Kautūaga i Kiliata ke 127 Aki

Fakafano Atu e Tau Misionare ke ‘Hoko Ni ke he Tau Kala Oti he Lalolagi’

KUA poaki a Iesu ke he tau tutaki haana ke eke mo tau talahau atu ke ‘hoko ni ke he tau kala oti he lalolagi.’ (Gahua 1:8) Ne uta fakahokulo he Tau Fakamoli a Iehova e poakiaga ia.

He molea e 65 e tau kua mole, kua lagomatai e tau misionare ne fakaako he Aoga Tohi Tapu a Kiliata he Kolo Toko ke taki e gahua fakamatala nei ke he molea e 200 e motu. He Aho Faiumu ia Sepetema 12, 2009, ko e tau fekafekau toko 56 ne kautū mai he mole e lima e mahina he fakaako ke he aoga misionare i Patterson, New York, U.S.A.

Ko e Malolō he Manamanatuaga

Ko Stephen Lett, ko e matakainaga he Kau Fakatufono he Tau Fakamoli a Iehova mo e tagata nofoa he fakaholoaga he kautūaga, ne tutala ke he vahega ke he mataulu “Fakaaoga Fakailoilo e Manamanatuaga Haau.” Ne hataki fakamua e ia a lautolu kua kautū ke he fā e puhala ke nakai fakaaoga aki e tau manamanatuaga ha lautolu. Ko e tau manatu tolu fakamua: (1) Aua neke manamanatu na maeke he tau koloa fakatino ke foaki e puipuiaga tukulagi; (2) kalo kehe he manamanatu ke he tau gahua feuaki; mo e (3) fakamamao mai he molea e fakaatukehe, he manamanatu ke he kelea a pogipogi. (Tau Fakatai 18:11; Mataio 5:28; 6:34) Hagaao ke he manatu ke toluaki, ne pehē e tagata lauga ko e tagata ne molea e fakaatukehe kua lafi hake e tau fakaatukehe i ne afi ke he tau fakaatukehe he aho nei ti hoko foki ke lafi mai e tau fakaatukehe a pogi ke he aho nei. “Ko e kavega mamafa a ia ke hahamo,” he talahau he Matakainaga Lett. Ko e heigoa e manatu ke fāaki? Ne hataki ke he vahega ke ua manamanatu na laukauka e moui ha lautolu fakamua to gahua misionare a lautolu. He taute pihia to fakatupu a lautolu ke galo e tau olioli ne fakatoka ma lautolu he matakavi foou ha lautolu.

Ti fakamalolō mogoia he Matakainaga Lett e vahega ke fakaaoga e tau manamanatuaga ha lautolu ke he fā e puhala aoga lahi. Ne pehē a ia: (1) Kitia tuai e tau tuaga hagahaga kelea fakaagaaga po ke fakatino, ti kalo mai he mena matematekelea; (2) manamanatu ke he tau mena tutupu ne totou e koe he Tohi Tapu, ti manamanatu ko koe he mena ne tupu; (3) manamanatu ko e tau tagata takitaha ne tutala a koe ki ai he kotofaaga foou haau ka eke mo tagata tapuaki ha Iehova; ti (4) feaki e loto fakaalofa he manamanatu ko mutolu he tuaga ha lautolu ka fakamatala a mutolu ki ai.—Tau Fakatai 22:3.

Ko e Uho he Fakaako e Falu

Ko David Splane, ko e matakainaga he Kau Fakatufono, ne tutala fakalaulahi ke he matakupu “Tuku Age e Tau Mena Nei ke he Tau Tagata Taane Fakamooli,” ne fakavē ke he 2 Timoteo 2:2. He tala age e aposetolo ko Paulo ki a Timoteo ke fakaako e tau tagata taane fakamooli, ko e manako ha Paulo ki a Timoteo ke nakai ni fakamahani e tau tagata taane nei ke moua e tau kupu mooli ka e pihia foki ke fakamalolō ki a lautolu ke fakaako e falu. Ne tala age e tagata lauga ke he vahega kua manako lahi ke he tau tagata taane ke taki e tau matagahua faka-Kerisiano. Magaaho fe mo e fēfē e puhala ka fakaako a lautolu nei? Ne fakamalolō he Matakainaga Splane e vahega ke kamata fakaako e tau tagata taane nei tali mai he magaaho ne kamata e tau misionare ke fakaako e Tohi Tapu mo lautolu ia.

