Vihiatia Nakai e Koe e Mahani Hepehepe?

‘Vihiatia e Iesu e mahani hepehepe.’—HEPE. 1:9.

1. Ko e heigoa ne fakaako e Iesu hagaao ke he fakaalofa?

HE PEEHI e aoga he fakaalofa, ne tala age e Iesu ke he tau tutaki haana: “Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia feofanaki foki a mutolu. Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:34, 35) Ne poaki a Iesu ke he tau tutaki haana ke fakakite e fakaalofa foaki noa ke he taha mo e taha. Ko e fakaalofa ia ko e fakamailoga ke kitia ai a lautolu. Ne tomatoma foki a Iesu ki a lautolu: ‘Kia fakaalofa atu kia lautolu kua fai fi mo e liogi foki ma lautolu ne favale mai kia mutolu.’—Mata. 5:44.

2. Ko e tau tutaki he Keriso kua lata ke feaki e vihiatia ma e heigoa?

² Lafi ke he fakaako e tau tutaki haana hagaao ke he fakaalofa, ne fakaako e Iesu ki a lautolu e tau mena ke vihiatia. Ne talahau hagaao ki a Iesu: “Kua fiafia a koe ke he mahani tututonu, ka e vihiatia e mahani hepehepe [mahani kelea].” (Hepe. 1:9; Sala. 45:7) Fakakite he mena nei kua lata a tautolu ke nakai ni feaki e fiafia ke he tututonu ka e feaki foki e vihiatia ke he agahala, po ke mahani hepehepe. Mailoga na talahau fakahako he aposetolo ko Ioane: “Ko lautolu auloa kua hala, kua holifono foki a lautolu; ko e hala, ko e holifono ia.”—1 Ioa. 3:4.

3. Hagaao ke he vihiatia ma e mahani hepehepe, ko e tau faahi fe he moui ka fakatutala e vala tala nei ki ai?

³ Ko e tau Kerisiano mogoia kua lata ia tautolu ke hūhū hifo, ‘Vihiatia nakai e au e mahani hepehepe?’ Kia o mai a tautolu ke kumikumi mo e fakakite e puhala kua vihiatia e tautolu e tau mena kelea ke he fā e faahi kehekehe he moui: (1) ko e aga ha tautolu ke he inu fakagoagoa he kava, (2) ko e onoonoaga ha tautolu ke he tau lagatau taulātua, (3) ko e fakafehagaiaga ha tautolu ke he mahani feuaki, mo e (4) ha tautolu a onoonoaga ki a lautolu kua fiafia ke he mahani hepehepe.

Tumau ke Mailoga e Tuaga he Kava

4. Ko e ha ne fiafia ai a Iesu mo e atāina ke hataki hagaao ke he inu lahi?

⁴ Ne inu e Iesu e uaina he falu a magaaho ha kua mailoga ko e mena fakaalofa mai he Atua. (Sala. 104:14, 15) Pete ia, ne nakai fakaaoga fakahehē e ia e mena fakaalofa nei he putoia ke he inu lahi. (Fakatai 23:29-33) Ti ha ha ia Iesu e atāina ke fakatonu hagaao ke he tau mena pihia. (Totou Luka 21:34.) Ko e fakaaoga fakagoagoa he kava kua maeke ke takitaki atu ke he falu agahala kelea muikau. Ati tohia he aposetolo ko Paulo: “Aua foki neke konahia a mutolu ke he uaina, ko e mena matahavala haia; ka kia puke a mutolu ke he [a]gaga.” (Efeso 5:18) Ne tomatoma foki e ia e tau fifine motua he fakapotopotoaga ke nakai “fakatupa ke he uaina.”—Tito 2:3.

5. Ko e heigoa e tau hūhū kua lata ke hūhū e lautolu ne fifili ke inu kava?

⁵ Ka fifili a koe ke inu kava, kua lata foki ia koe ke hūhū hifo: ‘Ha ha nakai ia au e aga ha Iesu hagaao ke he inu lahi? Kaeke kua lata ia au ke fakatonu atu falu hagaao ke he mena nei, moua nakai e au e atāina ke vagahau? Inu kia au ke galo kehe e tupetupe po ke, ke fakatotoka e fakaatukehe? Lahi fēfē e kava haaku ne inu he tau faahi tapu takitaha? Tali atu fēfē au ka pehē mai taha kua lahi mahaki e inu haaku? Totoko kia a au po ke ita foki?’ Ka fakaatā e tautolu a tautolu ke fakatupa ke he lahi e uaina, kua maeke ke lauia ai e ha tautolu a malolō ke taute e tau fakatonutonuaga mitaki mo e tau fifiliaga pulotu. Ko e tau tutaki he Keriso kua eketaha ke omaoma, po ke puipui e loto manamanatu ha lautolu.—Fakatai 3:21, 22.

