Ko e Tala Mooli ki a Amaketo

“Ha ko e tau agaga ia he tau temoni . . . kua o atu a lautolu ke he tau patuiki he lalolagi, mo e lalolagi oti kana. . . . Ne fakapotopoto foki e ia a lautolu ke he mena kua higoa ke he vagahau Heperu ko Amaketo.” (Fakalilifa ha mautolu.)—FAKAKITEAGA 16:14, 16.

KO E Amaketo kua hagaao ki ai he falu magaaho ko e “Hamaketo,” ko e higoa he mena po ke matakavi. Ka ko e mena ia kua tuga nakai haia he ha matakavi he lalolagi.

Ko e heigoa mogoia e kakano mooli he kupu “Amaketo”? Ko e ha kua fa matutaki mo e taha mena tupu, tuga e felakutaki?

Fakapotopoto ke he Mena ne Fakahigoa ko Amaketo

Ko e kupu fakamua faka-Heperu ko e Har-Magedon kua kakano “Mouga a Mekito.” Pete kua nakai fai mouga pihia, na fai matakavi ne higoa ko Mekito. Kua haia he mafegahala mahuiga he faahi tokelau ki lalo he matakavi ne nonofo ai e motu ko Isaraela i tuai. Ne loga e tau felatauaki lalahi ne fakahoko tata atu ke he matakavi ia. Ko e mena ia ati matutaki fakalataha e higoa Mekito mo e felakutaki.a

Ka ko e kakano mooli he Mekito, kua nakai ko e vahega felakutaki ne tau i ai, ka ko e kakano ati felakutaki i ai. Ko Mekito ko e vala he Motu he Maveheaga ne age he Atua ko Iehova ke he tau Isaraela. (Esoto 33:1; Iosua 12:7, 21) Ne omonuo a ia ke he tau tagata na to lalago e ia a lautolu ka o mai e tau tagata ke totoko ki a lautolu, ti taute pihia e ia. (Teutaronome 6:18, 19) Ma e fakatai, ko e haia i Mekito ne lalago fakamana e Iehova e tau Isaraela he totoko ke he patuiki Kanana ko Iapino mo e takitaki kautau haana ko Sisera.—Tau Fakafili 4:14-16.

Ko e mena ia, ko e kupu “Hamaketo,” po ke “Amaketo,” kua ha ha e fakataiaga aoga lahi. Kua matutaki ai mo e fetoko, ne ua e pule malolō ne feoka.

Kua tutala e perofetaaga he Fakakiteaga ke he magaaho kua tata mai i mua ka fakaohooho e Satani mo e tau temoni e tau fakatufono he tagata ke fakapotopoto e tau kautau ha lautolu, ti totoko fakamalolō atu ai ke he tau mena he Atua. He totokoaga to totou miliona e tau tagata ka mamate he magaaho ka fakakaumahala he Atua e tau tagata totoko.—Fakakiteaga 19:11-18.

Ko e ha e Atua ne fakamaama he Tohi Tapu ke ‘fakaalofa hofihofi noa, fakatuai e ita ka e lahi e fakaalofa,’ kua fakatupu e tamateaga he tau tagata tokologa? (Nehemia 9:17) Ke maama e tau gahua he Atua, kua lata ia tautolu ke tali tolu e hūhū: (1) Ko hai ka kamata e felakutaki? (2) Ko e ha ne putoia ai e Atua? (3) Ko e heigoa e lauiaaga tukulagi ka tupu mai he felakutaki nei ke he lalolagi mo e tau tagata i ai?

1. KO HAI KA KAMATA E FELAKUTAKI?

Ko e tauaga i Amaketo to nakai ko e gahua mahani vale he Atua. Ka e to lalago he Atua e tau tagata mitaki mai he tau tagata kua lali ke moumou a lautolu. Ko e tau tagata favale he felakutaki nei ko e “tau patuiki he lalolagi, mo e lalolagi oti kana,” ko e tau takitaki lotu he lalolagi. Ko e tau he ha? Ha ko Satani ne tuga e takitaki he punua fakatino, kua fakaohooho e tau fakatufono mo e tau matakau kautau ke totoko katoatoa ki a lautolu kua tapuaki ki a Iehova ko e Atua.—Fakakiteaga 16:13, 14; 19:17, 18.

