Ko e Atua Malolō Ue Atu Kia a Iesu?

Tau tali fa mahani:

▪ “E, ko Iesu ko e Atua Malolō Ue Atu.”

▪ “Kua kitia e Atua ke he puhala fakatino a Iesu.”

Ko e heigoa ne talahau e Iesu?

▪ “Kane mai ke fakaalofa a mutolu kia au, po kua kolikoli a mutolu he . . . fano au ke he Matua; ha ko e mena mua haku a Matua ia au.” (Ioane 14:28) Ne fakailoa e Iesu kua nakai tatai a ia mo e haana Matua.

▪ “To hake au ke he haku a Matua mo e Matua ha mutolu, ke he haku a Atua mo e ha mutolu Atua.” (Ioane 20:17) Ne nakai pehē a Iesu ko e Atua a ia, ka e talahau ko e Atua ko e Peresona ne kehe mai ia ia.

▪ “Ko e mena nakai vagahau noa au, hoko au; ka ko e Matua ne fakafano mai au, ko ia ni ne tuku mai kia au e poaki ke he tau mena ke tala atu ai e au, mo e tau mena ke vagahau ai e au.” (Ioane 12:49) Ne nakai puna mai e tau fakaakoaga ha Iesu ia ia; ka e puna mai he Matua.

NE PEHĒ a Iesu ko ia ko e Tama he Atua ka e nakai ko e Atua Malolō Ue Atu. Ane mai ko e Atua a Iesu, ko hai mogoia ne liogi a ia ki ai he nofo he lalolagi? (Mataio 14:23; 26:26-29) Mooli, ne nakai fakatupua noa a Iesu ke tutala ke he taha tagata!

He magaaho ne ole e tau tutaki tokoua ha Iesu ma e tau tuaga pauaki he Kautu haana, ne tali e ia: “Ko ia ke nofo ke he haku a fahi matau mo e haku a fahi hema, nakai haku ia ke ta atu ke he falu, ka e hoko lautolu kua taute ai e mena ia he haku a Matua.” (Mataio 20:23) Kua pikopiko kia a Iesu ki a laua he magaaho ne pehē a ia kua nakai moua e ia e pule ke foaki e ole ha laua? Nakai pihia! Ka e talahau fakatokolalo e ia ko e Atua ni kua moua e pule ke taute e tau fifiliaga pihia. Ne fakamaama foki e Iesu na fai mena ne nakai iloa e ia mo e tau agelu ka ko e Matua haana ni ne iloa.—Mareko 13:32.

Kua tokolalo kia a Iesu ke he Atua he magaaho ia ni ne eke a ia mo tagata he lalolagi? Nakai. Pihia foki he mole e mate mo e liu tu mai haana, ne fakamaama he Tohi Tapu a Iesu ke tokolalo hifo he Atua. Kua fakamanatu he aposetolo ko Paulo ki a tautolu “ko e ulu a Keriso ko e Atua haia.” (1 Korinito 11:3) Ne pehē e Tohi Tapu ke he vahā anoiha “ka oti he tuku e tau mena oti ki lalo ia ia, ti tuku ai foki e Tama ki lalo ia ia ne tuku ai e tau mena oti ki lalo ia ia, kia pule okooko e Atua ke he tau mena oti kana.”—1 Korinito 15:28.

Maaliali ai, nakai ko e Atua Malolō Ue Atu a Iesu. Ko e kakano haia ne vagahau a ia hagaao ke he Matua haana ko e “Atua haku.”—Fakakiteaga 3:12; 2 Korinito 1:3, 4.a

[Matahui Tala]

[Blurb he lau 7]

Ne pehē a Iesu nukua fai mena ne nakai iloa e ia mo e tau agelu ka ko e Matua haana ni ne iloa