Mose—Tagata Fakatokolalo
KO E HEIGOA E FAKATOKOLALO?
Putoia he mahani fakatokolalo e atāina mai he fia lahi po ke fakaikaluga. Ko e tagata fakatokolalo ne nakai onoono fakateaga ke he falu. Ko e ha tagata nakai mitaki katoatoa kua fakatokolalo kua lata foki ke fakalatalata, he mailoga e ia e tau kaupāaga haana.
FAKATĀTĀ FĒFĒ E MOSE E MAHANI FAKATOKOLALO?
Nakai fakaatā e Mose e pule haana ke matalahi a ia. Fa mahani, ka moua he tagata e taha pule, kua mafiti ke kitia e fakatokolalo po ke fakatokoluga haana. Ko e tagata tohia ko Robert G. Ingersoll he senetenari ke hiva aki ne tohi ai pehē: “Laulahi he tau tagata kua maeke ke fakauka ke he tau ekefakakelea. Kaeke ke manako a koe ke iloa mooli e loto he tagata, age ki a ia e pule.” He puhala ia, ne fakatoka e Mose e fakafifitakiaga ofoofogia he mahani fakatokolalo. Pihia fēfē?
Ne moua e Mose e pule ne mua, ha kua poaki a Iehova ki a ia ke takitaki a Isaraela. Ka e nakai taute he pule ia a Mose ke fakaikaluga. Ma e fakatai, manamanatu ke he puhala fakalatalata ne fehagai a ia mo e hūhū uka ke he tau tonuhia he tau tufaaga. (Numera 27:1-11) Ne mamafa lahi e hūhū, ha ko e fifiliaga ke fakatū matafakatufono ma e tau atuhau a mui.
To tali atu fēfē a Mose? To fakakakano kia e ia ha ko e takitaki ha Isaraela, kua latatonu a ia ke taute e fifiliaga ke he manatu? To hihiga kia a ia ke he haana ni a lotomatala, tau mena iloa haana, po ke iloilo lahi haana ke he finagalo ha Iehova?
Liga to taute pihia he tagata fakaikaluga. Ka e nakai pihia a Mose. Talahau he fakamauaga he Tohi Tapu ki a tautolu: “Uta ai e Mose [e] tau kupu ki mua a Iehova.” (Numera 27:5) Manamanatu la! Pete foki he mole e kavi ke he 40 e tau he takitaki e motu ha Isaraela, ne nakai falanaki a Mose ki a ia ni, ka ki a Iehova. Kitia mitaki e tautolu he mena nei e fakatokolalo ha Mose.
Ne nakai kuku mau a Mose ke he pule haana. Fiafia a ia he mogo ne fakaatā e Iehova e falu Isaraela ke eke mo tau perofeta ke gahua fakalataha mo ia. (Numera 11:24-29) He tala age e matua fugavai haana ke tufatufa falu he tau matagahua haana, ne taute fiafia ai e Mose. (Esoto 18:13-24) He fakaotiaga he moui haana, pete ne malolō agaia e tino, ne ole a Mose ki a Iehova ke kotofa e taha ke hukui e gahua haana. Magaaho ne fifili e Iehova a Iosua, ne lalago loto katoa e Mose e tama fuata, he tomatoma a ia ke he tau tagata ke muitua e takitakiaga ha Iosua ke he Motu he Maveheaga. (Numera 27:15-18; Teutaronome 31:3-6; 34:7) Ke iloa tonu, ne lilifu lahi ki a Mose ke takitaki e tau Isaraela he tapuakiaga. Ka e nakai tuku fakamua e ia e pule haana i mua he tau momoui he falu.
KO E HEIGOA E TAU FAKAAKOAGA MA TAUTOLU?
Nakai manako a tautolu ke fakaatā e pule malolō po ke iloilo pauaki ke fakatokoluga a tautolu. Manatu: Ke maeke ke aoga ki a Iehova, ko e ha tautolu a fakatokolalo kua lata tumau ke mahomo hake he iloilo ha tautolu. (1 Samuela 15:17) Ka fakatokolalo mooli a tautolu, to eketaha a tautolu ke fakagahua e fakatonuaga pulotu he Tohi Tapu: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu.”—Tau Fakatai 3:5, 6.
Fakaako foki he fakafifitakiaga ha Mose a tautolu ke nakai tuku e aoga lahi mahaki ke he tau tuaga po ke pule ha tautolu.
Aoga nakai ki a tautolu e muitua ke he fakafifitakiaga he mahani fakatokolalo ha Mose? Nakai taumaleku! Ka feaki e tautolu e mahani fakatokolalo mooli, kua fakamukamuka e tautolu e moui he tau tagata ne takatakai ia tautolu, he futiaki a tautolu ki a lautolu. Mua atu, kua futiaki e tautolu a tautolu ki a Iehova ko e Atua ko ia ne fakatātā e mahani fulufuluola nei. (Salamo 18:35) “Totoko he Atua ke he tau tagata fakatokoluga, ka e foaki mai e fakaalofa noa kia lautolu kua holoilalo.” (1 Peteru 5:5) Ko e kakano fakalagalaga mooli ke fifitaki e mahani fakatokolalo ha Mose!