Fakatauo mo e Kariota he Lagi a Iehova
“Kia vagahau atu e koe haku a tau kupu kia lautolu po ke fanogonogo a lautolu, po ke nakai.”—ESEKIELU 2:7.
1, 2. Ko e heigoa e kariota he faoa patuiki ne kitia e Esekielu, mo e ko e heigoa ne tala age ki a ia?
KO E kariota he lagi a Iehova ne tu ki mua he hana a tau fekafekau. Ha ko e tau mata he tua, ne kitia ai e lautolu e puhala faifano kua lata ni mo e patuiki he ha lautolu a Iki ko e Pule Katoatoa. Ne ha ha i ai e lilifu, ofoofogia mahaki, malolo lahi.
2 Ko e peleo taha ia ni he iki ne tu ki mua he perofeta he Atua ko Esekielu ke he fakakiteaga ke he 2,600 he tau tau kua mole. Mai he peleo nei ne fua e nofoaiki—ko e fakatokatokaaga i luga he lagi ko e tau mena momoui fakaagaga he Atua—ne talahau mai e Iehova e poakiaga fakaofoofogia lahi nei ki a Esekielu: “Ko e tau tagata mata nakai ma, mo e loto mao, to fakafano atu e au a koe kia lautolu; ti pehe atu a koe kia lautolu, Kua pehe mai e vagahau he Iki ko Iehova. Ko lautolu foki po ke fanogonogo a lautolu, po ke nakai, ha ko e magafaoa fakafualoto a lautolu, to iloa ai e lautolu ha ha ia lautolu e perofeta.”—Esekielu 2:4, 5.
3. Ko e heigoa ne tatai atu he vaha fou nei ki a Esekielu?
3 Ne taute e Esekielu e fekau pauaki ia mo e malolo lahi, ko ia ni tokotaha ne fekafekau ke he lima he atua. Ko e mena taha foki ia ni, he magaaho nei ko e taha maka ni e fakatokatokaaga he Atua i loto he hana a lima. Ko e vahega Esekielu, ko lautolu ne fakauku ne toe, ha i mua ke he gahua fakamoli fakaoti, fakalataha mo e “moto tagata tokologa” he tau “mamoe kehe” ne fa e foaki e tau lagomataiaga. (Fakakiteaga 7:9, 10; Ioane 10:16) Kua fakalataha a lautolu ke he “taha e fuifui,” mo e Leveki Mamoe ne Mitaki, ko Iesu Keriso, ne takitaki a lautolu ki lalo hifo he pule katoatoa Hana ne Heke e Kariota, ko Iehova ko e Atua.
4, 5. Tupu mai fefe e fakatokatokaaga kitia he Atua, mo e ko e heigoa ne tupu ki ai ke tatai mo e Isaia 60:22?
4 I lalo hifo he fakatonuaga a Iehova, ko e fakatokatokaaga mai he lalolagi katoa nei ne tupu mai he kamataaga tote ke eke ia mo puhala malolo lahi ke tukuogo e matafakatufono ke “matakutaku a mutolu ke he Atua, mo e ta age kia ia e fakahekeaga, ha kua hoko mai e magaaho he hana a fakafiliaga.” (Fakakiteaga 14:7) Ke tuga ni a Esekielu ne nakai kotofa e ia a ia mo perofeta, ti nakai taute po ke kotofa foki ni he fakatokatokaaga kitia he Atua a ia ni. Ne nakai tupu mai he finagalo po ke laliaga he tagata. Ko Ia ne tuga e atua ne Heke he Kariota ne fakatupu mai e fakatokatokaaga nei ke ha ha i ai. Ne fakamalolo mai he agaga he Atua mo e lagomatai mai he tau agelu tapu, ne moua ai he tau tagata a Iehova e tupu lahi mai he ‘maga fakateaga mo motu malolo.’—Isaia 60:22.
