Ko e Ha ne Nakai Tali e Falu Liogi?

Kua mukamuka lahi ke matutaki mo e Atua. Tuga ne matua taane fakaalofa ne fiafia ke atāina e fanau haana ke tutala ki a ia, kua fiafia a Iehova ko e Atua ke liogi a tautolu ki a ia. He magaaho taha, ke tuga e matua taane pulotu, kua ha ha he Atua e tau kakano mitaki ke nakai tali falu ole. Kua fakagalogalo kia e tau manatu haana, po kua fakakite e ia e falu manatu ia he Tohi Tapu?

Ne fakamaama he aposetolo ko Ioane: “Ko e fakamalolo foki hanai kua moua ki mua hana, kaeke ke ole atu ai e tautolu ha mena ke lata mo e hana finagalo, ti fanogonogo mai ai a ia kia tautolu.” (1 Ioane 5:14) Kua lata e tau ole ha tautolu ke lagotatai mo e finagalo he Atua. Liogi falu ma e tau mena ne nakai felauaki mo e finagalo he Atua, ke tuga anei ke mua e loto (lottery) po ke mua e nua. Liogi falu mo e tau fatuakiloto nakai tonu. Ne hataki he aposetolo ko Iakopo e fakaaoga hehē pihia he liogi, he talahau: “Kua ole atu a mutolu, ka e nakai moua, ha kua ole atu mo e nakai lata, kia fakaoti e tau mena ia ke he tau manako kelea ha mutolu.”—Iakopo 4:3.

Manamanatu la, ke fakatai ki ai, kua liogi e tau faahi ne ua he pelē soka ke mua. Kua nakai lata ke amanaki ke he Atua ke talia e tau liogi fakafetoko ia. Kua pihia foki e mena ka talahau hagaao ke he felakutaki he vahā nei ka liogi e tau faahi ne ua ne fetotokoaki ke mua.

Kua nakai aoga e liogi ha lautolu ne fakateaga ke he fakatufono he Atua. Ne fakalagalaga a Iehova he taha magaaho ke talahau ke he tau tagata tapuaki fakavai: “Ka fakaloga ai e mutolu e tau liogi nakai fanogonogo atu au; kua puke ha mutolu a tau lima ke he toto.” (Isaia 1:15) Ne pehē e Tohi Tapu: “Ko ia kua haga kehe hana tau teliga mo e nakai fanogonogo a ia ke he fakatufono, kua eke ni mo mena vihiatia hana a liogi.”—Tau Fakatai 28:9.

Ke he taha faahi, to fanogonogo tumau a Iehova ke he tau liogi fakamooli he tau tagata tapuaki hane eketaha ke fekafekau ki a ia he fakatatau ke he finagalo haana. Kakano kia e mena ia to tali e ia e tau ole oti ha lautolu? Nakai. Kia onoono ke he falu fakafifitakiaga he Tohi Tapu.

Ne ha ha ia Mose e fakafetuiaga tata lahi mahaki mo e Atua; ka e ole agaia a ia “ke lata mo e hana [Atua] finagalo.” Kehe mai he finagalo he Atua ne talahau, ne olelalo a Mose ma e fakaatāaga ke finatu ke he motu ko Kanana: “Kia toka e koe au ke fina atu, kia kitia ai e au e motu mitaki ha he fahi atu a Ioritana.” He magaaho fakamua, ha kua agahala a Mose, ne tala age ki a ia to nakai finatu a ia ke he motu na. Ti ko e mogonei, he nakai talia e ole ha Mose, ne pehē a Iehova ki a ia: “Tokai, neke liu fai kupu mai a koe kia au ke he mena na.”—Teutaronome 3:25, 26; 32:51.

Ne liogi e aposetolo ko Paulo ma e totokaaga mai he mena ne fakahigoa e ia ko e haana “mahukihuki ke he tino.” (2 Korinito 12:7) Ko e “mahukihuki” nei kua liga hagaao ke he gagao lahi he mata po ke kunuene tumau mai he tau tagata totoko mo e “tau matakainaga pikopiko.” (2 Korinito 11:26; Kalatia 4:14, 15) Ne tohi e Paulo: “Ne ole atu lagatolu au ke he Iki ha ko e mena ia, kia fano kehe ai a ia ia au.” Pete ia, ne iloa he Atua ka matutaki a Paulo ke fakamatala pete ne uhu e “mahukihuki ke he tino,” to fakakite maaliali e malolō he Atua mo e falanaki katoatoa ha Paulo ki a Ia. Ti, he nakai talia e ole ha Paulo, ne pehē e Atua ki a ia: “Kua fakakatoatoa haku a malolo ke he lolelole.”—2 Korinito 12:8, 9.

E, kua iloa mitaki he Atua a tautolu ke foaki e tau ole pauaki ne kua aoga lahi ma tautolu. Ne tali tumau a Iehova ma e mitaki ni ha tautolu, he fakalagotatai mo e tau finagalo fakaalofa haana ne fakamau he Tohi Tapu.