e Iehova a lautolu? Fakatai.

¹⁵ Manamanatu la ke he mena ne tupu ki a Tessie, ko e matakainaga fifine i Ausetalia. Kua mukamuka lahi ki a ia ke iloa e mena ne talahau he Tohi Tapu. Ka e nakai lahi e holo ki mua haana, ti nakai fano a ia ke he tau feleveiaaga. Ne liogi e matakainaga fifine ne fakaako mo ia ki a Iehova ti fifili ke fakaoti e fakaako. Fai mena ofoofogia ne tupu. He fakaako ha laua, ne tala age a Tessie ke he faiaoga haana e kakano ne nakai holo ki mua a ia. Pehē a ia kua tuga e tagata fakatupua a ia ha kua fiafia a ia ke pelē tupe. Ka ko e mogonei ne fifili a ia ke oti e pelē tupe.

¹⁶ Nakai leva ti kamata a Tessie ke fano he tau feleveiaaga mo e fakatātā e tau mahani faka-Kerisiano pete ne vaiga he tau kapitiga fakamua haana a ia. Nakai leva, ne papatiso a Tessie ti eke mo paionia tumau, pete he ikiiki e tau tama haana. Maaliali ai ka kamata e tau tagata fakaako Tohi Tapu ke taute e tau hikiaga ke fakafiafia e Atua, to fakatata a ia ki a lautolu mo e to fakahakohako a lautolu ke eke mo tau kapiniu mitaki.

17. (a) Ko e heigoa kua futia ki a koe hagaao ki a Iehova ko e haau a Eke Kapiniu Kelekele? (e) Ko e heigoa e tau vala he fakahakohako ka fakatutala a tautolu he tapu kahau?

¹⁷ He vahā nei, falu tagata eke kapiniu ne fakahakohako agaia e kelekele aki e tau lima ke moua e tau kapiniu kelekele fulufuluola. He puhala pihia, ne fakahakohako fakaeneene e Iehova a tautolu he fakaaoga e fakatonuaga haana, ti matakite fakakikili a ia ke kitia e puhala ne tali atu a tautolu. (Totou Salamo 32:8.) Kitia nakai e koe kua manamanatu a Iehova ki a koe? Kitia nakai e koe e puhala kua fakahakohako fakaeneene e Iehova a koe? Ka pihia, ko e heigoa e tau mahani ka lagomatai a koe ke eke tumau mo kelekele molū ke maeke a Iehova ke fakahakohako? Ko e heigoa e tau aga kua lata a koe ke kalo mai ke nakai tuga e kelekele maō kua nakai maeke ke fakahakohako? Ti maeke fēfē e tau matua ke gahua mo Iehova ke fakahakohako e tau tama ha lautolu? Ko e vala tala ka mui mai ka tali e tau hūhū nei.