5 Ko e molea e 4,000,000 he tau Fakamoli a Iehova hane fa e tukuoga e fekau he Kautu ke he 212 e tau motu. Ne fakapotopoto a lautolu ti molea e 63,000 he tau fakapotopotoaga ne fakatokatoka ke he tau takaiaga mo e tau fahi motu. Ko e tau la ofisa lalahi mo e tau fale lomi tohi hane fa e gahua ki lalo hifo he Kau Fakatufono ko e uho he matapatu he fakatokatokaaga. Ko e tuga ko e tagata tokotaha, ne o atu oti ki mua, ke fakamatala e tala mitaki, fakaako a lautolu ne talia, talaga e tau fale feleveiaga. E, ko e fakatokatokaaga kitia a Iehova hane fakatauo mo e kariota he lagi mo Ia ne Heke ai.
6. Ko e heigoa ne putoia ke fakatauo tumau mo e fakatokatokaaga kitia he Atua?
6 Kaeke ko e taha he tau Fakamoli a Iehova a koe, fakatauo nakai a koe mo e fakatokatokaaga kitia he Atua? Nakai ko e o atu ni he tau feleveiaga Kerisiano mo e fakamole e tau magaaho ke he fekafekauaga. Fakamua, ko e kakano he fakatauo ko e tupu fakahaga ki mua fakaagaga. Kua putoia ai e manamanatuaga mitaki, tuku fakamua e tau mena kua lata, mo e fakatauo mo e vaha. Ka fakatauo a tautolu mo e kariota he lagi a Iehova, ti felauaki e tau momoui ha tautolu mo e fekau ne tukuogo e tautolu.
7. Ko e ha ne lata ke manamanatu ke he mahani ha Esekielu ko e perofeta he Atua?
7 Ke lata mo e fakatauo tumau, ko e tau fekafekau a Iehova he vaha nei kua maeke ke fakaako fakalahi mai he fakafifitakiaga ha Esekielu. Pete ni ko e kotofa pauaki mo perofeta mai ia Iehova, ha ha i ai agaia ni ia Esekielu e tau logonaaga, fakaatukehe mo e tau manako. Tuga a nei, ko e tagata fuata kito fai hoana, ti matematekelea ke he mamahi he mate hana hoana. Ka e taha e mena, ne nakai galo ia ia e fekau pauaki hana ko e perofeta ha Iehova. Ka manamanatu foki ke he mahani ha Esekielu ke he falu a mena foki, ti maeke ke fakamalolo e tautolu a tautolu ni ke fakatauo mo e fakatokatokaaga kitia he Atua. Ti maeke he mena nei ke lagomatai ke fakatauo a tautolu mo e hana a fakatokatokaaga kitia.
Talia mo e Fakamoli e Fekau
8. Ke lata mo e hana a fekau pauaki, ko e heigoa e fakafifitakiaga ne fakatu e Esekielu?
8 Ne fakatu e Esekielu e fakafifitakiaga mitaki he talia mo e fakamoli hana a fekau pauaki. Ka e taha e mena, kua lata ke omaoma mo e loto malolo ke fakahoko e fekau, ha ko e mena totou e tautolu: “Ko koe foki, ko e tama he tagata aua neke matakutaku a koe kia lautolu, ti ua matakutaku a koe he tau kupu ha lautolu, pete he ha i ai a koe mo e tau akau talatala mo e tau akau fotofoto, mo e nofo ai a koe mo e tau akarava, aua neke matakutaku a koe he tau kupu ha lautolu, ti ua matakutaku a koe he tau mata ha lautolu, pete ni ko e magafaoa fakafualoto a lautolu. Kia vagahau atu e koe haku a tau kupu kia lautolu po ke fanogonogo a lautolu, po ke nakai, ha ko e tau tagata fakafualoto a lautolu. Ka ko koe ko e tama he tagata, fanogonogo mai a ke he mena ke vagahau atu ai e au kia koe, Aua neke fakafualoto a koe tuga e magafaoa fakafualoto na.”—Esekielu 2:6-8.
