Ko e Heigoa e Amaamanakiaga ma e Tau Tupuna Haaku?

TAHA magaaho kua mole, ne ha ha i ai e mataulu tala fakalagalaga he The Chosun Ilbo, ko e nusipepa Korea. Hūhū ai: “‘Mitaki Lahi a Shim Cheong,’ Ne Nakai Iloa a Iesu​—Fano Kia a Ia ke he Afi Tote?”

Ne fuluola e mataulu tala ha ko Shim Cheong ko e fifine fuata fakahelehele he tala fakatai Korea ne foaki e moui haana ke lagomatai e matua taane matapouli haana. He tau tau loga, ne nava lahi mahaki ki a ia. I Korea, ne eke a Shim Cheong mo fakafifitakiaga he tama fifine fakamooli katoatoa.

Ke he tokologa, ko e manatu ke fakahala e tagata pihia he afi tote ha kua nakai ko e Kerisiano papatiso a ia ne tuga kua nakai tonu, ti fakalialia foki. Mole ia, ko e tala ne kua leva tigahau e tupu ato talahau e fekau hagaao ke he Keriso he maaga haana.

Kua putoia he vala tala e hūhū tala ke he akoako. Ne hūhū ki a ia ko lautolu oti ne mamate ka e nakai moua e magaaho ke fakaako hagaao ki a Iesu ne fakahala oti ke he afi tote. Ko e tali? “Nakai iloa e mautolu. Fuafua e mautolu kua liga fai puhala e Takitaki Faka-Atua [ma e tau tagata pihia].”

KO E POAKIAGA MA E FAKAMOUIAGA

The New Catholic Encyclopedia ne pehē: “Latatonu e papatisoaga ke moua e fakamouiaga. Tuga ni he talahau he Keriso, ka nakai liu fanau fakafoou e tagata ke he vai mo e Agaga Tapu, to nakai maeke a ia ke hū atu ke he Kautu he Atua (Jn 3:5).” Ha ko e mena nei, falu ne talitonu ko lautolu ne mamate ka e nakai papatiso kua tolo a lautolu ke he afi tote po ke matematekelea he taha puhala foki ka mole e mate.

Ka e tokologa ne manamanatu kua goagoa e taofiaga ia. Totou miliona e tau tagata ne mamate ka e nakai iloa e Tohi Tapu. Latatonu kia a lautolu ke fakakikiveka tukulagi? Ko e heigoa ne talahau he Tohi Tapu ke he mena ia?

AMAAMANAKIAGA NE MAVEHE HE TOHI TAPU

Ne fakakite fakamaaliali he Tohi Tapu kua nakai tiaki he Atua e tau tagata ne momoui ka e nakai iloa e tau puhala haana. Fakamafana he Gahua 17:30 a tautolu: “Kua nakai manamanatu ki ai e Atua ke he vaha ne goagoa ai.” Ko e heigoa mogoia e amaamanakiaga ne fakatoka mai he Tohi Tapu ma lautolu ne mamate ka e nakai moua e magaaho ke fakaako hagaao ke he Atua?

Maeke ke moua e tali he talahauaga ha Iesu ke he taha he tau tagata matahavala ne mate ne fakatautau fakalataha mo ia. Pehē e tagata ki a Iesu: “Kia manatu mai a a koe kia au ka haele mai a koe ke he hau a kautu.” Ko e heigoa e tali ha Iesu? “Kua moli lahi he tala atu e au ki a koe he aho nei, To fakalataha a koe mo au i Parataiso.” (NW)​—Luka 23:39-43.

Mavehe kia a Iesu to fina atu e tagata ia ke he lagi? Nakai. Kua nakaila “liu foki fanau” e tagata ia ke he vai mo e agaaga, ko e tau mena fakamua ke maeke ke hao atu ke he Kautu he lagi. (Ioane 3:3-6) Ka e mavehe e Iesu ko e tagata matahavala ia to liu moui i Parataiso. Ha ko e Iutaia, ne liga mahani a ia mo e Parataiso he lalolagi​—ko e kaina ko Etena​—ne fakamaama he tohi fakamua he Tohi Tapu. (Kenese 2:8) Ko e maveheaga ha Iesu ne foaki ki a ia e amaamanakiaga mooli he liu tu mai ke he Parataiso he magaaho ka liu fakatu ai he lalolagi.

