Hūhū he Tau Tagata Totou ha Tautolu

Uta Kia he Atua e Tau Tama ke Eke mo Tau Agelu he Lagi?

Ka hoko e mate ke he tama, liga lali e tau kapitiga he magafaoa ne mauku ke fakamafana a lautolu he talahau, “liga manako e Atua ke fai agelu foki he lagi.” Fai kakano nakai e talahauaga ia ki a koe?

Kaeke ke mooli na fakatupu he Atua e tau tama ke mamate ha kua manako a ia ke loga atu e tau agelu he lagi, liga pehē e mena ia kua nakai fai logonaaga, po kua favale a ia. Ka e kehe e mena ne talahau he Tohi Tapu. (Iopu 34:10) To nakai fofō he matua taane fakaalofa hofihofi e tama he tau matua ke fakalahi atu e magafaoa haana.

Ka kua nakai fai matua ke mua hake e fakaalofa hofihofi ia Iehova, ko e matapatu mahani haana ko e fakaalofa. (1 Ioane 4:8) To nakai fakaatā he fakaalofa ne mua haana a ia ke taute e tau mena ke he puhala pāpā māo pihia.

Hūhū ki a koe ni, ‘Kua manako kia e Atua ke loga atu foki e agelu he lagi?’ Ne talahau he Tohi Tapu ko e tau gahua oti he Atua kua mitaki ti kua katoatoa ni. (Teutaronome 32:4) Ko e gahua haana he tufuga e tau agelu toko miliona ne mitaki katoatoa ti loga foki. (Tanielu 7:10) Kua hepe kia e numera he tau agelu ne fuafua he Atua ke lata mo ia? Nakai pihia! Kua nakai fakaai e Atua Mua Ue Atu ke taute e hēhē ia. Mooli, ne fifili e Iehova e falu tagata ke eke mo tau mena momoui fakaagaaga ke pule mo Iesu he Kautu Haana he lagi, ka e nakai ko e tau tama ikiiki a lautolu he magaaho ne mamate ai.—Fakakiteaga 5:9, 10.

Taha kakano ne nakai uta he Atua e tau tama mai he lalolagi ke eke mo tau agelu he lagi, ha kua nakai tatai mo e finagalo fakamua haana ma e tau tama. He katene ko Etena, ne tala age e Atua ki a Atamu mo Eva: “Kia fanau a mo e fakatokologa, kia fakapuke foki e lalolagi, mo e kautu ki ai.” (Kenese 1:28) Ko e tau tama ko e tau mena fakaalofa mai he Atua, ti latatonu ke he finagalo fakamua haana he fakapuke e lalolagi aki e magafaoa tututonu he tagata. Ne nakai finagalo a ia ke mamate e tau tama ti hiki atu a lautolu mo tau mena momoui fakaagaaga. Ne talahau fakamaali he Tohi Tapu kua ‘moua mai ia Iehova’ e tau tama. (Salamo 127:3) To liuaki kia e Iehova, ko e Atua he fakaalofa e mena fakaalofa ne age e ia ma e tau matua? Nakai pihia!

Ko e mate he tama he mogo ne tote ai kua fakamomoko, fakahukia, mo e fakamamahi. Ko e heigoa mogoia e amaamanakiaga ma e tau matua ne maanu? Ne mavehe e Tohi Tapu to liu fakatū mai he Atua e tau miliona ke he parataiso he lalolagi nei. Manamanatu la ke he tau tama—kua liliu ke he tau tino malolō—liu fakalataha mo e tau fakahele ha lautolu. (Ioane 5:28, 29) Ko e finagalo he Atua ma lautolu ne ikiiki ke tutupu hake ti olioli e moui, mo e ako hagaao ki a ia mo e finagalo haana ma e lalolagi. Ti ko e tau tama ikiiki kua mamate ne nakai ko e tau agelu he lagi ka kua fakatalitali ai ke he liu tū mai ke he lalolagi parataiso. He magaaho ia, i lalo he leveki fakaalofa he Tufuga ha tautolu, ko lautolu ne ikiiki mo e momotua to fiafia he tapuaki tukulagi ki a Iehova ko e Atua.