Maeke fēfē he tau misionare ke fakaako fakatonu e tau tagata fakaako Tohi Tapu ke eke mo tau fakafifitakiaga fakamooli ke he falu? Ne loga e puhala ne talahau he tagata lauga. Kua lata e tau misionare ke fakaako a lautolu ke kumikumi fakamitaki ma e tau magaaho fakaako Tohi Tapu fakatagata ha lautolu. Ka kamata mogoia e tau tagata fakaako ke o atu ke he tau feleveiaaga he fakapotopotoaga, kua lata ia lautolu ke iloa e puhala ke kumikumi ha lautolu a tohi ne fakavē ke he Tohi Tapu ka fakatutala he tau feleveiaaga. “Ka nakai iloa he tagata ke kumikumi ni e ia e Tohi Tapu,” he fakamaama he tagata lauga, “to nakai maeke a ia ke fakaako atu e falu.” Pehē foki e Matakainaga Splane kua maeke e tau misionare ke lagomatai a lautolu ne foou ke hohoko tuai he tulā fafati, ke lalago fakatupe e gahua fakamatala, mo e omaoma ki a lautolu ne taki mogonei. Ne pehē a ia ko e puhala mitaki lahi mahaki ke fakaako atu e tau fakaakoaga nei ko e fakatoka e fakafifitakiaga mitaki.

Ko e Kotofaaga Lilifu he Eke mo Tau Fakamoli

Ko Guy Pierce, ko e matakainaga foki he Kau Fakatufono, ne tutala ke he mataulu ne fakavē ke he tau kupu ha Iesu ne fakamau he Gahua 1:8, “To Eke Foki a Mutolu mo Tau Talahau Haku.” Ne fakamanatu e ia ke he vahega, ko e motu ha Isaraela he senetenari fakamua V.N., ne galo e kotofaaga lilifu he eke mo tau talahau atu po ke, tau fakamoli ma Iehova. Ne age e kotofaaga lilifu ia ke he motu ka ta mai e tau fua he Kautu. (Mataio 21:43) Ne eke e motu ia mo fakapotopotoaga he tau Kerisiano fakauku. Fatiaki he tagata lauga e aposetolo ko Peteru ne talahau ko e “motu tapu” he tau Kerisiano fakauku ka “fakakite atu” e mitaki ha Iehova. (1 Peteru 2:6-9) Ti nakai pehē a Iesu ko e tau Kerisiano to talahau atu ni ki a ia ka e nakai ko e tau tagata talahau atu ha Iehova. Ti kua ui foki a Iesu ko e ‘Talahau Fakamoli.’ (Fakakiteaga 1:5; 3:14) Ko ia ko e Talahau Atu a Iehova ne mua atu ti ko e fakafifitakiaga kua muitua e tautolu.—1 Peteru 2:21.

He magahala ha tautolu, ne tala age e tagata lauga ke he vahega, ko e tau kupu ha Iesu he Gahua 1:8 kua fai kakano lahi. Ko e ha? Ko e lakaaga aoga lahi mahaki he perofetaaga, ne fakamau ia Fakakiteaga 11:15, kua fakamooli tuai! Kua fakatū tuai e Kautu faka-Mesia he Atua. Ko e gahua fakamatala he magaaho tonu nei hane taute ke ‘hoko ni ke he tau kala oti he lalolagi.’ (Gahua 1:8) Ne fakalaulahi atu he Matakainaga Pierce e gahua fakamatala he tau misionare hagaao ki a Iehova mo e haana Kautu, nakai hagaao ki a lautolu po ke tau puhala momoui, aga fakamotu, mo e motu ha lautolu he magaaho fakamua. Ne fakamalolō e ia e vahega ke fakaako atu e “tokologa he magaaho ne toe agaia.”

Falu Fakamaamaaga he Fakaholoaga

Ko Alex Reinmueller, ko e lagomatai ke he Komiti Fakailoaaga, ne tutala ke he mataulu “To Atu e Iehova e Malolō ki a Koe.” Pehē a ia ka falanaki e tau misionare ke he malolō a Iehova, to lagomatai e Ia a lautolu ke mailoga e tau malolō ha lautolu, talia e tau lolelole ha lautolu, fehagai mo e tau matakutaku ha lautolu, mo e foaki katoatoa ke he Atua.

