Fakaako a Lautolu ne Temotemoai e Lotomatala ke Totou
1. Ko e heigoa e paleko ne liga feleveia mo tautolu he gahua fakamatala?
1 He fakalataha ke he gahua fakamatala ha tautolu, ne fa feleveia a tautolu mo e paleko he fakaako e kupu mooli ke he tau tagata ne uka ke totou. Ko e heigoa ha tautolu ka taute?
2. Fēfē mo e ko e ha ne fakakite e tautolu e fakalilifu ki a lautolu ne temotemoai e lotomatala ke totou?
2 Fakalilifu e Tuaga ha Lautolu: Ko e tuaga he loto he tagata, nakai ko e iloilo fakalalolagi haana ne aoga ki a Iehova. (1 Samu. 16:7; Fakatai 21:2) Ko e mena ia, kia nakai onoono hifo a tautolu ki a lautolu ne temotemoai e lotomatala ke totou. To liga talia e lautolu ia e lagomatai ha tautolu ka fakatātā e tautolu e fakalilifu mo e fakauka. (1 Pete. 3:15) Ne liga putoia ke he mena ia e nakai peehi e tagata ke totou e kupu po ke paratafa. He tupu ki mua e tagata he fakaako e tau kupu mooli uho he Tohi Tapu, liga makai lahi a ia ke holo ki mua haana a lotomatala ke olioli e totou he Kupu he Atua he “manamanatu [po ke, “nakai fai leo,” NW] ke he aho katoa mo e po.”—Sala. 1:2, 3.
3. Ko e heigoa e tau puhala fakaako kua liga fakaaoga ke fakaako a lautolu ne temotemoai e lotomatala ke totou?
3 Tau Puhala Fakaako he Tau Fakaako Tohi Tapu: Ko e tau fakatino ko e puhala mitaki lahi ke fakaako mo e lagomatai ke manatu. Maeke ia koe ke hūhū ke he tagata fakaako ma e manatu haana ke he fakatino he tohi hane fakaaoga e mua. Ti fakaaoga e tau hūhū pauaki ke lagomatai a ia ke maama e mena ne fakaako he fakatino. Fakaaoga e tau kupu tohi kua fakaako ke he tau manatu pauaki he fakatino. Kua maeke foki ke fakaaoga e tau fakatino ke fakamanatu e fakaakoaga. Ua lahi mahaki e vala tala ka fakaako he taha e magaaho. Peehi e matakupu mo e tau matapatu manatu he fakaakoaga, ti kalo mai he tutala ke he tau vala tala ne nakai haia he tohi. Totou fakahako mai e tau kupu tohi he Tohi Tapu, ti fakaaoga e tau hūhū ke kitia mooli kua maama he tagata fakaako e mena ne totou. Liga fakatupu he mena nei e manako haana ke fakaholo ki mua e lotomatala haana ke totou ke maeke ni ia ia ke kumikumi fakalahi atu e tau kupu mooli he Tohi Tapu.
4. Maeke fēfē a tautolu ke lagomatai e tagata fakaako ha tautolu ke holo ki mua e lotomatala haana ke totou?
4 Tau Lagomataiaga ke Fakaholo ki Mua e Totou: Ko e tau tagata ne temotemoai e lotomatala ke totou po ke tote e magaaho ke fakaako ke totou fakamitaki kua liga maama mitaki mo e tokaloto e vala tala. Liga fakamalolō e koe a lautolu ia ke fakaaoga e tau tapakiaga autiō (audio) ne fai ke he tau tohi ha tautolu he vagahau Peritania. He fanogonogo fakamitaki ke he tagata totou he muitua ke he lagaki ne lolomi, mo e fatiaki nakai fai leo foki e tau kupu, to lagomatai e tagata ke fakaholo ki mua haana lotomatala ke totou. Liga moua foki e ia e lagomataiaga he porosua Apply Yourself to Reading and Writing. He falu matakavi, maeke foki he tau motua ke fakatokatoka e tau vahega totou he fakapotopotoaga. Ko e tau manatu aoga nai kua maeke ke foaki e lalagoaga ki a tautolu he lagomatai a lautolu ne temotemoai e lotomatala ke totou ke maama e “Tohi Tapu,” kua maeke ke fakailoilo a lautolu ke moua e moui.—2 Timo. 3:15.