9. Ko e heigoa ha Esekielu ka taute ni ke ataina mai he toto?
9 Ne nakai pehe ke nakai fai logonaaga po ke matakutaku lahi a Esekielu, ke fakalagalaga tumau ke fakamoli hana a fekau. Ko e ataina mai na ia he toto kaeke ke fiafia mo e malolo ke vagahau e kupu a Iehova. Ne talahau ki a Esekielu: “Ka ko e mena kaeke ke fakamafana e koe a ia ne mahani kelea; ka e nakai liu mai a ia he hana a mahani kelea mo e hana a puhala kelea, to mate a ia he hana a mahani hepehepe; ka ko koe kua laveaki e koe a koe.”—Esekielu 3:19.
10. Fakakite moli fefe he vahega Esekielu a lautolu ke tuga e perofeta?
10 Ke tuga a Esekielu, ko e vahega Esekielu kua fakauku ne talia e fekau pauaki ha lautolu ne foaki mai he Atua mo e fakamoli foki ai. Kaeke ko e tau Fakamoli a Iehova a tautolu, kua lata a tautolu ke manatu ko e tau momoui ha tautolu mo e tau momoui he falu kua falanaki ni ke he ha tautolu a omaoma. (1 Timoteo 4:15, 16) Takitaha e Fakamoli mo e lata ke fakatauo mo e fakatokatokaaga a Iehova. To nakai pipi he Atua a tautolu ke he hana a kariota mo e toho ai a tautolu. Kua nakai fai logonaaga mo e loto mavehevehe kua fakatokolalo e lilifu Hana ne Heke e Kariota. Ko e fakatokatokaaga kitia a Iehova ne tomatoma mai ki a tautolu ke tumau e fiafia ke he atua ko e matapatu mena he ha tautolu a tau momoui. Ko e talia tumau ke he tau tomatomaaga pihia ka lagomatai a tautolu ke lata fakalataha mo e fakatokatokaaga he Atua, mo e fakatokoluga e fekafekauaga tapu i luga ke he tau puhala ne mahani ki ai, ko e taute tuga e matini taute noa ni. Ko e moli, ko e tau tagata oti a Iehova ne fakakiteaga e lautolu e tau loto fakamoli katoa. Ko e vala ha tautolu takitokotaha ke tumau ke fakatauo.
Hokotia ke he Loto e Kupu he Atua
11. Ko e heigoa e fakafifitakiaga ne fakatu e Esekielu ke lata mo e kupu he Atua?
11 Ne fakatoka foki e Esekielu e fakafifitakiaga mitaki he toka e kupu he Atua ke he hana a loto. Ha ko e poakiaga, ne kai e ia e viko tohi ne foaki age he Atua po ke tohi vakai. “Kua tuga ne meli ke he haku gutu he humelie,” he talahau e Esekielu. Pete ne puke e viko tohi ke he “tagi aue, mo e tagi, mo e tagi fekapai,” ne humelie ia ki a Esekielu, kakano he fakaaue a ia ke he lilifu ko e hukui a Iehova. Ko e mena iloa kua humelie ke he perofeta ke fakamoli e kotofaaga ne foaki mai he Atua. Ne tala age e Atua ki a ia: “Ko e tama he tagata na e, kia talia e koe ke he hau a loto, mo e fanogonogo ai a koe ke he hau a tau teliga ke he tau kupu oti ke vagahau atu ai e au kia koe.” (Esekielu 2:9-3:3, 10) Ko e tau fakakiteaga ia ne matila e mailogaaga ha Esekielu ke he tau mena ne fakaataina e Iehova a ia ke gahua ki ai mo e fakamalolo hana a fakafetuiaga mo Iehova.
