Fakaako Mai he Kupu he Atua

Ko e Heigoa e Finagalo he Atua ma e Lalolagi?

Ko e vala tala nei kua fakalagā e tau hūhū kua liga hūhū e koe mo e fakakite e matakavi ka totou e koe e tau tali he Tohi Tapu haau. To fiafia e Tau Fakamoli a Iehova ke fakatutala e tau tali nei mo koe.

1. Ko e heigoa e finagalo he Atua ma e lalolagi?

Ko e lalolagi ko e kaina he tagata. He mole e tufuga e tau agelu ke momoui he lagi, ne tufuga he Atua e tagata ke olioli ke he lalolagi. (Iopu 38:4, 7) Ti tuku e Iehova e tagata fakamua he parataiso fulufuluola ne higoa ko Etena mo e age ki a ia mo e tau fanau haana anoiha e amaamanakiaga ke olioli e moui tukulagi ke he lalolagi.​—Kenese 2:15-17; totou Salamo 115:16.

Ko e vala tote ni e kaina ko Etena he lalolagi. Ko e hoa fakamua ko Atamu mo Eva ka fanafanau ai. He tupu lahi e numera he magafaoa tagata, kua lata ia lautolu ke gahua ke he lalolagi mo e eke ai mo parataiso. (Kenese 1:28) To nakai moumou e lalolagi.​—Totou Salamo 104:5.

2. Ko e ha e lalolagi ne nakai ko e parataiso mogonei?

Ne liuliu a Atamu mo Eva ke he Atua, ti vega kehe a laua mai i Etena. Ne galo e parataiso, ti nakai fai tagata kua kautū he liuaki ai ke he tuaga fakamua. Ne pehē e Tohi Tapu: “Kua tuku age e lalolagi ke he lima hana ne mahani kelea.”—Iopu 9:24; totou Kenese 3:23, 24.

Ka e nakai nimo e Iehova e finagalo fakamua haana ma e tau tagata, po ke nakai kaumahala e Atua. (Isaia 45:18) To liuaki e ia e tau tagata ke he puhala ne finagalo a ia ki ai.​—Totou Salamo 37:11.

3. To liuaki mai fēfē he Atua e mafola ke he lalolagi?

Ma e tagata ke olioli e mafola, kua lata he Atua ke utakehe mua e tau tagata kelea. He tauaga i Amaketo, to moumou oti he tau agelu he Atua a lautolu ne totoko ke he Atua. To līlī a Satani ke he 1,000 tau, ka ko e tau tagata kua ofania e Atua to momoui ke olioli e fakatokaaga foou he lalolagi.​—Totou Fakakiteaga 16:14, 16; 20:1-3; 21:3, 4.

4. A fē ka fakaoti e matematekelea?

He 1,000 tau, to pule a Iesu mai he lagi ke he lalolagi mo e liuaki ai ke he parataiso. To utakehe foki e ia e tau agahala ha lautolu kua ofania e Atua. To utakehe e Iesu e gagao, fuakau, mo e mate.​—Totou Isaia 11:9; 25:8; 33:24; 35:1.

A fē ka fakaotioti he Atua e kolokolovao he lalolagi? Ne fakakite e Iesu e “fakamailoga” ka tata e moumouaga. Kua fakamatakutaku he tau tuaga he lalolagi he magaaho nei e fakahaoaga he tagata mo e fakakite kua nonofo a tautolu mogonei he “fakaotiaga he lalolagi.”—Totou Mataio 24:3, 7-14, 21, 22; 2 Timoteo 3:1-5.

5. Ko hai ka momoui he Parataiso anoiha?

Ne poaki e Iesu ke he tau tutaki haana ke taute tutaki mo e ke fakaako atu a lautolu ke he tau puhala he Atua he fakaalofa. (Mataio 28:19, 20) He lalolagi katoa, kua tauteute e Iehova e tau miliona tagata ke momoui he fakatokaaga foou he lalolagi. (Sefanaia 2:3) Ke he tau Fale he Kautu he Tau Fakamoli a Iehova, kua fakaako e tau tagata ke eke mo tau taane mo e tau matua taane mitaki mo e eke mo tau hoana mo e tau matua fifine mitaki. Ko e tau fanau mo e tau matua kua fakaako auloa hagaao ke he matapatu kua talitonu ke he vahā mitaki anoiha.​—Totou Mika 4:1-4.

He Fale he Kautu, to feleveia a koe mo e tau tagata ne ofania e Atua mo e manako ke iloa ke fakafiafia a ia.​—Totou Heperu 10:24, 25.

Ma e falu vala tala foki, kikite e veveheaga 3 he tohi nei, Ko e Heigoa ne Fakaako Moli he Tohi Tapu?, ne taute fakailoa he Tau Fakamoli a Iehova.