Kalo Kehe he Tau Lagatau Taulātua

6, 7. (a) Fakafehagai fēfē a Iesu ki a Satani mo e tau temoni? (e) Ko e ha kua tupu tolomaki e tau lagatau taulātua he vahā nei?

⁶ He nofo he lalolagi, ne totoko fakamalolō e Iesu a Satani mo e tau temoni. Ne totoko e ia e tau lagatau ha Satani ke he Haana mahani fakamooli. (Luka 4:1-13) Ne mailoga mo e totoko foki e ia e tau laliaga fakagalogalo ke fakaohooho e tau manatu mo e tau mahani haana. (Mata. 16:21-23) Ne lagomatai e Iesu a lautolu kua lata ke fehola kehe mai he pule kelea muitui he tau temoni.—Mare. 5:2, 8, 12-15; 9:20, 25-27.

⁷ He mole e faka-Patuiki a Iesu he 1914, ne fakameā e ia e lagi he tau fakaohoohoaga muikau ha Satani mo e tau temoni. Ko e fua, ko Satani—kua mua atu he mogonei—he “fakahehe e lalolagi oti.” (Fakakite. 12:9, 10) Nakai ko e mena ke ofo ai a tautolu ha kua holofa e fiafia ke he tau lagatau taulātua ti kua tupu tolomaki fakahaga. Ko e heigoa e tau fuafuaaga ka taute ke puipui aki a tautolu ni?

8. Ko e heigoa e kumikumiaga fakatagata kua lata ke taute hagaao ke he tau fifiliaga ha tautolu ke he tau mena fakafiafia?

⁸ Kua maaliali e hatakiaga he Tohi Tapu hagaao ke he tau hagahaga kelea ka matutaki mo e taulātua. (Totou Teutaronome 18:10-12.) He vahā nei, kua fakaohooho e Satani mo e tau temoni e manamanatuaga he tau tagata puhala mai he tau kifaga, tau tohi, mo e tau pelē electronic ne omoomoi e tau lagatau taulātua. Ka fifili e tau fakafiafiaaga, mogoia, lata ia tautolu takitokotaha ke hūhū hifo: ‘He tau mahina kua mole, kua fifili kia a au ke fakafiafia he tau ata kifaga, tau polokalama he televisoni, tau pelē electronic, tau tohi, po ke tau komiki kua hufia ke he tau agaaga kelea? Maama nakai e au e aoga ke fakavihia e tau fakaohoohoaga fakataulātua, po kua onoono fakateaga au ke he tau mena hagahaga kelea nei? Po kua manamanatu nakai au ke he onoonoaga ha Iehova ke he tau fifiliaga fakafiafia tino haaku? Kaeke ke hafagi e au e gutuhala ke he tau fakaohoohoaga fakasatani pihia, to omoomoi nakai he fakaalofa haaku au ki a Iehova mo e tau matapatu fakaakoaga tututonu haana ke taute e fifiliaga mo e pā fakamafiti e gutuhala ia?’—Gahua 19:19, 20.

Omaoma e Hatakiaga ha Iesu ke he Mahani Feuaki

9. Liga feaki fēfē he tagata e fiafia ke he mahani hepehepe?

⁹ Ne fakatokoluga e Iesu e tuaga ha Iehova ke he mahani feuaki. Ne pehē a ia: “Nakai kia totou e mutolu, ko ia ne eke e tagata ke he kamataaga, ne eke e ia a laua ko e tane mo e fifine, mo e pehe mai a ia, Ko e mena ia ke toka ai he tane hana matua tane mo e hana matua fifine, ka e fakalataha mo e hana hoana; ati eke ai a laua mo tino taha? Haia kua nakai tuai tokoua, ka kua tino taha na laua; hanai, ko ia kua fakalataha he Atua, aua neke vevehe he taha tagata.” (Mata. 19:4-6) Iloa e Iesu ko e tau mena kua talia he tau mata ha tautolu kua maeke ke lauia ai e tau loto ha tautolu. He haana a Lauga he Mouga, ne talahau foki e ia: “Kua fanogonogo a mutolu, ne tala mai kia lautolu ke he vaha i tuai, Aua neke faivao a koe. Ka e tala atu e au kia mutolu, ka kikite atu taha ke he fifine kia manako ki ai, kua faivao tuai a ia ke he hana loto.” (Mata. 5:27, 28) Ko lautolu kua fakatikai e hatakiaga ha Iesu, kua feaki mooli e fiafia ke he mahani hepehepe.

