Puhā Hūhū
◼ Kua lata kia he Tau Fakamoli a Iehova ke tufa viko e tau lauga ne tapaki po ke tau lauga mau tuai?
Kua fakamalolō mo e atihake he tau lauga faka-Tohi Tapu a tautolu. (Gahua 15:32) Ti ko e aga pauaki ke manako ke age e tau vala tala atihake pihia ki a lautolu ne nakai ha ha i ai. Ha kua loga lahi e tau matini tapaki mogonei, kua mukamuka ke tapaki e lauga mo e tufa age ke he falu. Toka agaia he falu e tau lagaki he tau lauga ne tapaki, putoia e tau lauga ne taute he tau tau loga kua mole, mo e manatu mitaki ne age e lautolu e tau lauga nei po ke kua tapaki ke fakaaoga e tau kapitiga. Falu ne taute e tau faahi Web mo e tuku e tau lauga i ai ma e ha tagata ke moua ai.
Maama ai, nakai totoko ke he mena ia kaeke kua tapaki e tautolu e tau lauga ma e fakaaogaaga fakatagata po ke age ke he tau tagata he magafaoa ha tautolu. Lafi ki ai, to fakatoka he tau motua e tau lauga ke tapaki ke lata mo e tau tagata ne fai matafatia e tau faahi tino he fakapotopotoaga ti nakai maeke ke o mai ke he tau feleveiaaga. Pete ia, fai kakano mitaki ma tautolu ke nakai tufa viko e tau lauga mau tuai (transcript) po ke tau lauga ne tapaki.
Ha ko e mena fa taute e tau lauga mo e tokaloto ai e tau manako he fakapotopotoaga, mukamuka lahi ia tautolu ke fakakeukeu e tau manatu mai he tapakiaga ne tufa viko, ha kua nakai mailoga e tautolu e puhala ne lauga mai. Pihia foki, to uka ia tautolu ke iloa e tagata ne taute e lauga mo e magaaho ne taute ai, ti maeke ia tautolu ke mauokafua ko e vala tala ne fakatoka mai kua foou mo e hakotika. (Luka 1:1-4) Matutaki atu, ko e tufa viko e tau lauga mau tuai po ke tau tapakiaga he tau lauga ka kamatamata e falu ke foaki po ke talia teao e onoonoaga mo e lilifu.—1 Kori. 3:5-7.
Kua gahua malolō e fekafekau fakamoli mo e loto matala ke fakatoka mai e tau fuafuaaga kai ke he tau magaaho tonu. (Luka 12:42) Putoia he mena nei e fakatokaaga ma e tau lauga ke foaki ke he tau fakapotopotoaga takitaha he Tau Fakamoli a Iehova mo e tau tapakiaga autiō (audio) ka moua mai he faahi Web jw.org pauaki. Maeke ia tautolu ke mauokafua to fakatoka mai he fekafekau fakamoli mo e loto matala mo e haana Kau Fakatufono e tau mena kua latatonu mo tautolu ke maeke ke mauokafua ke he tua.—Gahua 16:4, 5.