FAKAAKOAGA 34
Fakakite Fēfē e Tautolu e Fakaalofa ki a Iehova?
Kua logona hifo nakai e koe e tata lahi ke he Atua he kamata ke fakaako e Tohi Tapu? Manako nakai a koe ke matutaki ke fakamalolō e kapitiga haau mo ia? Ka pihia, manatu ka kitia e Iehova kua tupu lahi e fakaalofa haau ki a ia, to lahi e fakaalofa mo e leveki haana ki a koe. Fakakite fēfē e koe kua fakaalofa a koe ki a ia?
1. Fakakite fēfē e fakaalofa ha tautolu ki a Iehova?
Fakakite e tautolu e fakaalofa ki a Iehova he omaoma ki a ia. (Totou 1 Ioane 5:3.) Nakai fakaohooho e ia ha tagata ke omaoma ki a ia. Ka e foaki e ia ki a tautolu takitokotaha e magaaho ke fifili ke omaoma po ke nakai omaoma ki a ia. Ko e ha? Manako a Iehova ki a tautolu ke “omaoma . . . mo e tau loto.” (Roma 6:17) Kakano kua manako a ia ki a koe ke omaoma ha kua fakaalofa a koe ki a ia, ka e nakai ha kua poaki. He Vala 3 mo e 4 he tohi nei kua lagomatai ki a koe ke fakakite e fakaalofa ki a Iehova he taute e mena kua fakafiafia a ia mo e kalo kehe he nakai fakafiafia a ia.
2. Ko e ha kua uka ke fakakite e tautolu e fakaalofa ki a Iehova?
“Loga e tau mena kelea ke hohoko ke he tagata tututonu.” (Salamo 34:19) Taufetului a tautolu oti ha ko e nakai mitaki katoatoa. Liga lauia foki a tautolu he tau lekua fakatupe, nakai fakafili tonu, mo e falu mena vihi. Ka fehagai a tautolu mo e tau mena uka, to nakai mukamuka ke taute e mena ne manako a Iehova. Kakano kua liga mukamuka ke nakai omaoma. Kaeke ke taute fakamooli e koe e mena ne tala atu e Iehova ki a koe, kua fakakite e koe e fakaalofa katoatoa haau ki a ia. Ti fakakite e koe e mahani fakamooli, po ke mahani hakohako haau ki a ia. To mahani fakamooli foki a ia ki a koe. To nakai tiaki e ia a koe.—Totou 2 Samuela 22:26.
KUMIKUMI FAKAHOKULO
Kumikumi e kakano ne aoga e omaoma haau ki a Iehova, ti fakaako e mena ka lagomatai a koe ke tumau e fakamooli ki a ia.
3. Ko e matakupu kua putoia a koe
He tohi ha Iopu he Tohi Tapu, tukupau fakakelea e Satani a Iopu mo e tau tagata oti ne manako ke fekafekau ki a Iehova. Totou Iopu 1:1, 6–2:10, ti tutala ke he tau hūhū nei:
Pehē a Satani, ko e ha ne omaoma a Iopu ki a Iehova?—Kikite e Iopu 1:9-11.
Ko e heigoa ne talahau e Satani hagaao ke he tau tagata oti, putoia a koe?—Kikite e Iopu 2:4.
Totou Iopu 27:5e, ti tutala ke he hūhū nei:
Fakakite fēfē e Iopu kua fakaalofa mooli a ia ki a Iehova?
Fakakite e Iopu e fakaalofa ki a Iehova he tumau ke fakamooli ki a ia
Fakakite e tautolu e fakaalofa ki a Iehova he tumau ke fakamooli ki a ia
4. Fakafiafia e loto ha Iehova
Totou Tau Fakatai 27:11, ti tutala ke he tau hūhū nei:
Fēfē e logonaaga ha Iehova ka iloilo mo e omaoma a koe ki a ia? Ko e ha?
5. Maeke a koe ke fakamooli ki a Iehova
Ko e fakaalofa ki a Iehova kua omoomoi a tautolu ke tutala ke he falu hagaao ki a ia. Ko e fakamooli ki a ia kua omoomoi a tautolu ke taute pihia pete kua nakai mukamuka. Tā e VITIŌ, ti tutala ke he tau hūhū nā.
Uka nakai ki a koe ke tutala ke he falu hagaao ki a Iehova?
He vitiō, ko e heigoa ne lagomatai a Grayson ke kautū ke he matakutaku haana?
Mukamuka lahi ke fakamooli ki a Iehova ka fiafia a tautolu ke he mena ne fiafia a ia ki ai mo e vihiatia e mena kua vihiatia e ia. Totou Salamo 97:10, ti tutala ke he tau hūhū nei:
Ke he tau mena ne fakaako e koe, ko e heigoa falu mena kua fiafia a Iehova ki ai? Ko e heigoa falu mena ne vihiatia e ia?
Fakaako fēfē a koe ke fiafia ke he mena mitaki mo e vihiatia e mena kelea?
6. Aoga ki a tautolu ka omaoma ki a Iehova
Fua mitaki tumau e omaoma ki a Iehova. Totou Isaia 48:17, 18, ti tutala ke he tau hūhū nei:
Manatu nakai a koe na maeke ke falanaki kua iloa tumau e Iehova e mena mitaki lahi ma tautolu? Ko e ha?
Aoga fēfē ki a koe mogonei he fakaako e Tohi Tapu mo e Atua mooli ko Iehova?
PEHĒ FALU TAGATA: “Nakai lauia e Atua ha ko e tau gahua haaku.”
Ko e heigoa e kupu Tohi Tapu ka fakaaoga e koe ke fakakite kua lauia a Iehova ha ko e tau gahua ha tautolu?
MANATU KATOA
Fakakite e koe e fakaalofa ki a Iehova he omaoma mo e fakamooli tumau ki a ia pete e tau lekua.
Liu Fakamanatu
Ko e heigoa ne fakaako e koe he fakafifitakiaga ha Iopu?
To fakakite fēfē e koe e fakaalofa ki a Iehova?
Ko e heigoa ka lagomatai a koe ke tumau e fakamooli ki a Iehova?
KUMI FOKI
Kumikumi ke he puhala ka fakamooli a koe ki a Iehova mo e fakapotopotoaga.
Fakaako foki ke he tau tukupau ha Satani ke he tau tagata.
“Tumau e Fakamooli ha Iopu” (The Bible—What Is Its Message? vala 6)
Manamanatu ke he puhala ka fakakite foki e lautolu ne ikiiki e fakaalofa ki a Iehova.
Fehagai fēfē e tama fuata ke he peehiaga he falu fuata ke fakamooli ke he Atua?