12. Ko e heigoa ha Esekielu ne taute ke he molea e ua e tau tau hogofulu ke he gahua perofeta?
12 Ne foaki age ki a Esekielu e tau fakakiteaga mo e tau fekau ma e tau finagalo mo e tau vahega tagata kehekehe. Ne fanogonogo a ia fakaeneene mo e vagahau mo e gahua tuga ne fakatonu mai. Ko e tau talahauaga mo e tau puhala fou ne fakakiteaga fakahaga ki a ia ke he magahala he tau tau 22 ne gahua perofeta a ia. Ke he falu a magaaho ne vagahau e Esekielu e fekau kua fita e fai kupu pauaki. Ke he falu a magaaho, ne fakaaoga e ia e tala fakanono, tuga he takoto ki mua he piliki ke fakatai atu ki a Ierusalema. (Esekielu 4:1-8) Ko e hana a fakafifitakiaga ke he tau mena hana fakatagata, tuga hana a mahani ke he mate he hana a hoana, kua uta foki e fekau. (Esekielu 24:15-19) Kua lata ia ia ke iloa e tau mena he vaha, mo e talahau e fekau tonu mo e gahua tonu ke he magaaho tonu. Ne pipi a Esekielu ke he fakafetuiaga tata mo e holo fakapapahi ki mua mo Iehova.
13. Maeke fefe a tautolu ke ati hake e fakafetuiaga tata mo Iehova?
13 Ke tuga a ia, ke ati hake mo e fakatumau e fakafetuiaga tata mo Iehova ko e hana a tau faoa gahua auloa, kua lata ke toka loto e tautolu e Kupu he Atua. (1 Korinito 3:9) Ke fakatauo mo e fakatokatokaaga kitia he Atua ke he mena nei, kua lata ke fakatumau a tautolu mo e holoaga he tau mena kai fakaagaga ne foaki mai he tau magaaho kua lata. (Mataio 24:45-47) Ko e “vagahau mea” kua tumau e holo ki mua. (Sefanaia 3:9, NW) Ko e talia omaoma ni a tautolu ke he fakatonuaga Hana ne Heke e Kariota kaeke ni ka iloa e tau mena he tau magaaho tonu.
14, 15. Ko e heigoa e fakaholoaga kua lata ke fakatauo tumau mo e mafiti ne fakatu he fakatokatokaaga he Atua?
14 Ke hoko atu ke he fakaotiaga ia, kua lata ke ha ha ia tautolu e fakaholoaga mitaki ke he liogi takitokotaha, fakaako takitokotaha mo e gahua auloa ke he fekafekauaga tapu he tala mitaki. (Roma 15:16) Manatu e fakafifitakiaga a Esekielu ne kai e viko tohi ne toka ai e fekau he Atua. Ne kai e Esekielu e viko tohi katoa, nakai ko e vala mai he tohi. Ne nakai lagaki mo e fifili mai ne ia e vala ne fiafia a ia ki ai. Tuga a ia, ke he ha tautolu a fakaako takitokotaha ke he Tohi Tapu mo e tau tohi Kerisiano kua lata ke fakatokatoka ke fakatauo mo e tafe he tau mena kai fakaagaga, mo e kua lata ia tautolu ke kai e tau mena oti ne tuku i luga he laulau fakaagaga, fakalataha foki mo e tau mena hokulo he kupu moli.
15 Fa liogi nakai a tautolu ke maama e tau mena kakano lahi fakaagaga? Kua lata he fakatauo tumau ha tautolu ke mahomo ki mua e lotomatala mo e maama ke molea atu he tau mena ikiiki he kamataaga, ha kua totou e tautolu: “Ha ko lautolu oti kua kai huhu, nakai maama a lautolu ke he kupu he tututonu; ha ko e tau tama mukemuke a lautolu. Ka ko e tau mena kakano, kua lata ia mo e tau tagata motua, ko lautolu ni kua mahani he ako mua ai ke mailoga e tau mena mitaki mo e tau mena kelea.” (Heperu 5:13, 14) E, ko e tupu fakaagaga, ko e taha vala ne mua he aoga he fakatauo tumau mo e mafiti ne fakatoka mai he fakatokatokaaga he Atua.
