Mautali Nakai a Koe ke Papatiso?

Loga e mena kua fakaako e koe hagaao ki a Iehova mai he Tohi Tapu. Liga taute e koe e falu hikiaga ke fakagahua e mena ne fakaako e koe. Ka e liga fai mena ne taofi a koe he tukulele e moui ti papatiso ki a Iehova. To fakatutala e fakaakoaga nei ke he falu lekua fa mahani ke papatiso mo e to kautū a koe ki ai.

1. Lahi fēfē e mena haau kua lata ke iloa ato papatiso a koe?

Ke papatiso, lata a koe ke moua e “maama [hako] ke he kupu moli.” (1 Timoteo 2:4) Nakai kakano e mena nei ke iloa e koe e tali ke he tau hūhū takitaha he Tohi Tapu to papatiso a koe. Ko e tau Kerisiano foki ne kua leva e papatiso ne matutaki ke fakaako. (Kolose 1:9, 10) Ka e lata a koe ke moua e maamaaga kua aoga he tau fakaakoaga he Tohi Tapu. To lagomatai he tau motua he fakapotopotoaga a koe ke iloa kua lahi e maamaaga haau.

2. Ko e heigoa e falu lakaaga kua lata a koe ke taute ato papatiso?

Ato papatiso a koe, lata ke “tokihala . . . mo e mafokifoki.” (Totou Gahua 3:19.) Kakano ai ke tokihala mooli ke he tau agahala kua taute e koe ti ole ki a Iehova ke fakamagalo a koe. Tiaki katoatoa foki e koe e mahani kelea mo e eketaha ke moui fakatatau ke he puhala kua fakafiafia e Atua. Lafi ki ai, kamata a koe ke fakalataha ke he tau matagahua he fakapotopotoaga he fano ke he tau feleveiaaga mo e fakamatala ko e tagata fakailoa nakaila papatiso.

3. Ko e ha kua nakai lata ke fakaatā e matakutaku ke taofi a koe?

Falu kua matakutaku to nakai maeke a lautolu ke taute e mena ne mavehe ki a Iehova. Mooli, ko e falu magaaho to taute e koe e tau hehē, na pihia foki e tau tagata fakamooli i loto he Tohi Tapu. Ka e nakai amanaki a Iehova ke he tau fekafekau haana ke mitaki katoatoa. (Totou Salamo 103:13, 14.) Fiafia a ia ka taute e koe e tau mena oti kua maeke! To lagomatai e ia a koe. Fakamafana e Iehova a tautolu to nakai fai mena ke “fakamavehe a tautolu mo e fakaalofa [haana].”​—Totou Roma 8:38, 39.

KUMIKUMI FAKAHOKULO

4. Lali ke iloa mitaki a Iehova

Iloa mitaki fēfē e koe a Iehova ato papatiso? Lata a koe ke iloa mitaki a ia ke fakaalofa mo e manako ke fakafiafia a ia. Tā e VITIŌ ke kitia e mena ne taute he tau tagata fakaako Tohi Tapu he lalolagi katoa. Ti tutala ke he hūhū nā.

VITIŌ: Puhala ke he Papatiso (3:56)

• He vitiō, ko e heigoa ne lagomatai falu ke mautali ke papatiso?

Totou Roma 12:2, ti tutala ke he tau hūhū nei:

• Fakauaua nakai a koe ke he mena ne fakaako he Tohi Tapu po ke ko e kupu mooli nakai ne fakaako he Tau Fakamoli a Iehova?

• Ka pihia, ko e heigoa ka taute e koe?

5. Kautū ke he ha mena uka ke papatiso

Ka fifili a tautolu ke tukulele e tau momoui ki a Iehova mo e papatiso, fehagai a tautolu oti mo e tau mena uka. Ke kitia e fakafifitakiaga, tā e VITIŌ, ti tutala ke he tau hūhū nā.