Tokoua he tau faiaoga he Faahi he Tau Aoga Fakateokarasi, ko Sam Roberson mo William Samuelson ne tutala foki ke he tau tagata fakaako. Ne tutala e Matakainaga Roberson ke he matakupu “Fakalataha Au mo Koe,” ne fakavē ke he Isaia 41:10. Ne pehē a ia to loga e fiafia ka moua he tau misionare. To moua foki e lautolu e tau lekua. Maeke ia lautolu ke fahia ka fifitaki e lautolu e Patuiki ko Tavita, ne tagi atu he liogi ke he haana Matua fakaalofa. (Salamo 34:4, 6, 17, 19) Ne fakamaama he lauga he Matakainaga Samuelson e latatonu ke matutaki e feaki he puhala manamanatu. Ko e tau misionare ne taute pihia kua maeke ke kalo mai he tali fakakelea ke he tau talahauaga nakai totonu mo e nakai mafiti ke ita.—Tau Fakatai 2:10, 11.

Ko Jim Mantz, ko e lagomatai ke he Komiti Tohia Tohi, ne hūhū tala ke he matakainaga he La Komiti mai he Republic of Georgia, taha mai i Honduras, mo e matakainaga he Komiti he Motu ha Republic of Tajikistan. Ko e tau matakainaga taane lotomatala nei ne age e fakatonuaga ke he tau misionare ke he puhala ke fakakapitiga mo e tau tagata ne liga totoko he “mahala e kelea ke he mitaki.” (Roma 12:21) Ko Mark Noumair, ko e taha faiaoga he vahega, ne taute e fakatutalaaga hakahakau he tau mena tutupu he gahua fakamatala ne olioli he tau tagata fakaako he magaaho ne fakaako a lautolu i Kiliata. Ne ha ha ai he vala ia e mataulu omoomoi lahi “E, Maeke Fēfē Au ke Lagomatai?”

Ne fakaoti he tagata nofoa e fakaholoaga he fatiaki e tau kupu lologo he lologo foou “See Yourself When All Is New.” Ko e toko 6,509 ne o kehe mai i ai ne kua eketaha fakalahi ke talahau atu hagaao ki a Iehova mo e Tama haana ke ‘hoko ni ke he tau kala oti he lalolagi.’

[Fakafonua/Mepe he lau 31]

TAU NUMERA HE VAHEGA

8 numera he tau motu ne fakalataha

56 tau tagata fakaako

28 tau hoa mau

33.6 evalesi he tau tau moui

18.3 evalesi he tau tau tali mai he papatiso

13.6 evalesi he tau tau he fekafekauaga mau

[Mepe]

(Ma e puhala katoa ne tohi aki, kikite e tohi)

Kotofa e vahega ke he 22 e motu i lalo

TAU KOTOFAAGA MISIONARE

ALBANIA

BOLIVIA

BURUNDI

CAMBODIA

CHILE

CONGO, DEM. REP.

COSTA RICA

CÔTE D’IVOIRE

CURAÇAO

GUYANA

HAITI

JAMAICA

MOLDOVA

MOZAMBIQUE

NEPAL

NICARAGUA

PANAMA

PARAGUAY

PERU

SERBIA

TANZANIA

UGANDA

[Fakatino he lau 31]

Vahega ke 127 Aki kua Kautū he Aoga Tohi Tapu a Kiliata he Kolo Toko

Ko e tau higoa i lalo, kua mai he laini i mua ki tua, mo e mai he faahi hema ke he faahi matau he tau laini takitaha.

(1) Marshall, T.; Prudent, L.; Mashburn, A.; Rosenström, S.; Testa, A.; Takeyama, M.; Sisk, M.

(2) Grooms, K.; Miura, S.; Camacho, M.; Rozas, S.; Burch, M.; Meza, I.; Young, G.; Geraghty, S.

(3) Bonilla, C.; Knaller, D.; Parrales, R.; Hotti, S.; Takada, A.; Tournade, M.; Sopel, C.

(4) Miura, Y.; Parrales, K.; Prudent, K.; Colburn, S.; Willis, L.; Vääränen, A.; Sisk, B.; Takada, R.

(5) Grooms, J.; Vääränen, M.; Geraghty, B.; Stackhouse, R.; Wilson, A.; Bonell, E.; Camacho, D.; Meza, R.; Bonell, M.

(6) Takeyama, S.; Testa, G.; Colburn, T.; Mashburn, C.; Willis, W.; Tournade, L.; Burch, J.; Stackhouse, J.

(7) Wilson, J.; Young, J.; Marshall, E.; Rozas, M.; Knaller, J.; Hotti, N.; Rosenström, A.; Sopel, J.; Bonilla, O.