10. Talahau e mena ne tupu ke fakakite na maeke e tagata ke hola kehe mai he tau mena fakatelefua.

¹⁰ Kua fakatolomaki e Satani e mahani feuaki puhala he tau mena fakatelefua. Ko e fakatokaaga nei kua pukenamo he tau mena ia. Ko lautolu ne kitekite ke he tau mena fakatelefua kua uka lahi ke tatafi kehe mai he tau loto ha lautolu e tau fakatino he mahani kelea. Maeke ke hufia foki a lautolu ke he tau mena fakatelefua. Mailoga e mena ne tupu ke he taha Kerisiano. Pehē a ia: “Ne kitekite fakagalogalo e au e tau ata telefua. Ti talaga pauaki e au e lalolagi fakatai ne manatu au kua vevehe kehe mai he lalolagi ne fekafekau au ki a Iehova. Iloa e au kua hepe e matagahua nei ka e pehē ni au ki a au kua mitaki agaia e fekafekauaga haaku ke he Atua.” Ko e heigoa ne hiki ai e manamanatuaga he matakainaga taane nei? Ne talahau e ia: “Pete ni ko e taha mena uka lahi a ia ne nakaila taute e au fakamua, ne fifili au ke tala age e lekua haaku ke he tau motua.” Ko e matakainaga nei ne fakahiku ke hola kehe mai he hufiaaga fakalialia nei. “Mole e fakameā e au e moui haaku mai he agahala nei,” ne talahau e ia, “ko e mailoga laia e au kua ha ha ia au e loto manamanatu meā mooli.” Ko lautolu ne vihiatia e mahani hepehepe kua lata ke fakaako ke vihiatia e tau mena fakatelefua.

11, 12. Maeke fēfē ia tautolu ke fakakite e vihiatia ke he mahani hepehepe he magaaho ka fifili e tau leo kofe ha tautolu?

¹¹ Ko e leo kofe mo e tau kupu i ai kua maeke ke fakaohooho fakalahi e tau logonaaga ha tautolu, ti pihia foki mo e loto ha tautolu. Ko e leo kofe ko e mena fakaalofa mai he Atua ti kua leva tigahau e fai tuaga i loto he tapuakiaga mooli. (Esoto 15:20, 21; Efeso 5:19) Ka e fakaohooho he lalolagi kolokolovao ha Satani e leo kofe ne fakahakehake e mahani feuaki. (1 Ioa. 5:19) Maeke fēfē ia koe ke iloa ko e leo kofe ne fanogonogo a koe ki ai kua fakakelea a koe po ke nakai?

¹² Liga kamata ka hūhū hifo ki a koe ni: ‘Ko e tau lologo ne fanogonogo au ki ai kua fakahakehake kia e kelipopo tagata, faivao, feuaki, mo e vagahau kelea? Kaeke ke totou e au e tau kupu he falu lologo ke he taha tagata, to manatu nakai e tagata kua vihiatia e au e mahani hepehepe, po ke fakakite he tau kupu kua kelea tuai e loto haaku?’ Nakai maeke a tautolu ke talahau kua vihiatia e tautolu e mahani hepehepe ka e fakahakehake ai ke he tau lologo. “Ka ko e tau mena ke hau mai he gutu, kua hake ia mai he loto,” he talahau e Iesu, “ko e tau mena ia ke kelea ai e tagata. Ha ko e mena kua hake mai he loto e tau manatu kelea, ko e keli tagata, ko e faivao, ko e feuaki, ko e kaiha, ko e talahau pikopiko, mo e kupu kelea.”—Mata. 15:18, 19; fakatatai Iakopo 3:10, 11.

