Ko e Fakaakoaga Tohi Tapu Kia e Tolu Taha?

▪ Ko e fakaakoaga Tolu Taha ne fakamaama ke he puhala nei pete ne tau kehekehe loga: “Tolu e Mena Moui fakaagaaga (ko e Matua, ko e Tama, ko e Agaaga Tapu), igatia mo e talahau ko e tuaga tukulagi, ne nakai molea lahi po ke tote lahi mai he taha, igatia mo e pehē ko e Atua, ti fakalataha ke he taha e Atua.” Ko e fakaakoaga Tohi Tapu nakai anei?

Ia Mataio 28:19 ne fa tohi ai ke fakamooli aki e taofiaga. Ko e kupu ne fatiaki mai e Iesu: “Hanei, kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu.” Mooli, ko e Matua, ko e Tama, mo e ko e agaaga tapu kua talahau oti he kupu tohi nei. Ka e, nakai fai mena ne talahau hagaao ke he taha e mena moui. Kua poaki e Iesu ke he tau tutaki Iutaia haana ke fakaako mo e papatiso e tau tagata ke he higoa he Matua, he Tama, mo e he agaaga tapu. Ha ko e motu, ko e heigoa ne talitonu e tau Iutaia ki ai?

He moua he motu ha Isaraela e maveheaga Fakatufono, ne fakatū e vala he Tohi Tapu, ne poaki ki a lautolu: “Aua neke eke e koe mau e tau atua kehe hoku mua.” (Teutaronome 5:7) Fiha e tagata ne hagaao ki ai he mena nei? He nakai malokiloki, ko e Teutaronome 6:4 ne totou: “Isaraela na e, fanogonogo mai a, ko Iehova ko e ha tautolu a Atua, ko Iehova ne tokotaha ni a ia”—nakai tokotolu i loto he tokotaha. Ko e o kehe mai laia a Isaraela i Aikupito, ne ha ha i ai a Osiris, Isis, mo Horus (fakakite he faahi hema)—taha he tau atua tolu taha loga—ne tapuaki ki ai. Ko e mena ia, ne poaki ki a Isaraela ke tapuaki ke he taha ni e Atua. Aoga mooli fēfē ma e tau tagata ke maama e poakiaga nei? Hagaao ke he Dr. J. H. Hertz, ko e akoako: “Ko e fakailoaaga mua ue atu nei he taha hokoia e atua ko e fakamooliaga he felakutaki ke he loga e tau atua . . . Kua utakehe he Shema e tolu taha tapu he taofiaga Kerisiano ha ko e holia ke he Tataiaga he Atua.”a

Ha ko e Iuta a Iesu tali mai he fanau, ne hataki ki a ia ke muitua ke he poakiaga taha nei. Mole e papatiso haana, he kamatamata he Tiapolo, ne pehē a ia: “Ati fano kehe a a koe ma Satani; ha ko e mena kua tohi, kia hufeilo atu a koe ke he Iki [Iehova] hau a Atua, ko ia ni hokoia ke fekafekau atu a koe ki ai.” (Mataio 4:10; Teutaronome 6:13) Maeke ia tautolu ke iloa ua e mena mai he mena nei ne tupu. Fakamua, ne lali a Satani ke fakataki a Iesu ke tapuaki ke he taha tagata ka e nakai ki a Iehova, ko e laliaga ka nakai fai kakano kaeke ko Iesu ko e vala taha mo e Atua. Uaaki, ne fakamaaliali e Iesu kua taha ni e Atua kua lata ke tapuaki he pehē a ia “ko ia ni hokoia,” nakai ko “taua,” ane mai talahau e ia kaeke ko e vala a ia he Tolu Taha.

He iloa he tau tagata e iloilo tonu he Atua ti manako ke fekafekau ki a ia, ne papatiso a lautolu “ke he higoa he Matua, mo e Tama, mo e Agaga Tapu.” (Mataio 28:19) Kua maama mo e talia e lautolu e pule a Iehova mo e matagahua ha Iesu Keriso he gahuahuaaga he finagalo a Iehova. (Salamo 83:18; Mataio 28:18) Kua maama foki e lautolu e vala mo e gahuaaga he agaaga tapu he Atua, ko e malolō gahuahua haana.—Kenese 1:2; Kalatia 5:22, 23; 2 Peteru 1:21.

Kua fakamalokiloki he fakaakoaga Tolu Taha e tau tagata ke loga e tau senetenari. He taha faahi, ne lagomatai e Iesu e tau tutaki haana mo e takitaki a lautolu ke he “Atua moli tokotaha ni,” ko Iehova.—Ioane 17:3.

[Matahui Tala]

[Fakatino Credit Line he lau 31]

Musée du Louvre, Paris