Ne mavehe he Tohi Tapu e “liu foki tutu mai a lautolu kua mamate, ko lautolu ne tututonu katoa mo lautolu ne hepehepe.” (Gahua 24:15) Ko “lautolu ne hepehepe” kua nakai hokotia ke he tau tuaga tututonu he Atua ha kua nakai iloa e lautolu e finagalo he Atua. To fakaliu tu mai e Iesu e tagata matahavala hepehepe ne tutala mo ia, ti pihia mo e tau miliona, liga tau piliona ia lautolu ne mamate ka e nakai iloa ai. Mogoia, he Parataiso he lalolagi to fakaako a lautolu ke he tau puhala he Atua, mo e to moua e lautolu e magaaho ke fakakite kua fakaalofa a lautolu ke he Atua he omaoma ke he tau poakiaga haana.

MAGAAHO KA FAKALIU TU MAI A LAUTOLU NE HEPEHEPE

Ka fakaliu tu mai a lautolu ne hepehepe, to fakafili kia a lautolu ke he ha lautolu a tau gahua kua mole? Nakai. Ia Roma 6:7 ne pehē: “Ko ia kua mate kua toka noa a ia mai he hala.” To totogi e tau agahala ha lautolu ne hepehepe he mamate. To fakafili ai a lautolu fakavē ke he tau mena ne taute e lautolu he mole e liu tu mai ha lautolu, nakai ko e tau mena ne taute e lautolu he nakai iloa ato mamate a lautolu. To aoga fēfē ki a lautolu?

Ka mole e liu tu mai, ko lautolu ne hepehepe to moua e magaaho ke fakaako e tau fakatufono he Atua ka fakakite he magaaho ka fofola e tau tohi vakai fakatai. To fakafili mogoia a lautolu “ke lata mo e ha lautolu a mahani,” kakano kua omaoma a lautolu ke he tau fakatufono he Atua po ke nakai. (Fakakiteaga 20:12, 13) Ma e tokologa ia lautolu ne hepehepe, nakai kakano ko e magaaho ke uaaki anei, ka ko e magaaho fakamua mooli ma lautolu ke moua e moui tukulagi he lalolagi he fakaako mo e taute e finagalo he Atua.

Ko e fakaakoaga Tohi Tapu nei ne kua lagomatai e tokologa ke liu feaki e tua ke he Atua. Ko Yeong Sug e taha ia lautolu. Ne feaki hake a ia ko e Katolika malolō lahi. Ko e tau tagata he magafaoa haana ko e tau akoako. He amanaki mo taopou pope, ne matutaki a ia ke he fale lotu pope. Fakamui, ne toka e ia ha kua nakai fiafia ke he tau mena ne kitia e ia i ai. Lafi ki ai, nakai talia e ia e fakaakoaga ke he afi tote ha kua logona hifo e ia ko e fakakikiveka he tau tagata ke he afi tote kua nakai tonu po ke fakaalofa.

Ti taha he Tau Fakamoli a Iehova ne fakakite ki a Yeong Sug e tau kupu nei mai he Tohi Tapu: “Ko lautolu kua momoui, kua iloa e lautolu to mamate a lautolu; ka ko lautolu ne mamate nakai iloa e lautolu ha mena, to nakai tuai fai taui a lautolu.” (Fakamatalaaga 9:5) Ne lagomatai he Fakamoli a ia ke mailoga ko e tau tupuna haana kua nakai fakakikiveka he afi tote. Ka kua momohe a lautolu he mate, mo e fakatali ke he liu tu mai.

He iloa kua tokologa e tagata ne nakaila logona e kupu mooli mai he Tohi Tapu, ne tokaloto e Yeong Sug e tau kupu ha Iesu ia Mataio 24:14: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” Kua fakalataha a ia mogonei ke he fakamatalaaga he tala mitaki mo e tala age ke he falu e amaamanakiaga homo ue atu haana ne fakavē ke he Tohi Tapu.

“NAKAI FAKAMAILOGA TAGATA E ATUA”

“Nakai fakamailoga tagata e Atua,” he tala mai he Tohi Tapu ki a tautolu, “ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.” (Gahua 10:34, 35) Ko e fakafili tonu mitaki katoatoa anei ne amanaki oti a tautolu ke he Atua ne kua “fiafia a ia ke he tututonu mo e fakafiliaga tonu.”​—Salamo 33:5.