Puhala ke Fakaaoga e Tau Tapakiaga Autiō
1. Lafi ke he tau tohi ne kua tohia, ko e heigoa e tau foakiaga aoga kua moua e tautolu?
1 Tokologa ne fiafia ke fakaaoga e jw.org ke totou e tau kupu fiafia mo e tonu he kupu mooli. (Fakama. 12:10) Ka kua fakaaoga nakai e koe e tau tapakiaga autiō? Maeke e tau mena nei ke fanogonogo ke he tau vala tala loga he ha tautolu a faahi kupega hila. Liga aoga fēfē e tau tapakiaga autiō ki a tautolu?
2. Maeke fēfē a tautolu ke fakaaoga e tau tapakiaga autiō ma e ha tautolu a fakaakoaga fakatagata po ke fakamagafaoa?
2 Ma e ha Tautolu a Fakaako Fakatagata po ke Fakaako Fakamagafaoa: Fanogonogo ke he tau tapakiaga autiō he Tohi Tapu, tau mekasini, po ke tohi ka ō fenoga po ke taute e tau matagahua he tau aho takitaha ka lagomatai a tautolu ke fakaaoga fakamitaki e tau magaaho ha tautolu. (Efeso 5:15, 16) Maeke a tautolu ke lafi e tau mena kehekehe ke he ha tautolu a tapuakiaga he magafaoa he fanogonogo ke he totouaga he vala tala ka e muitua ke he lagaki he tohi ha tautolu. He fakaaoga e tau tapakiaga autiō he fakaako fakatagata kua lagomatai pauaki ka manako a tautolu ke fakaholo ki mua e totou ha tautolu po ke ka fakaako a tautolu he vagahau.
3. Ko hai he fonua ha tautolu ka aoga mai he tau tapakiaga autiō?
3 Ma e Gahua he Fonua: Ko e tau tagata he fonua ha tautolu ne logona hifo kua lavelave lahi a lautolu ke totou kua liga makai ke fanogonogo ke he tau tapakiaga autiō. Po ke liga feleveia a tautolu mo lautolu ne vagahau kehe ti tuga ke talia e lautolu ka logona e fekau he Kautu ke he ha lautolu “ni a vagahau.” (Gahua 2:6-8) He falu matakavi, ko e fanogonogo e vala uho lahi he aga fakamotu. Ma e fakatai, he aga fakamotu Hmong ne fa mahani e tau tagata he vahā fakamua ke fakahoko age e tau tala tuai ha lautolu ke he tau atuhau foou he puhala tutala ti fa gahua mitaki a lautolu he fakamau e tau vala tala ne logona e lautolu. Loga e aga fakamotu Aferika ne fiafia ke fakaako puhala he talahau e tau tala.
4. Ko e heigoa e tau hūhū ne liga hūhū hifo e tautolu ke he puhala ke lagomatai e tau tagata he fonua ha tautolu?
4 He fonua ha mutolu, to aoga lahi kia ke tā e fakataiaga he tapakiaga autiō ke he vagahau he tagata he kaina? Liga aoga kia e tagata mai he autiō ne fakafano e tautolu ki a ia he meli hila? Maeke nakai a tautolu ke moua mai (download) e tau tohi tapakiaga autiō ke he CD ti age ke he tagata he kaina ne fiafia, liga age foki e lagaki kua lomi? He age e tautolu ke he tagata he fonua e autiō katoa ne ha ha ai e tohi, porosua, mekasini, po ke tuleke ka totou ai ko e foakiaga. Ne talaga e tau tapakiaga autiō ma tautolu ke fakaaoga he fakaako fakatagata mo e pihia ke tō e tau tega he kupu mooli he Kautu.—1 Kori. 3:6.