Nakai Taofi he Nakai Fia Iloa
16, 17. Gahua fefe a Esekielu mo e mahani nakai fia iloa, va, mo e nakai fai tali ne moua?
16 Ne fakatu foki e Esekielu e fakafifitakiaga mitaki he omaoma ka e nakai fakaata e ia a ia ke mataofi he nakai fia iloa po ke va. Tuga ni a ia, ka fakatauo tumau mo e fakaholoaga he vagahau mea, kua mahani lahi a tautolu ke he fakatonuaga Hana ne Heke e Kariota he patuiki. Ti mautali a tautolu ke taute hana a tau poakiaga, fakamalolo ke nakai mataofi he nakai fia iloa po ke va mai a lautolu ne vagahau e tautolu e fekau he fakafiliaga a Iehova ki ai. Ke tuga a Esekielu, ne hataki tuai mai e Atua ki a tautolu ko e totoko e falu tagata, ulu mao mo e loto mao. Ne nakai logona he falu kakano he nakai manako ke fanogonogo ki a Iehova. (Esekielu 3:7-9) Ka ko e falu to fakatupua, tuga he talahau he Esekielu 33:31, 32: “Kua o mai foki a lautolu kia koe tuga he o mai e motu haku, kua nonofo foki a lautolu ki mua hāu tuga he nonofo ai e motu haku, ti logona foki e lautolu e tau kupu hāu, ka e nakai omaoma a lautolu ki ai; ha kua fakaalofa noa a lautolu mo e tau gutu ha lautolu, ka kua hagao atu e tau loto ha lautolu ke he velevelemena ha lautolu. Kitiala, kua eke a koe kia lautolu ke tuga e lologo fulufuluola he tagata ne leo mitaki, mo e ta fakamitaki e akau fakatagi; ka kua logona e lautolu hāu a tau kupu ka e nakai omaoma a lautolu ki ai.”
17 Ko e heigoa e fakaotiaga? Esk 33 Kupu 33 ne lafi mai: “Ka hohoko e tau mena ia, kitiala kua hohoko mai, ti iloa ai e lautolu ne ha i ai mo lautolu e perofeta.” Ne fakakiteaga mai he tau kupu ia ne nakai tiaki e Esekielu he nakai fai tali. Ko e fakateaga he falu ne nakai taute a ia ke fakateaga foki. Ko e fanogonogo e tau tagata po ke nakai, ne omaoma a ia ke he Atua mo e fakamoli hana a fekau pauaki.
18. Ko e heigoa e tau huhu ke liga ke huhu hifo ni e koe ki a koe?
18 Ko e fakatokatokaaga kitia ha Iehova he mogonei hane pehi fakamalolo e tukuogoaga kua lata ke matakutaku oti ke he Atua mo e tuku ki a ia e lilifu. Fakamakamaka tumau nakai a koe he magaaho ka ekefakakelea mai ha ko e tu malolo ke he fakamoliaga he Kautu, mo e mahani mitaki hau a moui? Tumau nakai a koe kaeke ko koe e matapatu ne eke fakakelea mai ki ai ha ko e nakai talia he toto, nakai tapuaki ke he tau fakamailoga he kautu, nakai fakamanatu e tau okiokiaga fakalalolagi?—Mataio 5:11, 12; 1 Peteru 4:4, 5.
19. Ke lata ia mo e fakatonuaga, ko e heigoa ha tautolu ka taute kaeke ke fakatauo tumau a tautolu mo e kariota he lagi a Iehova?
