Moua e Puipuiaga he Tau Tagata he Atua
“To fakaheke atu au kia koe ke he fakapotopotoaga lahi.”—SALA. 35:18.
1-3. (a) Ko e heigoa ka takitaki e falu Kerisiano ke he tuaga fakaagaaga hagahaga kelea? (e) I fe ka moua he tau tagata he Atua e puipuiaga?
KE HE magahala okioki, ne ukuuku a Joe mo e hoana haana he uluulu-feo fakalataha mo e tau ika ne kehekehe e tau lanu mo e lalahi. Ne kakau mamao atu a laua ke onoono ke he fulufuluola he lalo kelekele he uluulu. He hoko ke he moana hokulo, ne pehē e hoana a Joe, “Manatu au kua mamao lahi tuai a taua.” “Fakahautoka,” he tali e Joe. “Iloa e au e mena haaku ne taute.” He manatu e Joe he mole laia e mena ne tupu, ‘Kua ō ki fe e tau ika?’ He hopoate, ne kitia e ia e kakano. Mai he moana hokulo, ne gutu fakahako mai e magō ki a ia. Nakai fai mena taha a ia mogonei ke taute. He nakai mamao lahi mahaki e magō, ne maviko ai ti galo.
2 Liga tauhele lahi e Kerisiano ha ko e tau futiakiaga he fakatokaaga a Satani—ko e fakafiafiaaga, gahua, maukoloa—ti nakai mailoga e ia kua gutu hifo muatua a ia ke he tau vai hagahaga kelea. “Ko e mena ne tupu ki a au ne taute au ke manamanatu hagaao ke he lafiaga ha maua,” he talahau e Joe, ko e motua Kerisiano. “Kakau he matakavi haohao mitaki mo e fiafia—he fakapotopotoaga!” Ua kakau ke he tau vai hokulo, ka moua e koe a koe kua tokotaha fakaagaaga mo e hagahaga kelea. Ka moua e koe a koe i ai, kia fakamafiti ke liu ke he ‘vai ne haohao mitaki.’ Neke fakahagahaga kelea e koe e tuaga fakaagaaga haau.
3 Mogonei, ko e matakavi hagahaga kelea e lalolagi ma e tau Kerisiano. (2 Timo. 3:1-5) Iloa e Satani kua gahoa e tau aho haana ne toe, ti eketaha a ia ke faiola ki a lautolu ne nakai mataala. (1 Pete. 5:8; Fakakite. 12:12, 17) Pete ia, kua fai puipuiaga a tautolu. Kua foaki e Iehova ke he tau tagata haana e huaga fakaagaaga haohao mitaki—ko e fakapotopotoaga Kerisiano.
4, 5. Fēfē e logonaaga he tau tagata tokologa hagaao ke he vahā anoiha ha lautolu, ti ko e ha?
4 Kua fakakaupā ni e foaki he lalolagi ke he haohao mitaki he puhala fakatino po ke manamanatuaga. Tokologa e tagata ne logona hifo ko e haohao mitaki fakatino ha lautolu kua fakalekua he matahavala, favale, tauuka e tau levekiaga tino, ti pihia mo e tau matalekua he takatakaiaga. Kua fehagai oti e tau tagata mo e tau lekua he fuakau mo e gagao. Ti ko e falu ne fai gahua, fai kaina, monuina fakatupe, mo e mitaki e malolō tino ne liga manamanatu ko e fiha la e leva he tau mena nei.
5 Ti nakai maeke foki he tokologa ke moua e haohao mitaki he manamanatuaga. Momoko ai, laulahi ne amanaki ke moua e mafola mo e tau fakamooliaga he fakamauaga, pihia mo e magafaoa ne nakai fakamooli e tau amaamanakiaga ia ha lautolu. Ke he faahi fakaagaaga, ne tokologa e tagata ō tapu ne fakagogoa mo e fakauaua he tuahā ke he aoga he takitakiaga ne moua e lautolu. Kitia mitaki e mena ia he tau mahani mo e tau fakaakoaga nakai mai he Tohi Tapu he tau takitaki lotu ha lautolu. Ti tokologa e tagata ne logona ko e fifiliaga ni ma lautolu ko e amanaki ke he saiene po ke finagalo mo e manamanatuaga mitaki he falu tagata. Nakai fakauaua ai mogoia, ko e tau tagata ne agaagai ia tautolu kua nakai logona e haohao mitaki lahi po ke nakai manako a lautolu ke manamanatu fakahokulo ke he vahā anoiha ha lautolu.
