Ko e Mativa Kia ko e Fakamailoga he Nakai Talia he Atua?

NE PEHĒ e Atua ke he tau Isaraela i tuai: “Aua neke ha ha ia koe ha tagata nofogati.” Pihia ai, ha ko e Fakatufono ne tuku age e ia ki a lautolu, ko e poakiaga ke leveki a lautolu ne nonofogati mo e fakatokanoa ai e tau kaitalofa. (Teutaronome 15:1-4, 7-10) Ko e mena ia, kua lata ke nakai fai tagata nofogati he tau Isaraela ha kua mavehe a Iehova to fakamonuina e ia a lautolu. Pete ia, ko e monuina kua fakavē ke he omaoma ke he Fakatufono, ne kaumahala e tau Isaraela ke taute.

Ka e nakai kakano e mena nei kua nakai talia mooli he Atua a lautolu ne nonofogati ka e talia a lautolu ne maukoloa. Tokologa he tau fekafekau fakamooli he Atua ne nonofogati. Ne mativa e perofeta ko Amosa ko e tagata leveki manu mo e tagata gahua fakakū. (Amosa 1:1; 7:14) He vahā a Elia ko e perofeta, ne tō e hoge ki Isaraela, ne falanaki ni a Elia ko e perofeta ke he fakamokoi he fifine takape nofogati, ne tote lahi mahaki e falaoa mata mo e lolo ke leveki aki a lautolu he mogo ne tō e hoge. Nakai monuina tokoua a Elia mo e fifine takape; ne foaki ni e Iehova e mena kua lata mo e tau levekiaga tino.—1 Tau Patuiki 17:8-16.

Ko e tau mena tutupu fakaofo ne liga fakamativa aki e tau tagata. Ko e tau pakia mo e tau gagao ka taofi fakakū po ke tumau e tagata mai he gahua tupe. Ti toka hifo he mate e tau tama nakai fai matua po ke tau takape. Ko e tau tuaga matematekelea pihia ne nakai fakakite kua nakai talia he Atua. Ko e tala ki a Naumi mo Ruta e fakafifitakiaga atihake he leveki fakaalofa ha Iehova ma lautolu ne nonofogati. Pete he mativa lahi mahaki a Naumi mo Ruta ha ko e mamate he tau taane ha laua, ne fakamonuina e Iehova ko e Atua a laua mo e leveki e tau manako fakatino ha laua.—Ruta 1:1-6; 2:2-12; 4:13-17.

Maaliali ai, ko e mativa ne nakai ko e tiaki po ke, nakai talia he Atua. Ko lautolu ne fakamooli ki a Iehova ko e Atua ka mauokafua ke he tau kupu he Patuiki ko Tavita: “Ne fuata au, ka kua motua tuai au ainei; ka e nakai kitia e au ha tagata tututonu kua tiaki, po ke hana fanau kua ole mena kai.”—Salamo 37:25.

[Fakatino he lau 8]

Pete he mativa, ne fakamonuina mo e leveki fakaalofa he Atua a Naumi mo Ruta