19 Nakai mukamuka e puhala nei, ka ko lautolu ne fakauka ke he fakaotiaga ka fakamoui. (Mataio 24:13) Ha ko e lagomatai a Iehova, to nakai toka e tautolu e tau tagata he lalolagi ke taute a tautolu ke tuga a lautolu, mo e utakehe mai a tautolu he fakatauo mo e kariota he lagi a Iehova. (Esekielu 2:8; Roma 12:21) Kaeke ko e fakatauo tumau a tautolu mo e fakatokatokaaga agelu ne tuga e kariota, to mafiti lahi a tautolu ke omaoma ke he tau fakatonuaga mo e tau fakaakoaga ne moua mai he fakatokatokaaga kitia he Atua. Ne foaki mai e Iehova e tau mena ne manako ki ai a tautolu ke fakafeleveia aki e tau totoko mai ke he ha tautolu a tua, ke kuku mau a tautolu ke he Kupu he moui, mo e toka mata e tautolu e tau mena moli fakaagaga ne tu uho ki a Ia ko e Lilifu ne Heke e kariota he lagi.
Fakaohooho ke Fakatauo Tumau
20. Ko e heigoa e falu a mena ne fakamau e Esekielu ne kua lata ke fakaohooho aki a tautolu ke fakatauo tumau?
20 Kua lata he tau fakakiteaga ha Esekielu ke fakaohooho a tautolu ke fakatauo tumau. Ne nakai fakailoa ni e ia hokoia e fakafiliaga he Atua ki a Isaraela ka e fakamau foki e tau perofetaaga he fakafouaga. Ne tuhi a Esekielu ki a Ia ne ha ha i ai e tonu ke he matafakatufono ke pule ti nofo he nofoaiki a Iehova ke he magaaho kotofa. (Esekielu 21:27) Ko e Fekafekau he Magafaoa Patuiki, ko “Tavita” ka liu fakapotopoto e tau tagata he Atua mo e leveki foki a lautolu. (Esekielu 34:23, 24) Pete ne totoko e Koku i Makoku a lautolu, to fakahao he Atua a lautolu, ko e Hana a tau fi to fakaohooho ke ‘iloa a Iehova’ pete ni he o atu a lautolu ke he moumouaga. (Esekielu 38:8-12; 39:4, 7) Ti maeke he tau fekafekau he Atua ke fiafia ke he moui nakai fai fakaotiaga ke he fakatokaaga he tapuakiaga mea ne putoia ai e faituga fakaagaga. Ko e vai he moui ne tafe mai he faituga to eke ia mo punaaga he tau mena kai mo e fakamaloloaga, mo e tufaaga he kelekele ka foaki age ma e ha lautolu a fakamonuinaaga.—Esekielu 40:2; 47:9, 12, 21.
21. Ko e ha ne lahi mahaki e gahua he tau Fakamoli a Iehova he vaha fou nei, ke he ha Esekielu?
21 Liga lahi e fiafia a Esekielu ke fakamau e tau perofetaaga ia! Ka e taha e mena, lahi mahaki atu e gahua he tau Fakamoli a Iehova he vaha nei. Ko e momoui a tautolu ke he magahala ne fakamoli ai e falu he tau perofetaaga ia. Ko e moli, ko tautolu ne gahua fakalataha ke he falu a fakamoliaga. Ke he ha tautolu a tau momoui, fakakiteaga takitokotaha nakai e tautolu ha tautolu a taofiaga kua pule a Iesu ke he magaaho nei, ko Ia ne ha ha i ai e tonu ke he matafakatufono ke pule? Taofi moli nakai a tautolu takitokotaha kua nakai leva to fakatapu e Iehova a ia ni mo e fakahao ke he hana a lalolagi fou a lautolu ne fakatauo mo e hana a fakatokatokaaga? (2 Peteru 3:13) Ko e taofiaga pihia, fakalataha mo e tau gahua he tua, kua fakakiteaga ko e fakatauo moli a tautolu mo e kariota he lagi a Iehova.