6, 7. (a) Ko e heigoa e tau tala kehekehe ki a lautolu ne fekafekau ke he Atua mo lautolu ne nakai fekafekau ki a Ia? (e) Ko e heigoa ka fakatutala a tautolu ki ai?
6 Kua kehekehe mooli a lautolu kua ha ha he fakapotopotoaga Kerisiano mo lautolu kua nakai ha ha i ai! Pete ne fehagai a tautolu ko e tau tagata a Iehova mo e loga he tau tuaga mo e tau lekua tuga ne fehagai he tau katofia ha tautolu, kua kehe mamao e tali ha tautolu. (Totou Isaia 65:13, 14; Malaki 3:18.) Ko e ha? Ha kua moua e tautolu he Tohi Tapu e fakamaamaaga hako ma e tuaga ne ha ha i ai e tau tagata, ti kua mautauteute a tautolu ke fehagai ke he tau paleko mo e tau lekua he moui. Ti ko e fua, kua nakai molea e tupetupe ha tautolu ke he vahā anoiha. He eke mo tau tagata tapuaki ha Iehova kua hafagi ki a tautolu e puipuiaga mai he tau fakamaamaaga nakai hako mo e nakai mai he Tohi Tapu, tau mahani feuaki, mo e tau fua he tau mena ia. Kua olioli he tau tagata he fakapotopotoaga Kerisiano e mafola ne nakai moua he falu.—Isaia 48:17, 18; Filipi 4:6, 7.
7 Maeke he falu fakataiaga ke lagomatai a tautolu ke fakatātā e haohao mitaki ne olioli ni e lautolu kua fekafekau ki a Iehova. Ko e tau fakataiaga nei ka fakalagalaga a tautolu ke kumikumi ke he fakakakanoaga mo e tau gahua ha tautolu mo e ke manamanatu po ke kua fakagahua katoatoa e tautolu e fakatonuaga he Atua, nukua fakatoka ke puipui aki a tautolu.—Isaia 30:21.
“Fetamakina kua Tupetupe Haku Tau Hui”
8. Ko e heigoa kua lata tumau ke taute he tau fekafekau a Iehova?
8 Mai he kamataaga fakamua atu he fakamauaga tuai he tagata, ko lautolu ne fifili ke fekafekau mo e omaoma ki a Iehova ne eketaha ke kalo mai he tau feoakiaga tata lahi mo lautolu ne nakai fekafekau ki a Ia. Mooli, ne fakakite e Iehova to ha ha ai e faitaua he vahāloto he tau tagata tapuaki haana mo lautolu ne mumui ki a Satani. (Kene. 3:15) Ha kua taofimau a lautolu ke he matapatu fakaakoaga he Atua, kua kehe e tali atu he tau tagata he Atua mai ia lautolu ne agaagai i ai. (Ioane 17:15, 16; 1 Ioa. 2:15-17) Ko e muitua ke he tuaga ia kua nakai mukamuka tumau. Mooli, falu he tau fekafekau a Iehova ne kua tuahā ke he pulotu he puhala foaki noa he moui.
9. Fakamaama e taufetului ne fehagai mo e tagata tohia he Salamo 73.
9 Taha he tau fekafekau a Iehova ne kamata ke manamanatu po ke kua taute e ia e tau fifiliaga iloilo, ko e tagata tohia he Salamo 73, liga taha mai he hologa a Asafo. Ne hūhū e salamo ke he kakano ne tuga kua kautū, fiafia, mo e monuina a lautolu ne mahani kelea, ka ko e falu ne eketaha ke fekafekau ke he Atua kua matematekelea he tau kamatamata mo e tau mena uka.—Totou Salamo 73:1-13.
