Talahauaga he Tohi Tapu ke he Gahua mo e Tupe

Kua tupetupe nakai a koe ke he gahua po ke tupe? Nakai mukamuka ke leveki e tau manako ha tautolu mo e foaki foki ki a Iehova e tapuakiaga kua lata. Foaki mai he Tohi Tapu e tau fakatonuaga aoga ke lagomatai a tautolu.

1. Ko e heigoa ne talahau he Tohi Tapu hagaao ke he gahua?

Manako e Atua ke fiafia a tautolu ka gahua. Pehē e Tohi Tapu kua “nakai fai mena mitaki ke he tagata, ka kia . . . fakafiafia hana loto ke he tau mena mitaki he hana tau gahua.” (Fakamatalaaga 2:24) Gahua malolō a Iehova. Ka fifitaki e tautolu a ia he gahua fakamakutu, kua fakafiafia a ia mo e mitaki foki e logonaaga ha tautolu.

Aoga e gahua. Ka kua nakai lata ke mua atu e aoga ke he tapuakiaga ha tautolu ki a Iehova. (Ioane 6:27) Mavehe e ia ka tuku fakamua e tautolu a ia, to leveki e ia e tau manako fakatino ha tautolu.

2. Ko e heigoa e onoonoaga lagotatai ke he tupe?

Talahau he Tohi Tapu ko e “tau tupe mo mena ke malu ai,” ka e hataki foki kua nakai ko e tupe hokoia ke moua e fiafia. (Fakamatalaaga 7:12) Ko e mena ia, kua fakamafana a tautolu ke ua manako lahi ke he tau tupe ka e “fakamamate [po ke loto fakaaue] a mutolu ke he tau mena ha ia mutolu.” (Totou Heperu 13:5.) Ka tumau e loto fakaaue ha tautolu ke he tau mena ne moua, nakai tupetupe a tautolu ke manako atu foki. Ti atāina a tautolu he tau kaitalofa. (Tau Fakatai 22:7) Hao foki a tautolu mai he matematekelea he pelē tupe mo e putoia he tau pisinisi ke moua mafiti e tau tupe.

3. Fakaaoga fakamitaki fēfē e tupe?

Ko Iehova ko e Atua fakamokoi, ti fifitaki e tautolu a ia ka “fakamokoi, mo e ta atu noa e . . . tau mena.” (1 Timoteo 6:18) Fakaaoga fakamitaki e tupe ha tautolu he lalago e fakapotopotoaga mo e lagomatai e falu kua latatonu, mua atu ke he tau matakainaga. Fiafia lahi a Iehova ke he kakano pauaki ne foaki e tautolu ka e nakai ke he lahi he foakiaga. Ka foaki fakamokoi a tautolu mai he loto, to fiafia a tautolu ti pihia mo Iehova.​—Totou Gahua 20:35.

KUMIKUMI FAKAHOKULO

4. Fakaheke a Iehova he puhala ne gahua a koe

VITIŌ: Gahua mo e Loto Katoatoa ma Iehova (4:39)

• He vitiō, ko e heigoa ne nava a koe ke he onoonoaga mo e mahani ha Jason he gahuaaga haana?

• Ko e heigoa ne taute e ia ke lagotatai e onoonoaga ke he gahua?

Totou Kolose 3:23, 24, ti tutala ke he hūhū nei:

• Ko e ha kua aoga e onoonoaga ha tautolu ke he gahua?

Aoga e gahua. Ka e nakai lata ke mua atu e aoga ke he tapuakiaga ha tautolu ki a Iehova

5. Aoga e loto fakaaue ki a tautolu

Tokologa e tagata ne eketaha ke moua loga e tau tupe. Ka e kehe e tomatomaaga he Tohi Tapu. Totou 1 Timoteo 6:6-8, ti tutala ke he hūhū nei:

• Ko e heigoa ne tomatoma he Tohi Tapu a tautolu ke taute?

VITIŌ: Kia ‘Loto Fakaaue ke he Tau Mena kua Moua’ (3:20)

• Pete ka nakai loga e tupe, ko e heigoa ne fakafiafia e tau magafaoa nei?

Ka e kua ka loga e tupe ha tautolu ti manako atu agaia? Talahau e Iesu e fakatai ke he hagahagakelea he mena nei. Totou Luka 12:15-21, ti tutala ke he hūhū nei:

• Ko e heigoa ne fakaako e koe mai he fakatai ha Iesu?​—Kikite e kupu 15.

Totou ti fakatatai e Tau Fakatai 10:22 mo e 1 Timoteo 6:10. Ti tutala ke he tau hūhū nei:

• Ko e heigoa kua mua e aoga he manatu e koe? Kapitiga mo Iehova po ke loga e tau tupe? Ko e ha?

• Ko e heigoa e tau lekua he fakamakamaka ke loga e tupe?

6. To leveki e Iehova e tau manako ha tautolu

VITIŌ: To Leveki e Iehova e Tau Manako ha Tautolu (6:21)

• He vitiō, ko e heigoa e tau lekua ne fehagai mo e matakainaga taane?

• Ko e heigoa ne taute e ia ke kautū mai he tau lekua?

Totou Mataio 6:25-34, ti tutala ke he hūhū nei:

• Ko e heigoa ne mavehe e Iehova ke taute ma lautolu ne tuku fakamua a ia?

MANATU KATOA

Kua aoga e gahua mo e tupe, ka e nakai lata ke fakatauhele a tautolu he fekafekau ki a Iehova.

Liu Fakamanatu

• Ko e heigoa ka lagomatai a koe ke tumau e onoonoaga lagotatai ke he gahua?

• Aoga fēfē e loto fakaaue ki a koe?

• Fakakite fēfē e koe e falanaki ke he maveheaga ha Iehova ke leveki e tau tagata haana?

KUMI FOKI

Kumikumi kua talahau kia he Tohi Tapu na kelea e tupe?

“Ko e Tupe Kia ko e Vaka he Tau Mena Kelea Oti Kana?” (Vala tala he kupega hila)

Fakaako ke he aga foaki kua fakafiafia e Atua.

“Ko e Heigoa e Talahauaga he Tohi Tapu ke he Aga Foaki?” (Vala tala he kupega hila)

Kelea kia e pelē tupe?

“Talahauaga he Tohi Tapu​—Pelē Tupe” (Ala!, Mati 2015)

Totou ke he puhala ne hiki e moui he tagata pelē tupe mo e kaihā.

“Fiafia Lahi Au ke he Tau Nua ka Laga” (Vala tala he Kolo Toko)