Matutaki ke Fakatauo Tumau
22. Ko e heigoa kua maeke ke taute ke kalo kehe mai he tau fakatauhele ke maeke ke tumau e maali he onoonoaga fakaagaga?
22 Ha ko e ‘toto ha tautolu a lima ke he arote,’ kua nakai lata ke haga ki tua mo e manako ke he ha mena he lalolagi ka foaki. (Luka 9:62; 17:32; Tito 2:11-13) Ti kua lata ia tautolu ke taofi ha manako ke ati hake e tau koloa he lalolagi, ka kia fakamukamuka ha tautolu a tau mata, mo e ono ni ke he Kautu. (Mataio 6:19-22, 33) Ka fakamukamuka ha tautolu a tau momoui, tuku kehe e tau mamafa he tau mena he moui he tau aho oti he lalolagi he tau magaaho kua maeke ai, ke lagomatai a tautolu ke fakatauo tumau mo e fakatokatokaaga a Iehova. (Heperu 12:1-3) Maeke he tau fakatauhele ke fakapulefu ha tautolu a tau kitiaaga ke he kariota he lagi mo Ia ne Heke ai. Ka ko e hana a lagomatai, kua maeke ia tautolu ke tumau e maali he onoonoaga fakaagaga, tuga ha Esekielu.
23. Ko e heigoa kua lata ke taute he tau Fakamoli ne loto fakamoli, ma lautolu ne fou agaia?
23 Ko e taha vala he kavega ha tautolu ha ko e tau Fakamoli a Iehova ke lagomatai ia lautolu tokologa ne fou ke fakatauo tumau mo e hana a kariota he lagi. Ke he 1990 kua teitei 10,000,000 ne fakalataha ke he Fakamanatuaga he mate a Iesu Keriso. Pete ne tokologa ha lautolu nei ne liga fakalataha ke he gahoa ni e tau feleveiaga Kerisiano, kua lata ke kitia e lautolu e aoga he tupu fakalataha mo e fakatokatokaaga kitia a Iehova. Maeke ia tautolu ko e tau Fakamoli kua loto fakamoli lahi ke lagomatai a lautolu he kitia e agaga ne fakakiteaga e tautolu mo e tau fakamaloloaga ha tautolu kua foaki.
24. Ko e heigoa ha tautolu kua lata ke taute he fakahikuhikuaga he vaha nei ke he tau mena tutupu?
24 Ko e tau vaha kua fakahikuhiku a nei he tau mena tutupu. Ha ko e tau mata he tua, ne kitia e tautolu e kariota he lagi ne tu i mua ha tautolu. Ko e Ia he magafaoa patuiki ne Heke e Kariota ne foaki ke he hana fakatokatokaaga kitia e fekau pauaki ke fakamatala ke he tau motu ke maeke ke iloa e lautolu he fakahikuaga ko hai a Iehova. (Esekielu 39:7) Kia gahua eketaha ke he magaaho mitaki lahi nei ke gahua auloa ke he fakatokolugaaga he pule he Atua mo e fakatapuaga he hana a higoa tapu ha ko e fakatauo tumau mo e kariota he lagi a Iehova.
To Tali Fefe e Koe?
◻ Ko e heigoa e fakafifitakiaga ne fakatu e Esekielu ke lata mo e hana a fekau pauaki?
◻ Ko e heigoa e kakano he fakatauo tumau mo e fakatokatokaaga he Atua?
◻ Fefe e onoonoaga ha Esekielu ke he tau kupu he Atua?
◻ Maeke fefe ia tautolu ke mumui tua ke he fakafifitakiaga ha Esekielu ne taute ke fakafeleveia aki e mahani nakai fia iloa?
◻ Ko e heigoa kua lata ke fakaohooho aki e tau fekafekau a Iehova ke fakatauo tumau mo e hana a kariota he lagi?
[Tau Fakatino he lau 17]
Ko e heigoa kua lata ke ha ha ia tautolu ke fakatauo tumau mo e kariota he lagi a Iehova?
[Fakatino he lau 18]
Ne loto fakaaue a Esekielu ke he tau fakamonuinaaga hana ne foaki age he Atua. Pihia nakai a koe?