Ko e Aga ka Fakakona e Tau Manamanatuaga ha Tautolu​—Mahekeheke

Ne pihia a Napoleon Bonaparte. Ne pihia a Julius Caesar. Ne pihia a Alexander the Great. Pete e pule mo e lilifu ne moua e lautolu, ne feaki he tau tagata taane nei he tau loto ha lautolu e aga ka fakakona e manamanatuaga he tagata. Igatia a lautolu tokotolu mo e mahekeheke ke he taha.

“Ne mahekeheke a Napoleon ki a Caesar, mahekeheke a Caesar ki a Alexander [the Great], ti ko Alexander, kua talahau e au ne mahekeheke ki a Hercules, ne nakai moui,” he tohi he pulotu Peritania ko Bertrand Russell. Fakamatematekelea he mahekeheke e ha tagata, pete he mautū lahi a ia, ko e heigoa ni e tau aga haana, mo e pete e tau kautūaga haana he moui.

Ko e mahekeheke ko e logonaaga fakafualoto ke he falu ha ko e ha lautolu a tau koloa, monuina, tau mena mitaki, mo e falu foki. Hagaao ke he taha tohi faka-Tohi Tapu, ko e tagata mahekeheke ne nakai manako ni a ia ke tuga kua monuina falu ka e ita ka moua he taha tagata e mena ne nakai moua e ia ti manako ke uta kehe mai he tagata ia.

Kua iloilo a tautolu ke kumikumi e puhala kua maeke e mahekeheke ke tupu hake ia tautolu mo e tau hagahagakelea he tau mena ia. Mua atu e lata ha tautolu ke iloa e tau puhala ka taute e tautolu ke puipui e mahekeheke neke pule ke he tau momoui ha tautolu.

KO E AGA KA FAKAOHOOHO E MAHEKEHEKE

Ha ko e tau tagata nakai mitaki katoatoa ‘kua manako lahi ke he mahekeheke’ ko e tau tuaga kehekehe ka fakaohooho mo e fakamalolō e manako nei. (Iako. 4:5) Ke iloa e taha he tau mena ia, ne tohi he aposetolo ko Paulo: “Aua neke eke a tautolu mo tau tagata hula noa, aua neke fepalekoaki a tautolu, aua neke mahekeheke a tautolu ko e taha kia taha.” (Kala. 5:26) Ko e aga fetoko kua taute e nakai mitaki katoatoa ha tautolu ke hihiga lahi foki ke he mahekeheke. Tokoua e Kerisiano ne higoa ko Cristina mo Joséa ne iloa mooli e mena nei.

Ko Cristina, ko e paionia tumau ne pehē: “Ne fa mailoga e au kua onoono mahekeheke au ke he falu. Ne fakatatai e au e tau mena ha lautolu ne moua mo e tau mena ne ai fai au.” He taha mogo, ne kai auloa a Cristina mo e hoa ne moua e kotofaaga ke he gahua faifano. He mailoga ai ko ia mo e taane haana ko Eric ne teitei atu taha mo e leveki takaiaga mo e hoana haana ti teitei tatai e tau kotofaaga he mogo fakamua, ne pehē a Cristina: “Ko e taane foki haaku ko e motua! Ti maeke fēfē a mua ke taute e gahua faifano ka e ai fai a maua?” Ko e mahekeheke ne fakalagalaga he aga fetoko, ne fakapouli a ia ke he gahua mitaki haana mo e taane haana ne taute ti tupu hake ia ia e nakai makona ke he moui ha laua.

Ne manako a José ke eke mo fekafekau lagomatai he fakapotopotoaga. Mogo ne nakai kotofa a ia ka e kotofa falu, ne mahekeheke a ia ki a lautolu ti logona hifo e ia e fakafualoto ke he leveki he kau he tau motua. “Ne fakatupu he mahekeheke au ke feaki e vihiatia ke he matakainaga taane nei mo e manamanatu hehē ke he tau fatuakiloto haana,” ne talahau a José. “Ka pule e mahekeheke ke he moui haau, to maeke a koe ke mahani fulukovi mo e nakai manamanatu fakahako.”

