Mataala ne Takitaki ke he Tau Fua Mitaki
KUA mataala nakai a koe ke he tau magaaho fakamatala ne liga nakai mautali ki ai he fonua he fakapotopotoaga haau? Ko e tau matakainaga Kerisiano ha tautolu he maaga he uaafo i Turku, i Finilani, ko e mataala ha lautolu ne takitaki atu ke he tau fua mitaki.
He magaaho kua mole, ne mailoga he tau matakainaga i Turku e matakau he tau tagata Asia ne hohoko mai ke he taone ke fakaoti e talaga he toga lau pasese makimaki ne tā ke he tokaaga toga he motu. Fakamui, ne moua he matakainaga taane e tau hotela ne nonofo e tau tagata gahua mai he tau motu kehe. Ne iloa foki e ia, he magaaho pogipogi kī ne ta atu he tau pasi e tau tagata gahua mai he tau hotela ha lautolu ke he uaafo. Ne fakailoa fakamafiti e ia ke he tau matakainaga he fakapotopotoaga vagahau Peritania i Turku.
Ne mailoga he tau motua he fakapotopotoaga ia, ko e tokologa he tau tagata motu kehe kua foaki e magaaho ne nakai mautali, ke tala age ki a lautolu e fekau he Kautu, ti mafiti e tau matakainaga ke fakatokatoka e matagahua pauaki. He Aho Tapu he faahi tapu ia, hogofulu e tagata fakailoa ne fakapotopoto he tūaga pasi he matahola fitu he pogipogi. He hohoko atu fakamua, ne nakai kitia ha tagata gahua. ‘Kua mule lahi ka tautolu?’ he manamanatu he tau matakainaga. ‘Kua o kehe ka lautolu i Turku?’ Mogoia ni, taha e tagata gahua ne tui ovalolo ne fakaea mai he matapotu. Ti fakaeaea mai e tau tagata gahua tokologa. Nakai leva, ne tokologa e tagata gahua ne tutū viko tata ke he tūaga pasi. Ne gahua agataha e tau tagata fakailoa, he o atu ke he tau tagata gahua mo e tau tohi vagahau Peritania. Mitaki ai, kavi ke he taha e tulā ato moua he tau tagata gahua oti e tau nofoa ha lautolu he pasi, ti lahi e magaaho he tau matakainaga ke tutala ke he tokologa ia lautolu. He holo e pasi, ne uta he tau tagata gahua mo lautolu 126 e tohi ikiiki mo e 329 e mekasini!
Ne fakamalolō he tau fua mitaki e tau matakainaga ke liu taute e matagahua he faahi tapu hake, he ahiahi mai he leveki takaiaga. He aho uha, he hafa e hola ono he pogipogi ne taute he leveki takaiaga e feleveiaaga ma e gahua he fonua, ti 24 e tagata fakailoa ne gutu atu ke he tūaga pasi. He magaaho nei, ne ta atu foki e lautolu e tau tohi vagahau Tagalog ha kua loga e tagata ne o mai i Filipaina. He fina atu e pasi he pogipogi ia ke he uaafo, ne ta atu he tau tagata gahua mo lautolu 7 e tohi, 69 e tohi ikiiki, mo e 479 e mekasini. Manamanatu ke he olioli mo e fiafia he tau matakainaga ne fakalataha ke he matagahua!
Ato liliu e tau tagata gahua ke he tau motu ha lautolu, ne tokologa a lautolu ia ne maeke e tau matakainaga ke ahiahi he nonofo a lautolu he tau hotela ti fakamaama fakalaulahi e fekau he Kautu. Ne pehē falu tagata gahua kua fitā a lautolu he matutaki mo e Tau Fakamoli he falu matakavi he lalolagi. Ne talahau he tau tagata gahua e loto fakaaue ha lautolu ha ko e fakailoilo he tau matakainaga ke matutaki mo lautolu he nonofo i Finilani.
Kua mataala nakai a koe ke he tau tuaga ne liga nakai mautali ke tutupu he matakavi fonua he fakapotopotoaga haau? Fakailoilo nakai a koe ke hoko atu ke he tau tagata he tau feakiaga kehekehe? Ka pihia, to liga logona foki e koe tuga e olioli he tau matakainaga ha tautolu i Turku.
[Mepe/Fakatino he lau 32]
(Ma e puhala katoa ne tohi aki, kikite e tohi)
FINILANI
HELSINKI
Turku
[Credit Line]
STX Europe