Kia Fakamooli ke he Tau Mena Oti

Manako e tau tagata oti ke he tau kapitiga kua fakamooli. Amanaki foki a Iehova ke he tau kapitiga haana ke fakamooli. Ka e nakai mukamuka ai he lalolagi ne tokologa e tagata ne nakai fakamooli. Ko e heigoa e fua mitaki he fakamooli ke he tau mena oti?

1. Ko e heigoa e kakano aoga lahi ke fakamooli?

Ka fakamooli a tautolu ke he falu, fakakite e tautolu ki a Iehova e fakaalofa mo e fakalilifu ki a ia. Manatu: Iloa e Iehova e tau mena oti kana kua manamanatu mo e taute e tautolu. (Heperu 4:13) Mailoga e ia ka fifili a tautolu ke fakamooli, ti loto fakaaue a ia. Pehē e Kupu haana: “Kua vihiatia e Iehova e tagata mahani keukeu; ka kua feofanaki a ia mo lautolu ne mahani hakohako.”​—Tau Fakatai 3:32.

2. Ko e heigoa falu puhala ke fakamooli a tautolu he moui he tau aho takitaha?

Manako a Iehova ki a tautolu ke “vagahau . . . mo e tau kupu moli ko e taha ke he taha.” (Sakaria 8:16, 17) Ko e heigoa e kakano he mena nei? Ka tutala a tautolu ke he magafaoa, tau tagata gahua, tau matakainaga Kerisiano, po ke tau pule he fakatufono, kua nakai pikopiko po ke tala age e tautolu e tau vala tala fakavai. Ko e tau tagata fakamooli kua nakai kaihā po ke pikopiko ke he falu. (Totou Tau Fakatai 24:28 mo e Efeso 4:28.) Totogi e lautolu e tau tukuhau oti ha lautolu. (Roma 13:5-7) He tau puhala nei mo e falu puhala foki ha tautolu kua “mahani mitaki [fakamooli] ke he tau mena oti kana.”​—Heperu 13:18.

3. Ko e heigoa e tau fua mitaki he fakamooli?

Ka iloa kua mahani fakamooli tumau a tautolu to falanaki e falu ki a tautolu. To lafi e tautolu ke he fakapotopotoaga e aga haohao mitaki, tuga he magafaoa. Moua e tautolu e loto manamanatu meā. Maeke foki he mahani fakamooli ha tautolu ke “fakalilifu ai . . . e tau kupu he Atua, ha tautolu a Fakamoui,” mo e futiaki a lautolu i fafo he fakapotopotoaga ke he tapuaki mooli.​—Tito 2:10.

KUMIKUMI FAKAHOKULO

4. Fakafiafia he mahani fakamooli a Iehova

Totou Salamo 44:21 mo e Malaki 3:16, ti tutala ke he tau hūhū nei:

• Ko e ha he manatu haau kua nakai pulotu ke talitonu kua maeke a tautolu ke fufū e tala mooli?

• Fēfē e manatu haau ke he logonaaga ha Iehova ka fifili a tautolu ke talahau e tala mooli, pete ka uka ke taute pihia?

5. Mahani fakamooli he tau magaaho oti

VITIŌ: Ko e Heigoa ne Lafi ke he Fiafia?​—Loto Manamanatu Meā (2:32)

Totou Heperu 13:18, ti tutala ke he puhala ka fakamooli a tautolu . . .

• ke he magafaoa.

• he gahuaaga po ke aoga.

• he falu tuaga.

6. Aoga lahi e mahani fakamooli ki a tautolu

Falu magaaho ne tupu mai e tau lekua he mahani fakamooli. Ka e aoga lahi tumau ke mahani fakamooli. Totou Salamo 34:12-16, ti tutala ke he hūhū nei:

• Holo ki mua fēfē e moui haau he mahani fakamooli?

1. A. Ko e tau taane mo e tau hoana fakamooli kua fakamalolō e fakamauaga ha laua

2. E. Ko e tau tagata gahua fakamooli kua falanaki he tau takitaki gahua

3. I. Ko e tau tagata fakamooli he motu kua moua e higoa mitaki mai he tau pule he fakatufono

MANATU KATOA

Manako a Iehova ke he tau kapitiga haana ke fakamooli ke he tau mena oti kua vagahau mo e taute e lautolu.

Liu Fakamanatu

• Ko e heigoa falu puhala ke mahani fakamooli?

• Ko e ha kua nakai pulotu ke manatu kua maeke a tautolu ke fufū e tala mooli?

• Ko e ha kua manako a koe ke fakamooli he tau magaaho oti?

KUMI FOKI

Fakaako fēfē he tau matua e fanau ha lautolu ke mahani fakamooli?

Kia Vagahau Fakamooli (1:44)

Ko e heigoa e tau fua mitaki ka moua he fakamooli ke he tau maveheaga ha tautolu?

Fakamooli ke he Tau Maveheaga, Moua e Tau Monuina (9:09)

Manamanatu kua lata a tautolu ke totogi e tau tukuhau pete he fakaaoga fakahehē ai.

“Tau Tukuhau​—Lata Nakai a Koe ke Totogi Ai?” (Vala tala he Kolo Toko)

Ko e heigoa ne omoomoi e tagata nakai fakamooli ke hiki e moui ti mahani fakamooli e puhala he moui?

“Fakaako e Au kua Fakaalofa Noa mo e Fakamagalo a Iehova” (Vala tala he Kolo Toko)