Kakano ke Tuuho

Fakaako e Iesu ko e tau tutaki haana ne “nakai ko e tau tagata he lalolagi.” (Ioane 15:19) Putoia ai e tuuho he nakai kau ke he tau politika mo e tau felakutaki he lalolagi. Ka e nakai mukamuka tumau ke tuuho. Liga vaiga ki a tautolu ha ko e mena nei. Tumau fēfē a tautolu ke tuuho mo e fakamooli ki a Iehova ko e Atua?

1. Fēfē e onoonoaga he tau Kerisiano mooli ke he tau fakatufono he tagata?

Fakalilifu he tau Kerisiano e fakatufono. Taute e tautolu e tau mena ne talahau e Iesu he “uta a kia Kaisara e tau mena a Kaisara” he omaoma ke he tau matafakatufono motu, tuga e lata ke totogi e tau tukuhau. (Mareko 12:17) Fakaako he Tohi Tapu kua pule ni e tau fakatufono he tagata ha kua fakaatā e Iehova ke pule. (Roma 13:1) Ti mailoga e tautolu ko e tau fakatufono he tagata kua fakakaupā e pule. Onoono a tautolu ke he Atua mo e Kautu haana he lagi ke fakamafola e tau lekua he tagata.

2. Fakakite fēfē e tautolu kua tuuho a tautolu?

Tuga a Iesu, kua nakai fakalataha a tautolu ke he tau politika. Mogo ne kitia he tau tagata e taha he tau mana ha Iesu, lali a lautolu ke fakatū a ia mo patuiki ha lautolu he lalolagi, ka e nakai fakaatā e ia. (Ioane 6:15) Ko e ha? Ha kua talahau e ia he mogo fakamui, “nakai ko e kautu he lalolagi nai haku a kautu.” (Ioane 18:36) Ha ko e tau tutaki ha Iesu a tautolu, kua maeke ke fakakite e tuuho ke he loga e puhala. Ma e fakatai, nakai ō a tautolu ke he felakutaki. (Totou Mika 4:3.) Fakalilifu e tautolu e tau fakamailoga fakamotu, tuga e futi matini​—ka e nakai tapuaki a tautolu ki ai. (1 Ioane 5:21) Ti nakai kau po ke totoko a tautolu ke he matakau politika po ke ha tagata vili. He tau puhala nei mo e falu foki, fakakite e tautolu kua fakamooli katoatoa ke he fakatufono he Atua​—ko e Kautu haana.

KUMIKUMI FAKAHOKULO

3. Tuuho e tau Kerisiano mooli

Fakatoka e Iesu mo e tau tutaki haana e fakafifitakiaga ma tautolu. Totou Roma 13:1, 5-7 mo e 1 Peteru 2:13, 14. Ti tā e VITIŌ, mo e tutala ke he tau hūhū nā.

VITIŌ: Tuuho e Tau Kerisiano Mooli​—Vala 1 (4:28)

• Ko e ha kua lata a tautolu ke fakalilifu e tau tui ne mua?

• Ko e heigoa falu puhala kua fakakite e tautolu kua omaoma a tautolu ki a lautolu?

He tau magahala felakutaki, falu motu ne liga talahau kua tuuho a lautolu, ka e lalago e lautolu e tau faahi ne ua. Ko e heigoa e tuuho mooli? Totou Ioane 17:16. Ti, tā e VITIŌ mo e tutala ke he hūhū nā.

VITIŌ: Tuuho e Tau Kerisiano Mooli​—Vala 2 (3:11)

• Ko e heigoa e kakano ke tuuho?

Ka e kua ka poaki e tau tui ne mua ke taute e mena ne nakai fetataiaki mo e matafakatufono he Atua? Totou Gahua 5:28, 29. Ti tā e VITIŌ, mo e tutala ke he tau hūhū nā.

VITIŌ: Tuuho e Tau Kerisiano Mooli​—Vala 3 (1:18)

• Ka nakai fetataiaki e matafakatufono he tagata mo e matafakatufono he Atua, ha hai e matafakatufono kua lata a tautolu ke omaoma?

• Maeke nakai a koe ke manamanatu ke he tau tuaga kua nakai lata e tau Kerisiano ke omaoma ke he tau tui ne mua?

4. Tuuho ke he tau manatu mo e tau gahua

Totou 1 Ioane 5:21. Ti, tā e VITIŌ mo e tutala ke he tau hūhū nā.

VITIŌ: Kakano kua Lata e Tau Kerisiano Mooli ke Loto Malolō​—Ke Tumau e Tuuho (2:49)

• He vitiō, ko e ha kua fifili a Ayenge ke nakai fakalataha ke he matakau fakapolitika po ke fai vala he tau fakamanatuaga fakamotu tuga e saluti he matini?

• Manatu nakai a koe kua iloilo e fifiliaga haana?

Ko e heigoa falu tuaga ka kamatamata e tuuho ha tautolu? Tā e VITIŌ, ti tutala ke he tau hūhū nā.

VITIŌ: Tau Fakaakoaga Mai he Ko e Kolo Toko​—Tumau ke Tuuho he Lalolagi Mavehevehe (5:16)

• Tumau fēfē a tautolu ke tuuho ka kitekite ke he tau feua sipote he lalolagi katoa?

• Tumau fēfē e tuuho ha tautolu pete he lauia a tautolu he tau fifiliaga he tau tagata politika?

• Lauia fēfē e tuuho ha tautolu ha ko e tau vala tala ne logona e tautolu po ke tau tagata ne lafi mo tautolu?

MANATU KATOA

Eketaha e tau Kerisiano ke tuuho fakapolitika ke he ha lautolu a tau manatu, tau kupu, mo e tau gahua.

Liu Fakamanatu

• Ko e ha ne omaoma a tautolu ke he tau fakatufono he tagata?

• Ko e ha kua tumau a tautolu ke tuuho fakapolitika?

• Ko e heigoa e tau tuaga ka kamatamata e tuuho ha tautolu?

KUMI FOKI

Ko e heigoa e tau mena ha tautolu kua lata ke taute ke tumau e tuuho?

Nakai Tiaki e Iehova a Tautolu (3:14)

Ko e heigoa he tau magafaoa ka taute ke mautauteute tuai ma e tau kamatamata he tuuho?

Tumau e Tuuho he Tau Toloaga (4:25)

Ko e ha e lalago he motu ne nakai ko e lilifu lahi kua lata ke moua he tagata?

“Maeke e Tau Mena Oti Kana ke he Atua” (5:19)

Manamanatu ke he puhala ke tumau e nakai ko e tau tagata he lalolagi ka fifili e gahua tupe haau.

“To Igatia e Tagata mo e Fua Hana Ni a Kavega” (Ko e Kolo Toko, Aperila 1, 2006)