Talia e Onoonoaga ha Iesu ki a Lautolu kua Fiafia ke he Mahani Hepehepe

13. Onoono fēfē a Iesu ki a lautolu kua lotomaō ke he agahala?

¹³ Pehē a Iesu ne hau a ia ke ui atu ke he tau tagata agahala, po ko lautolu ne mahani hepehepe ke tokihala. (Luka 5:30-32) Ka e onoono fēfē a ia ki a lautolu kua lotomaō ke he puhala he agahala? Ne foaki e Iesu e hatakiaga malolō ke totoko ke he tau fakaohoohoaga ha lautolu ia. (Mata. 23:15, 23-26) Ne talahau fakamahino foki e ia: “Nakai hohoko ke he kautu he lagi a lautolu oti kua pehe mai kia au, Ko e Iki na e, ko e Iki na e; ka ko ia ni kua eke e finagalo he haku a Matua ha ha he lagi. Tokologa ke pehe mai kia au ke he aho ia, Ko e Iki na e, ko e Iki na e, nakai kia ko e mena perofeta age a mautolu ke he hau a higoa, ko e hau a higoa foki ne vega ai e mautolu ki fafo e tau temoni, ko e hau a higoa foki ne eke aī e mautolu e tau mana loga.” Ka e to tiaki e ia a lautolu ne mahani kelea ti nakai tokihala, he pehē: “Kia o kehe a a mutolu ia au.” (Mata. 7:21-23) Ko e ha ne fakafili ai pihia? Ha ko e tau tagata pihia kua nakai fakalilifu e Atua ti fakahagahaga kelea e falu ha ko e tau mahani hepehepe ha lautolu.

14. Ko e ha kua tuku kehe mai he fakapotopotoaga e tau tagata agahala ne nakai tokihala?

¹⁴ Ne poaki he Kupu he Atua ke tuku kehe e tau tagata nakai tokihala mai he fakapotopotoaga. (Totou 1 Korinito 5:9-13.) Kua latatonu e mena nei ha ko e tolu e kakano: (1) ke atāina e higoa ha Iehova he tokutoku kelea (2) ke puipui e fakapotopotoaga mai he hufiaaga kelea, mo e (3) ke lagomatai e tagata agahala ke tokihala ka maeke.

15. He mahani fakamooli ki a Iehova ko e heigoa e tau hūhū kumikumi kua lata ke fai tali?

¹⁵ Tatai nakai ha tautolu a onoonoaga mo e ha Iesu ki a lautolu ne kua taofimau ke he mahani hepehepe? Lata ia tautolu ke manamanatu ke he tau hūhū nei: ‘To fifili nakai au ke lafi tumau mo e tagata kua tuku ki tua po ko ia kua fakaoti e fakalatahaaga haana mo e fakapotopotoaga Kerisiano? Ka e kua ko ia ko e tagata tata he magafaoa ne nakai nofo i kaina? Ko e tuaga pihia ka kamatamata mooli ha tautolu a fiafia ke he tututonu mo e mahani fakamooli ha tautolu ke he Atua.a

16, 17. Ko e heigoa e mena uka ne fehagai mo e matua fifine Kerisiano, ti ko e heigoa ne lagomatai a ia ke omoi e fakatokaaga ke tuku ki tua a lautolu ne agahala mo e nakai tokihala?

¹⁶ Kikite ke he mena ne tupu ke he matakainaga fifine ne fai tama taane lahi ne fakaalofa ki a Iehova he taha magaaho. Ka e, he magaaho fakamui he moui haana ne fifili e ia e mahani hepehepe mo e nakai tokihala. Ati tuku ki tua a ia mai he fakapotopotoaga. Ko e matakainaga fifine ha tautolu kua fakaalofa lahi ki a Iehova, ka e fakaalofa foki a ia ke he tama taane haana ti uka lahi mahaki ke fakagahuahua e poakiaga faka-Tohiaga Tapu ke ua lafi mo ia.

¹⁷ Ko e heigoa e tomatomaaga ka tukuage e koe ke he matakainaga fifine nei? Ne lagomatai he motua a ia ke mailoga na maama e Iehova e mamahi ne logona e ia. Ne fakamafana he motua a ia ke manamanatu ke he mamahi ne liga logona e Iehova he magaaho ne totoko falu tama taane fakaagelu haana. Ne fakamaama he motua ki a ia, pete ni he iloa e Iehova e mamahi lahi he tau tutūaga pihia, ko e poakiaga haana ke tuku ki tua e tau tagata agahala ne nakai tokihala. Ne talia e ia e fakamanatuaga mo e omaoma fakamooli a ia hagaao ke he fakatokaaga he tuaga ke tuku ki tua.b Ko e mahani fakamooli pihia kua fakafiafia e loto ha Iehova.—Fakatai 27:11.