VITIŌ: Ko e Fakaalofa ki a Iehova kua Kautū ke he Tau Mena Uka (5:22)

• He vitiō, ko e heigoa e tau mena uka ne lata a Narangerel ke kautū ke fekafekau ki a Iehova?

• Lagomatai fēfē he fakaalofa ki a Iehova a ia ke kautū ke he tau mena uka nei?

Totou Tau Fakatai 29:25 mo e 2 Timoteo 1:7, ti tutala ke he hūhū nei:

• Ko e heigoa ne foaki ki a tautolu e loto malolō ke kautū ke he tau mena uka?

6. Falanaki ke he lagomatai ha Iehova

To lagomatai e Iehova a koe ke fakafiafia a ia. Tā e VITIŌ, ti tutala ke he tau hūhū nā.

VITIŌ: To Lagomatai e Iehova ko e Atua a Koe (2:50)

• He vitiō, ko e heigoa ati taofi e tagata fakaako Tohi Tapu ke papatiso?

• Ko e heigoa ne fakaako e ia ati lagomatai ke fakamalolō e falanaki haana ki a Iehova?

Totou Isaia 41:10, 13, ti tutala ke he hūhū nei:

• Ko e ha kua mauokafua a koe to fakamooli e maveheaga ne taute e koe he tukulele e moui?

7. Fakahokulo e loto fakaaue haau ke he fakaalofa ha Iehova

Ko e lahi e manamanatu haau ke he fakaalofa ha Iehova ki a koe, to lahi e loto fakaaue haau mo e manako ke fekafekau tukulagi ki a ia. Totou Salamo 40:5, ti tutala ke he hūhū nei:

• Ko e heigoa e tau monuina ha Iehova kua fakaaue pauaki a koe ki ai?

Ko e perofeta ko Ieremia ne fakaalofa ki a Iehova mo e fiafia ke he kupu haana, ti hokulo e fakaaue haana ke he lilifu he fakailoa e higoa ha Iehova. Pehē a ia: “Ti eke hau a tau kupu kia au mo mena ke olioli ai mo e fiafia ia haku loto; ha kua ui au ke he hau a higoa, Iehova na e, ko e Atua.” (Ieremia 15:16) Tali e tau hūhū nei:

• Ko e ha ko e lilifu pauaki ke eke mo taha he Tau Fakamoli a Iehova?

• Manako nakai a koe ke papatiso ko e taha he Tau Fakamoli a Iehova?

• Fai mena kia ne taofi a koe he taute pihia?

• Ko e heigoa he manatu e koe kua lata ke taute ke hokotia ke he foliaga ke papatiso?

MANATU KATOA

Ka ko e lagomatai ha Iehova, maeke a koe ke kautū ke he tau mena uka ke papatiso.

Liu Fakamanatu

• Lahi fēfē e maamaaga haau ke he Tohi Tapu ato papatiso?

• Ko e heigoa e tau hikiaga ka lata a koe ke taute ato papatiso?

• Ko e ha ne nakai lata a koe ke fakaatā e matakutaku ke taofi a koe?

KUMI FOKI

Manamanatu ke he kakano kua fakavē e fifiliaga haau ke papatiso.

“Mautali Nakai a Koe ke Papatiso?” (Ko e Kolo Toko, Mati 2020)

Fakaako e puhala ke kautū ke he tau paleko pauaki ka taofi a koe.

“Lekua He Ha ke Nakai Papatiso Au?” (Ko e Kolo Toko, Mati 2019)

Kitia e puhala ne kautū e taha tagata ke he falu mena uka lahi ke maeke ke papatiso.

‘Ko e Ha ne Fakatuai a Koe ke Papatiso?’ (1:10)

He kamata aki, fakauaua a Ataa ke papatiso. Kitia e kakano ati talitonu a ia ke taute e lakaaga aoga nei.

Lata Mooli Kia ke Moua e Au e Mena Nei? (7:21)