TAU FIFITAKIAGA FAKA-TOHI TAPU KUA FAKAAKO A TAUTOLU

Loga e fifitakiaga hataki i loto he Tohi Tapu. (1 Kori. 10:11) Kua fakakite he falu he tau mena nei e puhala ne tupu mai e mahekeheke mo e puhala kua fakakona ai a lautolu ne fakaatā e mena nei ke pule ki a lautolu.

Tuga anei, ko e tama taane fakamua ha Atamu mo Eva ko Kaino, ne ita lahi he talia e Iehova e poa ha Apelu ka e nakai ko e haana. Na maeke a Kaino ke fakamafola e tuaga nei, ka kua pouligia lahi a ia he mahekeheke ati kelipopo e ia e matakainaga haana. (Kene. 4:4-8) Ko e mena ia ne pehē e Tohi Tapu hagaao ki a Kaino ne “mai ia ia ne mahani kelea,” ko Satani!​—1 Ioa. 3:12.

Ne mahekeheke e lafu tokohogofulu ha Iosefa ke he fakafetuiaga uho ha Iosefa mo e matua taane ha lautolu. Tupu lahi e vihiatia ha lautolu ki a Iosefa he mogo ne tala age e ia e miti fakaperofeta haana. Ne manako foki a lautolu ke kelipopo a ia. Fakahiku, ne fakafua e lautolu a ia ko e tupa ti takitaki fakakelea e matua taane ha lautolu ke talitonu kua mate tuai a Iosefa. (Kene. 37:4-11, 23-28, 31-33) Fai tau he mole, ne talahau e lautolu e agahala ha lautolu, pehē e taha ke he taha: “Kua hala moli a tautolu, ke he matakainaga ha tautolu, ne kitia e tautolu e mamahi he hana loto he olelalo mai a ia kia tautolu, ka e nakai mahalohalo ai a tautolu.”​—Kene. 42:21; 50:15-19.

He mena ne tupu ki a Koru, Tatano, mo Apiramo, ne tupu e mahekeheke he mogo ne fakatatai e lautolu e tau kotofaaga ha lautolu mo e ha Mose mo Arona. Ne tukumale e lautolu a Mose he ‘eke mo iki’ mo e fakatokoluga hake e ia a ia he falu. (Nume. 16:13) Nakai mooli e tukupau nei. (Nume. 11:14, 15) Ko Iehova ne kotofa a Mose. Ka kua mahekeheke e tau tagata totoko nei ke he tuaga ha Mose. Fakahiku ai, ne takitaki he mahekeheke a lautolu ke he moumouaga he lima a Iehova.​—Sala. 106:16, 17.

Ko e Patuiki ko Solomona ne kitekite ke he laulahi he mahekeheke. Ko e fifine ne mate e tama mukemuke fanau foou ne lali ke fakahehē e taha fifine ke manamanatu ko e tama he fifine ia ne mate. He fakafiliaga ne mui mai, ne talia e fifine ne pikopiko ke tamate e tama mukemuke ne moui. Ka e eketaha a Solomona ke liuaki e tama ke he matua fifine mooli haana.​—1 Patu. 3:16-27.

Na hagahaga kelea lahi mahaki e mahekeheke. Ko e tau fifitakiaga faka-Tohi Tapu ne fitā he totoku kua fakakite na maeke ai ke takitaki ke he vihiatia, nakai fakafili tonu, mo e kelipopo. Lafi ki ai, he tau mena takitaha ne tutupu ne nakai fai mena e tagata mitaki ne taute ke lauia a ia he tau mena ia. Fai mena nakai ka taute e tautolu ke kitia mooli kua nakai pule e mahekeheke ke he tau momoui ha tautolu? Ko e heigoa e tau puhala ka taute e tautolu ke tului aki e mahekeheke?

TULUIAGA MALOLŌ!

Feaki e fakaalofa mo e fakaalofa fakamatakainaga. Ne tomatoma he aposetolo ko Peteru e tau Kerisiano: “Kua fakamea tuai e mutolu ha mutolu a tau loto he omaoma a mutolu ke he kupu moli, ke he Agaga, kua hoko ke he fakaalofa fakamooli ke he tau matakainaga, ko e mena ia kia feofanaki fakalahi ai a mutolu mai he loto mea.” (1 Pete. 1:22) Ti ko e heigoa e fakaalofa? Ko e aposetolo ko Paulo ne tohi: “Kua fakauka e fakaalofa, to totonu, nakai mahekeheke e fakaalofa, nakai hula e fakaalofa, ti nakai fakatokoluga, Nakai mahani fuafuakelea, nakai kumi e ia hana tau mena.” (1 Kori. 13:4, 5) Nakai kia ko e feaki he fakaalofa pihia ke he falu he tau loto ha tautolu ka tamate e manako kelea ke mahekeheke? (1 Pete. 2:1) He nakai mahekeheke ki a Tavita, ko Ionatana ne ‘fakaalofa atu kia ia, tuga ne fakaalofa kia ia ni.’​—1 Samu. 18:1.