18, 19. (a) Ka fakaoti e matutakiaga mo ia ne mahani hepehepe to fakakite fakamooli e vihiatia ha tautolu ma e heigoa? (e) Ko e heigoa ka fua mai kaeke kua fakamooli a tautolu ke he Atua mo e fakatokaaga haana?

¹⁸ Ka fakafehagai a koe mo e tuaga pihia, fakamolemole manatu kua logona e Iehova e momoko haau. Ka fakaoti e matutakiaga mo ia ne tuku ki tua po ke fakaoti e fakalatahaaga, kua fakakite e koe kua vihiatia e koe e tau aga mo e tau mahani ne takitaki atu ke he fakahikuaga ia. Ka kua fakakite foki e koe kua lahi e fakaalofa haau ki a ia ne mahani hepehepe ke taute taha mena kua lahi e mitaki ma haana. Ko e mahani fakamooli haau ki a Iehova ka liga fakatolomaki ki mua e manako haana ne akonaki ke tokihala mo e liu mai ki a Iehova.

¹⁹ Taha e tagata ne tuku ki tua ti talia ke liu mai he magaaho fakamui, ne tohi: “Kua fiafia au he fakaalofa lahi a Iehova ke he haana tau tagata ti fakatumau e ia e meā he fakatokatokaaga haana. Ko e mena kua tuga e pāpā maō ki a lautolu i fafo ka e aoga lahi ai ti ko e mena fakaalofa mooli ke taute.” Manatu nakai a koe to lagomatai e fifine nei ke hokotia ke he fakahikuaga pihia ka tumau e tau matakainaga he fakapotopotoaga, putoia e magafaoa haana, ke matutaki mo ia ka e tuku agaia ki tua? He lalago e tautolu e tau fakatokaaga he Tohi Tapu ke he tuku ki tua, ka fakakite mooli ha tautolu a fiafia ke he tututonu mo e mailoga e tonuhia ha Iehova ke fakatokatoka e tau tuaga ke he tau mahani.

‘Fakavihia e Tau Mena Kelea’

20, 21. Ko e ha kua aoga ke fakaako ke vihiatia e mahani hepehepe?

²⁰ “Kia nonofo fakalatalata a mutolu, kia mataala,” he hataki he aposetolo ko Peteru. Ko e ha? “Ha ko ia kua eke a mutolu mo tau fi hana, ko e [T]iapolo ia, kua faifano a ia tuga ne leona tagi, kua kumi kia falu ke faiola ai e ia.” (1 Pete. 5:8) Ko koe kia taha he falu ia? Kua falanaki lahi ke he mena ne fakaako e koe ke vihiatia e mahani hepehepe.

²¹ Ke feaki e vihiatia ke he tau mena kelea kua nakai mukamuka. Kua fanau a tautolu mo e agahala, ti nonofo he lalolagi ne ha i ai e tau manako lahi he tino. (1 Ioa. 2:15-17) Ka e, he fifitaki ki a Iesu Keriso mo e feaki e fakaalofa hokulo ma Iehova ko e Atua, maeke ia tautolu ke kautū ka feaki e vihiatia ke he mahani hepehepe. Kia fakamalolō a tautolu ke ‘fakavihia e tau mena kelea,’ he mauokafua katoatoa “kua leoleo e [Iehova] hana tau tagata tapu, kua laveaki e ia a lautolu mai he tau lima he tau tagata mahani kelea.”—Sala. 97:10.

[Tau Matahui Tala]

To Tali Fēfē e Koe?

• Ko e heigoa ka lagomatai a tautolu ke kumikumi hifo ke he aga ha tautolu hagaao ke he kava?

• Ko e heigoa e tau fuafuaaga ka taute e tautolu ke puipui mai he tau lagatau taulātua?

• Ko e ha e tau mena fakatelefua kua hagahaga kelea ai?

• Fakakite fēfē e tautolu e vihiatia ke he mahani hepehepe he magaaho ka tuku ki tua a ia ne ofania e tautolu?

[Fakatino he lau 29]

Ka fifili a koe ke inu kava, ko e heigoa kua lata ke manamanatu a koe ki ai?

[Fakatino he lau 30]

Mataala ke he fakaohoohoaga fakasatani he tau fakafiafiaaga

[Fakatino he lau 31]

Ko e heigoa kua feaki e ia ne kitekite ke he tau mena fakatelefua?