10. Ko e ha e tau matalekua ne talahau he salamo kua uho lahi ki a koe?
10 Kua hūhū nakai e koe e tau hūhū tuga ne tohia he salamo? Ka pihia, kia nakai molea e tokihala po ke manamanatu kua galo e tua haau. Fai fekafekau foki a Iehova, putoia ai e falu ne fakaaoga e Ia ke tohi e Tohi Tapu ne manatu pihia. (Iopu 21:7-13; Sala. 37:1; Iere. 12:1; Hapa. 1:1-4, 13) Mooli, ko e tau tagata oti ne manako ke fekafekau ki a Iehova kua lata ke pipiki mo e talia e tali ke he lekua nei: Ko e fekafekau mo e omaoma ke he Atua kia ko e mena kua mitaki lahi mahaki ke taute? Kua fakakite he mena nei e matalekua ne fakatupu e Satani he kaina i Etena. Kua matapatu ai ke he hūhū he pule faka-Atua ke he lagi mo e lalolagi katoa. (Kene. 3:4, 5) Ti kua lata ia tautolu oti ke manamanatu ke he matakupu ne talahau he salamo. Lata kia ia tautolu ke mahekeheke ke he tau tagata fakaikaluga ne mahani kelea ti tuga kua nakai fai lekua? Lata kia ia tautolu ke “tupetupe [po ke, fuluhi kehe]” mai he fekafekau ki a Iehova mo e fifitaki ki a lautolu? Ko e mena ia mooli ha Satani ka manako ke taute e tautolu.
11, 12. (a) Kautū fēfē e salamo he tau fakauaua haana, ti ko e heigoa ne fakaako he mena nei ki a tautolu? (e) Ko e heigoa ne lagomatai a koe ke hokotia ke he fakahikuaga tuga he salamo?
11 Ko e heigoa ne lagomatai e salamo ke kautū ke he tau fakauaua haana? Pete he talahau e ia na teitei a ia ke fuluhi kehe mai he tututonu, ka e hiki e manatu haana he hū atu a ia ke he “faituga [ofoofogia] he Atua”—kakano, kua feoaki a ia mo e tau tagata fakaagaaga he faituga he Atua ti manamanatu fakalahi ke he finagalo he Atua. Ti maaliali ai ke he salamo kua nakai manako a ia ke fakalataha mo e tau tagata taute mahani kelea. Maeke a ia ke kitia ko e tau puhala mo e tau fifiliaga ha lautolu he moui kua tuku a lautolu ke he “tau mena momole.” Ko lautolu oti ne toka a Iehova ha ko e mahani feuaki, ne mailoga he salamo to fakahiku a lautolu ke he ‘tau mena fakahopo ate,’ ka ko lautolu ne fekafekau ki a Iehova to lalago e Ia. (Totou Salamo 73:16-19, 27, 28.) Kua kitia maaliali e koe e mooli he talahauaga ia. He moui ma e tagata ni ka e nakai fai takitakiaga mai he fakatufono faka-Atua ka liga futiaki e tokologa, ka e hoko ni ke he magaaho fakamui ti helehele mai e tau fua kelea ha ko e puhala ia.—Kala. 6:7-9.
12 Ko e heigoa foki ne fakaako mai e tautolu he mena ne tupu ke he salamo? Ne moua e ia e haohao mitaki mo e pulotu he tau tagata he Atua. Ne kamata a ia ke fakakakano fakamitaki mo e fakailoilo he fina atu a ia ke he matakavi ne tapuaki ki a Iehova. Pihia foki he mogonei, maeke ia tautolu ke moua e tau tagata fakatonutonu pulotu mo e olioli e tau mena kai fakaagaaga atihake he tau feleveiaaga he fakapotopotoaga. Ma e kakano mitaki mogoia, kua tala age a Iehova ke he tau fekafekau haana ke o atu ke he tau feleveiaaga Kerisiano. To moua e lautolu i ai e mafanatia mo e fakalagalaga ke fakailoilo.—Isaia 32:1, 2; Hepe. 10:24, 25.
Fifili Fakailoilo e Tau Feoakiaga Haau
13-15. (a) Ko e heigoa e mena ne tupu ki a Tina, ti ko e heigoa ne fakakite? (e) Ko e ha e feoakiaga mo e tau matakainaga Kerisiano ko e puipuiaga?
