Perofetaaga 1. Tau Mafuike
“To ha i ai e tau mafuike lalahi.”—LUKA 21:11.
● Ko Winnie ne 16 laia e mahina, ne toho mai he tau malonaaga i Haiti. Ko e matakau TV ne hokotaki e matematekelea ne logona e konohi fakatekiteki haana. Ne hao a ia he mafuike, ka e mamate e tau matua haana.
KO E HEIGOA NE FAKAKITE HE TAU MENA TUTUPU? He tō e mafuike ne 7.0 e malolō ki Haiti ia Ianuari 2010, ne molea e 300,000 tagata ne mamate. Lafi e 1.3 e miliona ki ai ne lauia mafiti e nakai fai kaina. Pete e kelea lahi mahaki, ko e mafuike i Haiti ne nakai kuenaia. Kavi ke he 18 e mafuike lalahi ne lauia e lalolagi katoa he vahāloto ia Aperila 2009 mo e Aperila 2010.
KO E HEIGOA E TOTOKOAGA FA MAHANI? Kua nakai lauia a tautolu ke he loga e tau mafuike; ha ko e tau matini foou he vahā nei, ati iloa lahi ai e tautolu ka e nakai pihia e tau tagata i tuai.
AOGA NAKAI E TOTOKOAGA IA? Manamanatu ke he mena nei: Nakai fakamaama he Tohi Tapu e numera he tau mafuike he tau aho fakamui. Pete ia, kua pehē ai ko e “tau mafuike lalahi” to hohoko “ke he taha mena mo e taha mena,” kua eke mo taha he tau tupuaga lahi mahaki he magahala nei he fakamauaga tala.—Mareko 13:8; Luka 21:11.
KO E HEIGOA E MANATU HAAU? Kua kitia nakai e tautolu e tau mafuike lalahi, tuga ne talahau tuai he Tohi Tapu?
Kua nakai ko e tau mafuike hokoia e tau fakamooliaga kua nonofo a tautolu he tau aho fakamui. Ka ko e taha ni a ia he tau perofetaaga ne kua fakamooli. Manamanatu ke he uaaki.
[Blurb he lau 4]
“Ko mautolu ko e [tau tagata kumikumi ke he gahuahuaaga he lalofonua] ne fakahigoa ai ko e tau mafuike lalahi. Fakahigoa ai he tau tagata oti ko e kelea lahi mahaki.”—KEN HUDNUT, U.S. GEOLOGICAL SURVEY.
[Fakatino Credit Line he lau 4]
© William Daniels/Panos Pictures