He mailoga e peehiaga he atāina ke he vagahau mo e lotu he falu motu he vahā nei, ko e manatu ke he tau fakatufono ke fakakaupā po ke utakehe ha gahua fakalotu kua liga mamao ligo. Ka e ne tutupu e tau totokoaga ia he senetenari ke 20 aki ti hane tutupu he mogonei.b Pete ia, kua liga ua e fekehekeheaki lalahi he tau felatauaki fakamua mo e felatauaki ka matutaki mo Amaketo. Fakamua, ko e totokoaga to lauia e lalolagi katoa. Ke uaaki, ko e tali mai he Atua ko Iehova to mua atu e lahi ke he ha mena kua fitā e taute e ia he magaaho fakamua. (Ieremia 25:32, 33) Kua fakamaama he Tohi Tapu e tauaga ko e “tau ke he aho lahi he Atua mana.”

2. KO E HA NE PUTOIA AI E ATUA?

Ne fakaako e Iehova e tau tagata ne tapuaki ki a ia ke mafola mo e ke fakaalofa ke he tau fī ha lautolu. (Mika 4:1-3; Mataio 5:43, 44; 26:52) Ti to nakai fakaaoga e lautolu e tau kanavaakau ke puipui aki a lautolu ka hoko mai e totokoaga vale lahi nei. Ka nakai oho mai e Atua ke fakahao e tau tagata haana, to tatafi kehe a lautolu. Ko e mena ia mogoia, ko e higoa he Atua ko Iehova, po ke tuaga haana to fakahagahaga kelea ai. Ka maeke e tau tagata favale ke utakehe e tau tagata Haana, to taute ai a Iehova ke tuga kua nakai fakaalofa, nakai fakafili tonu, po ke nakai fai malolō. To nakai fakaai e mena ia ke tupu!—Salamo 37:28, 29.

Kua nakai manako e Atua ke fakaotioti ha tagata, ti kua foaki e ia e hatakiaga fakafili tonu ke he mena ka taute e ia. (2 Peteru 3:9) Mai he tau tala ne fakamau i loto he Tohi Tapu, kua fakamanatu e ia ke he tau tagata oti na totoko atu a ia he vahā fakamua ka totoko ke he tau tagata haana. (2 Tau Patuiki 19:35) Kua hataki mai foki he Tohi Tapu ke he magaaho i mua ka tau a Satani mo e matakau haana ne tuga e tau punua fakatino ke he tau tagata he Atua, to liu foki a Iehova ke lagomatai mo e fakafeoka e malolō ke he malolō. Kua leva he talahau tuai he Kupu he Atua to moumou e Iehova e tau tagata mahani kelea. (Tau Fakatai 2:21, 22; 2 Tesalonia 1:6-9) He magaaho ia, to nakai fakauaua ke he tau loto he tau tagata totoko kua tau a lautolu ki a ia ne Malolō Ue Atu.—Esekielu 38:21-23.

3. KO E HEIGOA E LAUIAAGA TUKULAGI KA TUPU MAI HE FELAKUTAKI NEI?

Ko e tauaga i Amaketo to totou miliona ka hao e tau momoui. Ati ko e kamataaga a ia he magahala ka mafola e lalolagi.—Fakakiteaga 21:3, 4.

Kua tutala e tohi a Fakakiteaga ke he numera kua nakai maeke ke totou “ko e moto tagata tokologa” ka hao he latauaga nei. (Fakakiteaga 7:9, 14) I lalo hifo he takitakiaga he Atua, ko lautolu nei ka lagomatai ke fakafoou e lalolagi ke he tau tuaga Parataiso tuga ne finagalo a Iehova he kamataaga.

Iloa nakai e tautolu to hoko mai a fe e totokoaga nei ke he tau tagata he Atua?

[Tau Matahui Tala]

[Fakatino he lau 6]

Lalago e Iehova ko e Atua e tau tagata haana he vahā fakamua

[Fakatino he lau 7]

To liu foki a Iehova ke lalago e tau tagata haana he tauaga i Amaketo