13 Ko Tina ko e tama fifine ha Iakopo e taha fakataiaga ne kelea lahi mahaki e fakahikuaga ha ko e feoaki mo e tau tagata he lalolagi. Ko e tala he Kenese hagaao ki a Tina ne talahau ki a tautolu na ko e aga haana ke matamata ke he tau fifine fuata Kanana he matakavi ne nonofo ai e magafaoa haana. Kua nakai tatai e tau mahani mitaki lahi he tau Kanana mo e he tau tagata tapuaki a Iehova. Kehekehe mamao ai, ko e tau mena ne moua he tau tagata keli kelekele ne fakakite ko e tau puhala he tau Kanana ne takitaki atu e motu ha lautolu ke puke he tapuaki tupua, mahani feuaki, tapuaki feuaki velagia, mo e favale. (Esoto 23:23; Levi. 18:2-25; Teu. 18:9-12) Manamanatu ke he fua ne moua e Tina he feoaki mo e tau tagata nei.
14 Ko Sikema ko e tagata taane he maaga, ne fakamaama “kua mua foki he fakalilifu kia ia ke he magafaoa oti he hana matua tane,” ne kitia a Tina “ti uta e ia a ia, kua takoto mo ia, mo e fakakelea e ia a ia.” (Kene. 34:1, 2, 19) Ko e matematekelea mooli! Manatu nakai a koe na mailoga e Tina to tupu e mena ia ki a ia? Liga ko e fakakapitiga noa ni a ia ke he tau fuata he maaga, nakai ko e mena hagahaga kelea he manatu haana. Ka kua hehē lahi mahaki a Tina.
15 Ko e heigoa ne fakaako mai he tala nei ki a tautolu? Kua nakai maeke ia tautolu ke fio mo e tau tagata nakai tua ti amanaki to nakai fai fua mamahi ka moua mai. Pehē e tau Tohiaga Tapu ko e “feoaki mo lautolu kua mahani kelea kua kelea ai e tau mahani mitaki.” (1 Kori. 15:33) He taha faahi, ko e feoaki mo e tau tagata ne tatai e tua mo e haau, to puipui e tau mahani mitaki haau, mo e fakaalofa haau ki a Iehova. Ko e feoakiaga mitaki pihia to fakamafana mo e fakailoilo a koe.—Fakatai 13:20.
“Kua Koukou Tuai a Mutolu”
16. Ko e heigoa ne talahau he aposetolo ko Paulo hagaao ke he falu he fakapotopotoaga i Korinito?
16 Kua lagomatai he fakapotopotoaga Kerisiano e tokologa ke fakameā a lautolu he tau gahua kelea ha lautolu. He tohia he aposetolo ko Paulo e tohi fakamua haana ke he fakapotopotoaga i Korinito, ne talahau e ia e tau hikiaga ne taute he tau Kerisiano i ai ke momoui fakalagotatai mo e tau tuaga he Atua. Falu ia lautolu ko e tau tagata feuaki, tapuaki tupua, tau tagata faivao, tau tagata fakasotoma, tau tagata kaihā, tau tagata konahia, mo e falu foki. “Ka kua koukou tuai a mutolu,” he tala age e Paulo ki a lautolu.—Totou 1 Korinito 6:9-11.
17. Maeke fēfē he momoui fakatatau ke he tau tuaga he Tohi Tapu ke hiki e tau momoui he tokologa?
17 Ko e tau tagata ne nakai ha ha i ai e tua kua nakai fai fakavēaga tonu ke he tau matapatu fakaakoaga. Na fakatū ne lautolu e tau puhala ha lautolu po ke tafea atu a lautolu ke he mahani feuaki tuga ne tupu ke he falu he tau Korinito i tuai ato eke a lautolu mo tau tagata kua tua. (Efeso 4:14) Ko e iloilo mooli he Kupu he Atua mo e tau finagalo nukua ha ha ai e malolō ke hiki e tau momoui ha lautolu oti kua fakagahua e tau Tohiaga Tapu ke he mena kua mitaki. (Kolo. 3:5-10; Hepe. 4:12) Tokologa mogonei ko e tau tagata he fakapotopotoaga Kerisiano ka tala atu ki a koe, fakamua ato fakaako mo e fakagahua e lautolu e tau poakiaga tututonu a Iehova na momoui fakahanoa a lautolu. Ka kua fakaatukehe a lautolu mo e nakai fiafia. Moua ni e lautolu e mafola he kamata ke feoaki mo e tau tagata he Atua ti momoui fakatatau ke he tau matapatu fakaakoaga he Tohi Tapu.