Feoaki mo e tau tagata mahani Atua. Ko e tagata ne fati e Salamo 73 ne mahekeheke ke he moui nakai fai lekua mo e monuina he tau tagata mahani kelea. Pete ia, ne kautū a ia ke he mahekeheke haana he fina atu ke he “faituga he Atua.” (Sala. 73:3-5, 17) Ko e feoaki mo e tau matakainaga tapuaki ne lagomatai e salamo ke mailoga e tau monuina ne moua e ia mai he “fakatata ke he Atua.” (Sala. 73:28) He feoaki tumau mo e tau matakainaga talitonu he tau feleveiaaga Kerisiano ka taute pihia foki a tautolu.

Eketaha ke taute e mahani mitaki. Mole e mailoga he mahekeheke mo e vihiatia kua tupu ia Kaino, ne tala age e Atua ki a ia: ‘Kia mahani mitaki.’ (Kene. 4:7) Ko e heigoa e “mahani mitaki” kua lata mo e tau Kerisiano? Pehē a Iesu kua lata ia tautolu ke ‘fakaalofa a tautolu ke he Iki ha tautolu a Atua mo e ha tautolu a loto katoa, mo e ha tautolu a agaga katoa, mo e ha tautolu a manatu katoa. Kia fakaalofa atu a tautolu kia ia ne katofia mo tautolu, kia tuga foki na tautolu kia tautolu.’ (Mata. 22:37-39) Ko e makona kua moua mai e tautolu he fakamatapatu e tau momoui ha tautolu he fekafekau ki a Iehova mo e lagomatai falu ko e tuluiaga malolō ke he tau logonaaga mahekeheke. He fakalataha fai kakano ke he fakamatala he Kautu mo e gahua taute tutaki ko e puhala mitaki ke fekafekau ke he Atua mo e tau katofia ha tautolu mo e tamai ki a tautolu e “fakamonuina a Iehova.”​—Fakatai 10:22.

“Kia fiafia a mutolu fakalataha mo lautolu kua fiafia.” (Roma 12:15) Ne fiafia a Iesu ke he kautūaga he tau tutaki haana, ti fakakite e ia to lahi atu e gahua fakamatala ka taute e lautolu he fakatatai ke he gahua fakamatala haana. (Luka 10:17, 21; Ioane 14:12) Kua kaufakalataha a tautolu ko e tau fekafekau ha Iehova; ko e kautūaga ha tautolu takitokotaha mogoia ko e fakamonuina ma e tau tagata oti. (1 Kori. 12:25, 26) Nakai kia lata ia tautolu ke fiafia ka e nakai logona hifo e mahekeheke ka moua he falu e kotofaaga ne mahomo atu?

NAKAI KO E TAU MUKAMUKA!

Ko e tau atu ke he mahekeheke ko e mena loa lahi. Ne talahau e Cristina: “Malolō agaia e tau manako haaku ke mahekeheke. Pete he vihiatia ai e au, kua ha ha i ai agaia e logonaaga, ti lata au ke totoko tumau ai.” Pihia foki e tau ha José. “Lagomatai e Iehova au ke loto fakaaue ke he tau mahani mitaki he leveki he kau he tau motua,” he talahau e ia. “Ko e fakafetuiaga mitaki mo e Atua kua uho lahi.”

Ko e mahekeheke e taha he “tau gahua he tino,” ne kua lata he tau Kerisiano oti ke tau atu. (Kala. 5:19-21) He nakai fakaatā e mahekeheke ke takitaki a tautolu, maeke ia tautolu ke fiafia lahi e tau momoui mo e fakafiafia ha tautolu a Matua he lagi, ko Iehova.

[Matahui Tala]

[Blurb he lau 17]

“Kia fiafia a mutolu fakalataha mo lautolu kua fiafia”