18. Ko e heigoa e mena ne tupu ke he taha tama fuata, ti ko e heigoa ne kitia mooli ki ai?
18 Kehe mamao ai, ko e falu he tau mogo kua mole ne fifili ke toka e ‘vai haohao mitaki’ he fakapotopotoaga Kerisiano kua tokihala lahi mahaki ke he fifiliaga ia. Taha e matakainaga fifine, ka ui e tautolu ko Tanya, ne fakamaama ko ia na “tupu hake he kupu mooli,” ka e 16 e tau haana he moui, ne toka e ia e fakapotopotoaga ke “tutuli e tau koloa he lalolagi.” Ko e falu fua ne moua e ia ko e fatu noa mo e fakatōtama. Pehē a ia mogonei: “Tolu e tau he nofo kehe au mai he fakapotopotoaga ne mau e tau pite mamahi he tau logonaaga haaku. Taha mena ne mafuta hake tumau he loto haaku kua tamate e au e tama nakaila fanau. . . . Manako au ke tala age ke he tau tama fuata oti ne manako ke ‘matamata’ fakakū e lalolagi: ‘Tiaki!’ Liga matamata mitaki he kamataaga, ka e kona kuiti he magaaho fakamui. Nakai fai mena mitaki ne foaki he lalolagi, ko e tau mena mamahi ni. Iloa e au. Na kua matamata e au. Kia nonofo i loto he fakatokatokaaga a Iehova! Ko e puhala ni a ia he moui ne tamai e fiafia.”
19, 20. Ko e heigoa e puipuiaga kua foaki he fakapotopotoaga Kerisiano, ti fēfē?
19 Manamanatu la ke he mena ka tupu ki a koe ka tiaki e koe e takatakaiaga puipui he fakapotopotoaga Kerisiano. Tokologa ne liu manatu e puhala kelea he moui fakamua ato talia e lautolu e kupu mooli, ne nakai loto ke manamanatu ki ai. (Ioane 6:68, 69) Maeke ia mutolu ke matutaki ke moua e haohao mitaki mo e puipuiaga mai he tau malaia mo e tau matematekelea ne tupu lahi he lalolagi a Satani he nonofo fakatata tumau ke he tau matakainaga Kerisiano ha mutolu. He feoaki mo lautolu mo e o atu tumau ke he tau feleveiaaga he fakapotopotoaga ka fakamanatu tumau ki a mutolu e iloilo he tau tuaga tututonu a Iehova mo e to fakamafana ki a mutolu ke momoui fakatatau ki ai. Ha ha ia mutolu e tau kakano ke ‘fakaheke atu a Iehova ke he fakapotopotoaga lahi,’ tuga ne taute he salamo.—Sala. 35:18.
20 Mooli ke he tau puhala kehekehe, ne lauia oti e tau Kerisiano he tau magaaho ne tuga kua uka ki a lautolu ke fakatumau ha lautolu a mahani fakamooli Kerisiano. Liga lata a lautolu ke takitaki atu ke he puhala hako. Ko e heigoa haau—mo e fakapotopotoaga katoa—ka taute ke lagomatai e tau matakainaga fakahele he tau magaaho pihia? Ko e vala tala ka mui mai to kumikumi ke he puhala kua maeke ia koe ke ‘fetomaaki mo e fefakamafanaki’ ke he haau a tau matakainaga.—1 Tesa. 5:11.
To Tali Fēfē e Koe?
• Ko e heigoa ha tautolu kua fakaako mai he tau mena ne tupu ke he tagata tohia he Salamo 73?
• Ko e heigoa e mena ne tupu ki a Tina ne fakaako ki a tautolu?
• Ko e ha kua moua e koe e haohao mitaki he fakapotopotoaga Kerisiano?
[Tau Fakatino he lau 7]
Kakau he matakavi haohao mitaki; ti nonofo he fakapotopotoaga!